ޓެކްސް އެޕީލް ޓްރިބިއުނަލްގެ މިދިޔަ އަހަރުގެ ހަރަދުތަކުގައި މައްސަލައެއް ނެތް: އޮޑިޓް

ޓެކްސް އެޕީލް ޓްރިބިއުނަލުން މިޮދިޔަ އަހަރު މާލީ މުއާމަލާތްތައް ކޮށްފައިހުރީ ދައުލަތުގެ މާލިއްޔަތު ޤަވާއިދާ އެއްގޮތަށްކަމަށް އޮޑިޓް ރިޕޯޓުގައި ބުނެފިއެވެ.

ދައުލަތުގެ އޮޑިޓަރ ޖެނެރަލް ނެރުއްވާފައިވާ ޓެކްސް އެޕީލް ޓްރިބިއުނަލުގެ މިދިޔަ އަހަރުގެ މާލީ އޮޑިޓްގައި ބުނެފައިވަނީ، އެ އޮފީހުގެ ހަރަދުތައް ކޮށްފައިހުރީ މާލިއްޔަތު ގަވައިދުގެ ތެރެއިން ހަމަޖެހިފައިވާ އުސޫލްތަކުގެ ތެރެއިން ކަމަށެވެ. އެގޮތުން ހަރަދުތައް ހުރީ އެ މުއައްސަސާއަށް ބަޖެޓުގައި ކަނޑައަޅާފައިވާ ކަންތައްތަކަށް، އަދި ހަރަދުތައް ކޮށްފައިވަނީ އެ މިންވަރަށްކަމަށްވެސް ވަނީ ފާހަގަކޮށްފައެވެ.

ޓެކްސް އެޕީލް ޓްރިބިއުނަލަށް ރައްޔިތުންގެ މަޖިލީހުން މިދިޔަ އަހަރަށް 13.4 މިލިއަން ރުފިޔާގެ ބަޖެޓެއް ވަނީ ފާސްކޮށްދީފައެވެ. މީގެ ތެރެއިން ރިކަރަންޓް ހަރަދުގެ ގޮތުގައި 12.03 މިލިއަން ރުފިޔާ ހޭދަވިއިރު، ކެޕިޓަލް ހަރަދަކީ 342،791 ރުފިޔާއެވެ.

މުއައްޒަފުންނަށް 6.8 މިލިއަން ރުފިޔާ ހޭދަވިއިރު، 4 މިލިއަނަށްވުރެ ގިނަ ރުފިޔާ ހޭދަވީ އިމާރާތުގެ ކުއްޔާއި ބިމުގެ ކުއްޔަށެވެ. ހުރިހާ ހަރަދެއް ކޮށްފައި ބާކީވެފައިވަނީ، 124،013 ރުފިޔާއެވެ.