ވޯލްޑް ކަޕަށް އެމެރިކާއަށް ނުވެއްދި ސޮމާލީ ރެފްރީގެ މުސާރަ އެއްކޮށް ދެނީ

ވޯލްޑް ކަޕްގައި ރެފްރީކަން ކުރުމަށް އެމެރިކާއަށް އެތެރެވުމުގެ ހުއްދަ ނުލިބުނު ސޮމާލީ ރެފްރީ އޮމަރް އަރްތާންއަށް މުބާރާތުގެ މުސާރަ އެއްކޮށް ދޭނެ ކަމަށް ފީފާއިން ބުނެފިއެވެ.

ހޯމަ ދުވަހު މިއާމީ އިންޓަނެޝަނަލް އެއާޕޯޓުގައި އެމެރިކާގެ އިމިގްރޭޝަން އޮފިޝަލުން 11 ގަޑިއިރު ވަންދެން އަރްތާންއާ ސުވާލުކުރުމަށްފަހު އޭނާގެ ޑިޕްލޮމެޓިކް ޕާސްޕޯޓާއި ވިސާ ބަލައިނުގަނެ ޤައުމަށް ވެއްދުން މަނާކުރިއެވެ. އެމެރިކާ ސަރުކާރުގެ އޮފިޝަލަކު ބުނީ "ޓެރަރ ޖަމާޢަތްތަކުގެ ޝައްކުކުރެވޭ މެމްބަރުންނާ ގުޅުން" އޮތް ކަމަށް ތުހުމަތުކުރެވޭތީ އެތެރެވުމުގެ ހުއްދަ ނުދިނީ ކަމަށެވެ.

ނަމަވެސް، ސޮމާލީ ހަނގުރާމަވެރި ޖަމާޢަތް އަލް ޝަބާބާ ގުޅުން އޮތް ކަމާ މެދު ސުވާލުކުރެވުނު ކަމަށާއި އެ ޖަމާޢަތާ ބެހޭ އެއްވެސް ކަމެއް ނޭނގޭ ކަމަށް ބޯޑަރު އޮފިޝަލުންނަށް ބުނެފައިވާނެ ކަމަށް އަރްތާން ބުންޏެވެ.

"އަހަރެންގެ އަތުގައި ރަނގަޅު ލިޔެކިޔުންތަކާއި ހުރިހާ އެއްޗެއް ހުރި. ރަނގަޅު ވިސާ ވެސް އޮތް. އަހަންނަކީ ހަމައެކަނި ރެފްރީއެއް އަހަރެންގެ ހުވަފެން ހަގީގަތަކަށް ހަދަން މަސައްކަތް ކުރާ މީހެއް. އަހަރެންގެ ހަޔާތުގެ އެންމެ ބޮޑު ހުވަފެން ވޯލްޑް ކަޕަށް އައުން."އަރްތާން ބުންޏެވެ.

ތުރުކީއަށް ފޮނުވައިލުމަށް ފަހު އިސްތަންބޫލްގައި ފީފާގެ އޮފިޝަލުންގެ އެހީތެރިކަން ލިބި އަރްތާން ވަނީ ސޮމާލިއާގެ ވެރިރަށް މޮގަދިޝޫއަށް ދަތުރުކޮށްފައެވެ. ބީބީސީ ސްޕޯޓަށް މަޢުލޫމާތު ދިން ފަރާތްތަކުން ބުނީ ވޯލްޑް ކަޕްގައި ބައިވެރި ނުވި ނަމަވެސް ފީފާއިން އޭނާގެ ފުރިހަމަ މުސާރަ ދޭނެ ކަމަށް ކަށަވަރުކޮށްދީފައިވާ ކަމަށެވެ. ވޯލްޑް ކަޕް ރެފްރީންނަށް ލިބޭ ފީ ކަނޑައެޅޭ ވަރު އެ ރެފްރީންނަށް ވެސް އެނގެނީ މުބާރާތް ނިމުމަށް ފަހުގައެވެ.

2025 ވަނަ އަހަރު ކޮންފެޑެރޭޝަން އޮފް އެފްރިކަން ފުޓްބޯލް (ކެފް) ގެ އެންމެ މޮޅު ފިރިހެން ރެފްރީގެ މަޤާމު ހޯދި އުމުރުން 34 އަހަރުގެ އަރްތާންއަށް މިހާރު ވަނީ އޮގަސްޓް 12 ގައި އޮސްޓްރިއާގެ ސަލްޒްބާގްގައި ޕެރިސް ސެއިންޓް-ޖާމެއިންއާއި އެސްޓަން ވިލާ ބައްދަލުކުރާ ޔޫއެފާ ސުޕާ ކަޕް މެޗުގައި ރެފްރީކަން ކުރުމުގެ ދަޢުވަތު ލިބިފައެވެ.

ސޮމާލީ ރައްޔިތެއްގެ ގޮތުގައި ބައްރެއްގެ ފައިނަލް މެޗެއް ބެލެހެއްޓި ފުރަތަމަ ރެފްރީގެ ގޮތުގައި 2025 ގައި ތާރީޚު ލިޔެ ޖޫން 2025 ގައި އެފްރިކަން ޗެމްޕިއަންސް ލީގު ފައިނަލްގެ ދެވަނަ ލެގާއި ޗިލީގައި ބޭއްވި 20 އަހަރުން ދަށުގެ ވޯލްޑް ކަޕްގެ ތިން މެޗު ހިމެނޭ ގޮތުން ތާޑް-ޕްލޭސް ޕްލޭއޮފް އަދި އެފްރިކާ ކަޕް އޮފް ނޭޝަންސްގެ ދެ ގްރޫޕް މެޗު ވެސް އޭނާ ވަނީ ބަލަހައްޓައިފައެވެ.