ރައީސް ޔާމީންއަށް ކުރަމުންދާ އަނިޔާގައި ޒަޚަމްވަނީ ގައުމާއި ރައްޔިތުން: ޝިޔާމު

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމުގެ މައްޗަށް ނުހައްގުން ހުކުމެއްކޮށް، އެމަނިކުފާނު ހުރަގޭގައި ބަންދުކޮށްދެން ދެމުންދާ އަނިޔާތަކަކީ އެކަމުގެ ސަބަބުން ގައުމާއި ރައްޔިތުންނަށްވެސް ބޮޑެތި ގެއްލުންތަކެއް ލިބެމުންދާ ކަމެއްކަމަށް މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބުރައީސް އަހުމަދު ޝިޔާމު ވިދާޅުވެއްޖެ އެވެ.

ރައީސް ޔާމީން މިނިވަންކުރުމަށް ގޮވާލާ އިދިކޮޅުން ރޭ ބޭއްވި ޖަލްސާއެއްގައި ވާހަކަދައްކަވަމުން ޝިޔާމު ވިދާޅުވީ ރައީސް ޔާމީންގެ މައްސަލަ އިސްތިއުނާފުކުރުމަށް ސަރުކާރުން ހުރަސްއަޅަމުންދާ ކަމަށެވެ.

އެމަނިކުފާނުގެ މައްސަލަ އިސްތިއުނާފު ކުރަން ބޭނުންވާ މުހިންމު ލިޔެކިޔުންތައް މިހާތަނަށްވެސް ކޯޓުން ފޯރުކޮށްދީފައި ނުވާއިރު، އެ ލިޔެކިޔުންތައް ފޯރުކޮށްނުދެވޭ މައިގަނޑު ސަބަބަކީ ރައީސް ޔާމީންގެ މައްޗަށް އިއްވި ހުކުމަކީ މައްސަލަ ބެއްލެވި ފަނޑިޔާރު އަހުމަދު ޝަކީލު ލިޔުއްވި ހުކުމަކަށް ނުވާތީކަމަށް ޝިޔާމު ވިދާޅުވިއެވެ.

އެ ވާހަކަތަކާއި ގުޅުވާ ޝިޔާމު ވިދާޅުވީ ރައީސް ޔާމީންއަށް ކުރަމުންދާ އަނިޔާތަކުގައި ޒަޚަމްވަނީ ހަމައެކަނި އެމަނިކުފާނާއި އެމަނިކުފާނުގެ އާއިލާ ނޫންކަމަށެވެ. އެމަނިކުފާނަށް ކުރަމުންދާ އަނިޔާގެ އަސަރު މުޅި ގައުމާއި ރައްޔިތުންނަށްވެސް ކުރަމުންދާކަމަށް ޝިޔާމް ވިދާޅުވިއެވެ.

"އަޅުގަނޑު ދަންނަވާލަން ބޭނުންވަނީ ރައީސް އިބުރާހިމަށް! އަނިޔާ ތިޔަ ކުރައްވަނީ ހަމައެކަނި ރައީސް ޔާމީނަކަށް ނޫނޭ.. އަނިޔާ ތިޔަ ކުރައްވަނީ ހަމައެކަނި ރައީސް ޔާމީނަކަށް ނޫނޭ.. ޒަޚަމްތައް އެބަހުއްޓޭ ދިވެހި ކޮންމެ ރައްޔިތެއްގެ.. ޒަޚަމް އެބަ އަޅައޭ މި ގައުމުގައި.. ޒަޚަމް އެބަހުއްޓޭ އެމަނިކުފާނުގެ އާއިލާގަ..

ނައިފަރު ދާއިރާގެ މެމްބަރު އަހުމަދު ޝިޔާމް

ޝިޔާމް ވިދާޅުވީ ރައީސް ޔާމީން ޖަލަށް ލުމަށްފަހު މާލެއާއި މާލެ ކައިރީ ސަރަހައްދުތަކުގައި މިހާރު ހިނގަމުންދާ ކަންކަމަކީ ކަންބޮޑުވާ ވަރުގެ ނުރައްކާތެރި ކަންކަން ކަމަށެވެ.

އެގޮތުން ތަންތަނުގައި ހުޅުޖެހުން އާންމުވުމާއި، އިންޑިއާ މީހުންގެ ފަރާތުން ފެންމަތިވާ ކުށްތައް އިތުރުވުމަކީ ވިސްނާލަން ޖެހޭ ކަންކަމުގެ ގޮތުގައި އޭނާ ފާހަގަކުރެއްވި އެވެ.

ޝިޔާމް ވިދާޅުވީ އެމްޑީީގެ ރިޔާސީ ޕްރައިމަރީގައި ކެމްޕޭނު ކުރެއްވުމުގެ ބަދަލުގައި ރައީސް ސޯލިހު މިހާރުން މިހާރަށް ކުރައްވީ ކަމަކީ ރައީސް ޔާމީން ގެއަށް ބަދަލުކުރުން ކަމަށެވެ. އެމަނިކުފާނަކީ ރައްޔިތުންގެ އުންމީދު ކަމަށާއި، އެމަނިކުފާނަށް ކުރާ އަނިޔާގެ އަސަރު ރައްޔިތުންނަށް ފޯރަމުންދާކަމަށް ޝިޔާމު ވިދާޅުވިއެވެ.