އައްޑޫ ސިޓީ އަދި ފުވައްމުލައް ސިޓީގައި ޝެއިޚް އަބޫ ތައިމިއްޔާގެ ބޮޑު ދަރުހެއް ބާއްވަނީ

މަހަލްދީބު ފައުންޑޭޝަނުގެ "އެންލައިޓެން ޕްރޮގްރާމް" ގެ ދަށުން ދިވެހިރާއްޖެއަށް އުސްތާޛް އަބޫ ތައިމިއްޔާ ކުރައްވާ ދަތުރުގެ ތެރެއިން މިރޭ އައްޑޫ ސިޓީގައި އަދި މާދަމާރޭ، ފުވައްމުލައް ސިޓީގައި ޝެއިހުގެ ބޮޑު ދަރުހެއް ކުރިއަށް ގެންދިއުމަށްވަނީ ނިންމައިފިއެވެ.

އައްޑޫ ސިޓީގައި އައްޑޫ ސިޓީ ކައުންސިލާއި، އަލްބަލަދު ޖަމިއްޔާ، މިޝްކާރު ފައުންޑޭޝަން އަދި ނޫރުލްއިސްލާމު ޖަމިއްޔާއާ ގުޅިގެން "ސައުންޑްނެސް އޮފް ދަ ހާޓް " ގެ ނަމުގައި ދަރުހެއް ކުރިޔަށް ގެންދިޔުމަށް ވަނީ ހަމަޖެހިފައެވެ. މި ދަރުސް ކުރިޔަށް ގެންދިޔުމަށް ހަމަޖެހިފައިވަނީ މިރޭ 20:15 ގައި އައްޑޫ ހައި ސްކޫލުގައެވެ.

ހަމައެއާއެކު، މާދަމާ ރޭ ފުވައްމުލަކު ސިޓީގައި ފުވައްމުލައް ސިޓީ ކައުންސިލާއި ގުޅިގެން "ހައު ދަ ޕްރޮފެޓް ބިލްޓް މަދީނާ" ގެ ނަމުގައި ދަރުހެއް ކުރިޔަށް ގެންދިޔުމަށް ވަނީ ހަމަޖެހިފައެވެ. މި ދަރުސް ކުރިޔަށް ދާނީ މާދަމާ ރޭ 20:30 ގައި ޏ. އަތޮޅު އެޑިއުކޭޝަން ސެންޓަރުގައެވެ.

މި ދެ ބޮޑު ދަރުހުގެ އިތުރުން، އައްޑޫ ސިޓީގައި ރޭގެ ވަގުތެއްގައި ވަނީ ޒުވާނުންނަށް ޙާއްސަކޮށް “ ޑޮޕަމައިން އަލް” ގެ ނަމުގައި ސެޝަނެއް ކުރިއަށް ގެންދެވިފައެވެ.

މީގެއިތުރުން، މާދަމާ، ފުވައްމުލައް ސިޓީގައި ފުވައްމުލައް ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމެޓީއާ ގުޅިގެން “ވޮމެން އެންޑް ދަ ސެކްރެޑް ސޮލިޓިޔުޑް“ ގެ ނަމުގައި އަންހެނުންނަށް ޙާއްސަ ސެޝަނެއް އަދި ”މުސްލިމް ޔޫތް އައިޑެންޓިޓީ ކްރައިސިސް”ގެ ނަމުގައި އޭ.އަ.ޖީ ގްރޭންޑްގައި 16:00 ގައި ޒުވާނުންނަށް ޙާއްސަ ސެޝަނެއް ކުރިއަށް ގެންދިއުމަށް ވަނީ ނިންމާފައެވެ. މި  ޕްރޮގްރާމުތަކުގައި ބައިވެރިވުމުގެ ފުރުޞަތު އެންމެހާ ފަރާތްތަކަށްވެސް ވަނީ ހުޅުވާލެވިފައެވެ.

ޝެއިހު ރާއްޖެއަށް ކުރައްވާ ދަތުރުގެ ތެރެއިން މާލޭގައި ޔުނިވަރސިޓީ ދަރިވަރުންނާއި ޒުވާނުންނަށް އަދި އަންހެނުންނަށް ޙާއްސަ ސެޝަންތަކެއް ކުރިއަށް ގެންދެވިފައިވެއެވެ. އަދި މާލޭގައިވެސް ބޮޑު ދަރުހެއް ވަނީ ކުރިއަށް ގެންދެވިފައެވެ.

ޝެއިޚް އަބޫ ތައިމިއްޔާއަކީ ދުނިޔޭގެ އެކި ކަންކޮޅުތަކުގައި ދީނީ ދަރުސްތައް ދެއްވަމުން ގެންދަވާ، ދިވެހިންގެ މެދުގައިވެސް މަޤުބޫލު އިލްމުވެރިއެކެވެ. އަދި ޝެއިހަކީ ތައިމިއްޔާ އިންސްޓިޓިއުޓުގެ ނަމުގައި އިންސްޓިޓިއުޓެއް ކުރިއަށް ގެންދަވާ ބޭފުޅެއްވެސް މެއެވެ.