ފަލަސްތީނު ފުޓްބޯޅަ ޓީމަށް ކ.ގުރައިދޫން ހޫނު މަރުހަބާއެއް

ކ.ގުރައިދޫއަށް މިއަދު ޒިޔާރަތްކުރި ފަލަސްތީނުގެ ޒުވާން ފުޓްބޯޅަ ޓީމަށް އެރަށުން ވަރަށް ހޫނު މަރުހަބާއެއް ކިޔައިފިއެވެ.

ފަލަސްތީނުގެ 17 އަހަރުން ދަށުގެ ޤައުމީޓީމް މިއަދު ގުރައިދުއަށް ޒިޔާަރތްކޮށްފައިމިވަނީ ކުރިއަށްއޮތް އޭއެފްސީ 17 އަހަރުން ދަށުގެ އޭޝިއަން ކަޕް ކޮލިފިކޭޝަނަށް ތައްޔާރުވުމުގެ ގޮތުން ކޭމްޕް ކުރުމަށެވެ. ފަލަސްތީނުގެ ޓީމް ގުރައިދުއަށް އައުމުން މަރުހަބާކިޔުމަށް ރަށުގެ ކުދިބޮޑު އެންމެން ކަހަލަ ގޮތަކަށް ވަނީ ބަނދަރުދޮށަށް ޖަމާވެފައެވެ.

އެފްއޭއެމުންވެސް ވަނީ ފަލަސްތީނުގެ ޓީމް ގުރައިދޫއަށް ޒިޔާަރތްކުރުމުން އެރަށުގެ ރައްޔިތުންގެ ފަރާތުން ބެހެއްޓި ގާތްކަން ފާހަގަކޮށްފައެވެ. ފަލަސްތީނުގެ ޓީމްގެ މި ދަތުރުގެ ތެރެއިން ރާއްޖޭގެ 17 އަހަރުން ދަށުގެ ގައުމީ ޓީމާ ދެކޮޅަށް އެކުވެރިކަމުގެ ދެ މެޗެއް ކުޅުމަށް ވަނީ ހަމަޖެހިފައެވެ.

މި މެޗުތައް އޮންނާނީ މި މަހުގެ 30 ވަނަ ދުވަހާއި، އަންނަ ނޮވެމްބަރު މަހުގެ 2 ވަނަ ދުވަހު މާލޭގެ ގައުމީ ފުޓްބޯޅަ ދަނޑުގައެވެ.

ފަލަސްތީނުގެ ޒުވާންޓީމް މިދިޔަ އަހަރުގެ ނޮވެމްބަރުމަހުވެސް ރާއްޖެއަށް ވަނީ ޒިޔާރަތްކޮށްފައެވެ. އެފަހަރު ޤައުމީޓީމާއެކު ކުޅުނު އެކުވެރިކަމުގެ މެޗް ފަލަސްތީނުން ކާމިޔާބުކުރީ 6-0 ގެ ނަތީޖާއިންނެވެ.