ޚާއްޞަ ހާލަތްތަކުގައި، ސިވިލް ސާވިސް މުވައްޒަފުންނަށް ގޭގައި ތިބެގެން މަސައްކަތް ކުރެވޭގޮތް ހަދައިފި

ސިވިލް ސަރވިސްގެ މުވައްޒަފުންނަށް ދިމާވާ ޚާއްޞަ ހާލަތްތަކާ ގުޅިގެން، އޮފީހަށް ހާޒިރުނުވެ ގޭގައި ތިބެގެން މަސައްކަތް ކުރެވޭނެ އުސޫލުތަކެއް ކަނޑައަޅައި، ސިވިލް ސަރވިސްގެ ގަވާއިދަށް މުހިންމު އިސްލާޙްތަކެއް ގެނެސްފިއެވެ.

ދިވެހި ސަރުކާރުގެ ގެޒެޓްގައި އިއްޔެ ޝާއިޢުކޮށްފައިވާ މި އިސްލާޙުގައިވާ ގޮތުން، މުވައްޒަފަކަށް ދިމާވާ ޚާއްޞަ ހާލަތަކާ ގުޅިގެން އޮފީހަށް ނުކުމެ މަސައްކަތް ނުކުރެވޭނެ ފަދަ ހާލަތެއް މެދުވެރިވެއްޖެ ނަމަ، ގޭގައި ހުރެގެން މަސައްކަތް ކުރުމުގެ ހުއްދަ ދެވޭނެއެވެ.

މިގޮތަށް ހުއްދަ ދެވޭނީ ސިއްޙީ ވުޒާރާގައި ނުވަތަ ރާއްޖެއިން ބޭރުގެ ކަމާބެހޭ އިދާރާއެއްގައި ރަޖިސްޓަރީކޮށްފައިވާ ސިއްޙީ މަސައްކަތްތެރިއަކު ދޫކޮށްފައިވާ ލިޔުމަކަށް ރިއާޔަތްކުރުމަށްފަހު، އެ އިދާރާއެއްގެ ސިވިލް ސަރވިސްގެ އެންމެ އިސްވެރިޔާ އަށެވެ.

ގޭގައި ތިބެގެން މަސައްކަތް ކުރުމުގައި ރިއާޔަތްކުރަންޖެހޭ މުހިންމު ކަންތައްތައް:

1) މުވައްޒަފާ ހަވާލުކޮށްފައިވާ މަސައްކަތަކީ އޮފީހަށް ހާޒިރުނުވެ ކުރެވޭނެ މަސައްކަތެއް ކަމުގައިވުން.

2) މަސައްކަތް ކުރެވޭނެ އެކަށޭނަ ވަސީލަތްތަކާއި މާޙައުލެއް އޮތްކަން ކަށަވަރު ކުރުން

3) އިދާރާއިން ދޭ އެއްވެސް ޚިދުމަތަކަށް ހުރަސްނޭޅޭނެކަން ކަށަވަރުކުރުމާއެކު، މުވައްޒަފުގެ މަސައްކަތްތައް ދުވަހުން ދުވަހަށް ސުޕަވައިޒުކޮށް މޮނިޓަރ ކުރުން.

4) އޮފީހަށް ހާޒިރުވާންޖެހޭ ފަދަ ހާލަތެއް މެދުވެރިވެގެން އަންގައިފި ނަމަ، މުވައްޒަފު އޮފީހަށް ހާޒިރުވާންވާނެ.

އޮފީހަށް ހާޒިރުނުވެ މަސައްކަތްކުރުމަށް ހުއްދަދެވޭ މުވައްޒަފުންގެ މަސައްކަތް ބަލައި، މުވައްޒަފަށް އެދެވޭ މިންވަރަށް މަސައްކަތް ނުކުރެވޭކަމަށް އިދާރާއަށް ފާހަގަކުރެވިއްޖެ ނަމަ، އޮފީހަށްހާޒިރުނުވެ މަސައްކަތްކުރުމަށް ދީފައިވާ ހުއްދަ ނިމުމަކަށްގެނެވިދާނެ އިސްލާޙުގައިވެއެވެ.

މީގެ އިތުރުން މި އިސްލާޙުގައި ބަޔާންކޮށްފައިވާ ގޮތުން، ގޭގައި ތިބެގެން މަސައްކަތް ކުރަން އެދޭ މުވައްޒަފުން އެކަމަށްޓަކައި އިދާރާއިން ކަނޑައަޅާ އެއްބަސްވުމެއްގައި ސޮއިކުރަންވާނެއެވެ. މި އެއްބަސްވުމުގައި މަސައްކަތުގެ މަޢުލޫމާތާއި ސިއްރު ހިފެހެއްޓުމަށް އިޤުރާރުވާން ޖެހެއެވެ.

ނަމަވެސް، މަސައްކަތުގެ ބާވަތުން އޮފީހަށް ނުވަތަ މަސައްކަތްކުރާ ތަނަކަށް ކޮންމެހެން ހާޒިރުވާންޖެހޭ މުވައްޒަފުން (މިސާލަކަށް: ޓީޗަރުން، ނަރުހުން، އަދި ހިންގުމުގެ އިސް ފަންތީގެ މުވައްޒަފުން) މި އުސޫލުން އިސްތިސްނާވާނެ ކަމަށް ސިވިލް ސަރވިސްގެ ގަވާއިދަށް ގެނައި މި އިސްލާޙުގައި ބަޔާންކޮށްފައިވެއެވެ.