ވެކްސިން ސެޓްފިކެޓް މައްސަލައިގައި ސަސްޕެންޑްކުރި ޝާކާ އާއި އެމްބޯލޯ އަލުން ގައުމީ ޓީމަށް

ކޮވިޑް-19 ގެ ސައްހަ ނޫން ވެކްސިން ސެޓްފިކެޓްތަކެއް ހޯދި މައްސަލައިގައި ސުވިޒަލޭންޑްގެ ގައުމީ ޓީމުން ބާކީކުރި ކެޕްޓަން ގްރޭނިޓް ޝާކާ އާއި ފޯވާޑް ބްރީލް އެމްބޯލޯއަށް އަލުން ޓީމުން ފުރުސަތު ދޭން ނިންމައިފިއެވެ.

މި ދެ ކުޅުންތެރިންނަށް އަލުން ގައުމީ ޓީމުގެ ދޮރު ހުޅުވާލާފައިވަނީ، އެ މީހުން ހިންގި އަމަލާ ގުޅިގެން ކުރިއަށްދިޔަ ތަހުގީގުތަކާއި ގާނޫނީ މަރުހަލާތައް ނިމުމަކަށް އައުމާ ގުޅިގެންނެވެ. މި މައްސަލައިގައި ދެ ކުޅުންތެރިން ކުރެ ކޮންމެ ކުޅުންތެރިއަކު 150,000 ސްވިސް ފްރޭންކުން ޖޫރިމަނާކޮށް، ދެ އަހަރު ދުވަހުގެ މުއްދަތަކަށް ވަނީ ސަސްޕެންޑްކޮށްފައެވެ. ނަމަވެސް، މި ސަސްޕެންޝަން ތަންފީޒުކުރާނީ ކުރިއަށް އޮތް ދެ އަހަރު ތެރޭގައި އިތުރު ކުށެއް ކޮށްފިނަމައެވެ.

ސްވިސް ފުޓްބޯލް އެސޯސިއޭޝަނުން ހާމަކުރި ގޮތުގައި، މި މަހުގެ ކުރީކޮޅު ކުޅުނު މެޗުތަކުން މި ކުޅުންތެރިން ބާކީކުރި ނަމަވެސް، އަންނަ ނޮވެމްބަރު މަހު ސްލޮވީނިއާ އާއި ސްކޮޓްލޭންޑާ ދެކޮޅަށް ކުޅޭ ނޭޝަންސް ލީގުގެ މުހިންމު މެޗުތަކަށް އެ ކުޅުންތެރިންނަށް ކުޅުމުގެ ފުރުސަތު އެބައޮތެވެ.. ގައުމީ ޓީމުގެ ޑައިރެކްޓަރު ޕިއެރްލުއިޖީ ޓާމީ ވިދާޅުވީ، ދެ ކުޅުންތެރިންނަށް މިހާރު ދެވިފައިވާ އަދަބުތަކަށް ބަލާއިރު، އަލުން ޓީމަށް ގެނައުމަކީ އެންމެ އިންސާފުވެރި ގޮތް ކަމަށެވެ.

މި މައްސަލައިގައި ޝާކާ ވަނީ އޭނާގެ ކުށަށް އިއުތިރާފުވެ، ޒިންމާ އުފުލާފައެވެ. އޭނާގެ އަތުން ކެޕްޓަން ބޭންޑް އަތުލާފައި ނުވި ނަމަވެސް، ކެޕްޓަންކަމާ މެދު އެންމެ ފަހުގެ ނިންމުން ނިންމާނީ ކޯޗު މުރާތު ޔަކިންއެވެ.

ނޭޝަންސް ލީގުގެ ގްރޫޕްގެ އެއްވަނައިގައި ސުވިޒަލޭންޑް އޮތްއިރު، އަންނަ މަހު ކުޅޭ ފަހު ދެ މެޗަކީ އެ ޓީމަށް ވަރަށް މުހިންމު ދެ މެޗެވެ. ކޯޗު ޔަކިންގެ ސްކޮޑު އިއުލާނުކުރުމަށް ހަމަޖެހިފައިވަނީ ނޮވެމްބަރު މަހުގެ 5 ވަނަ ދުވަހުއެވެ.