ޗައިނާގެ ކުރީގެ ލީޑަރު މާއޯއަށް މަލާމާތްކުރި މައްސަލާގައި އެމްބާޕޭ މައާފަށް އެދިއްޖެ

ޗައިނާގެ ކުރީގެ ކޮމިއުނިސްޓް ލީޑަރު މާއޯ ޒެޑޮންގްއަށް މަލާމާތްވާގޮތަށް ވާހަކަދެއްކުމާ ގުޅިގެން ކުރިމަތިވި ފާޑުކިޔުންތަކަށްފަހު، ފްރާންސްގެ ކީލިއަން އެމްބާޕޭ އެންމެފަހުން މައާފަށް އެދިއްޖެއެވެ.

މި މައްސަލަ ފެންމަތިވީ ފަރަންސޭސި ޓޯކް ޝޯއެއް ކަމަށްވާ "ދަ ބްރިޖް" ގައި ވާހަކަދައްކަމުން، އިންޓަނެޓްގައި ދައުރުވާ މަޖާ ވީޑިއޯއަކަށް އިޝާރާތްކޮށް އެމްބާޕޭ ދެއްކި ވާހަކަތަކަކާ ގުޅިގެންނެވެ. އެމްބާޕޭ ބުނިގޮތުގައި އޭނާ އެންމެ ގަޔާވާ އެއް "މީމް" އަކީ "ޗައިނާގެ ޑިކްޓޭޓަރެއްގެ" މޫނުގެ ބަދަލުގައި އޭނާގެ މޫނު ހިމަނައިގެން ހަދާފައިވާ ވީޑިއޯއެކެވެ. މިއީ ފުޓްބޯޅައިގެ ތެރޭގައި އެމްބާޕޭގެ ނުފޫޒު ގަދަކަމުން އޭނާއަށް "ޑިކްޓޭޓަރެއްގެ" ނަމުން މުޚާތަބުކޮށް މަޖަލަކަށް ހަދާފައިވާ ވީޑިއޯއެކެވެ.

މި އަމަލާ ގުޅިގެން ޗައިނާގެ ގިނަ ބައެއްގެ ނުރުހުން އަމާޒުވެ، އެ ގައުމުގެ ބައެއް މަޝްހޫރު ބްރޭންޑްތަކުން ވަނީ އެމްބާޕޭއާއެކު އޮތް ވިޔަފާރިގެ މުއާމަލާތްތައްވެސް ކަނޑާލާފައެވެ. މިކަމާ ގުޅިގެން އެމްބާޕޭ ނެރުނު ބަޔާނެއްގައި ބުނީ، އޭނާއަށް ބުނެވުނު ބަހަކީ އެހާ ވިސްނުންތެރިކަމާއެކު ބުނެވުނު ބަހެއް ނޫން ކަމަށާއި، އޭގެ ސަބަބުން ޗައިނާގެ ރައްޔިތުންނަށް ކުރި އަސަރަށްޓަކައި މައާފަށް އެދޭ ކަމަށެވެ. އަދި ސްޕެއިންގެ ލަ ލީގާއިން ވެސް ވަނީ އެމްބާޕޭގެ އަމަލުގެ ސަބަބުން ޗައިނާގެ ސަޕޯޓަރުންނަށް ލިބުނު ދެރައަށްޓަކައި ހިތާމަކުރާ ކަމަށް ބުނެ ބަޔާނެއް ނެރެފައެވެ.

މާއޯ ޒެޑޮންގް އަކީ ޗައިނާގެ ތާރީޚުގައި އެ ގައުމުގެ ކޮމިއުނިސްޓް ޕާޓީން ވަރަށް މަތީ ދަރަޖައަކަށް އިހުތިރާމްކުރާ ލީޑަރެކެވެ. އޭނާއާ ބެހޭގޮތުން ދައްކާ ފާޑުކިޔުމުގެ ވާހަކަތަކަކީ ޗައިނާގައި ވަރަށް ނާޒުކު އަދި ސީރިއަސް މައްސަލައެއްގެ ގޮތުގައި އަބަދުވެސް ބަލަމުން އަންނަ ކަމެކެވެ.