ރޮޒޭނާ ރައީސް ނަޝީދަށް: 4 ދައުރު ވެރިކަމަށް ނިކުތް މީހަކު އެހެން މީހުންނަށް ކިޔާނެ އެއްޗެއް ނޯންނާނެ

ދެވަނަ ދައުރަށް ފަހު ގާނޫނުއަސާސީ ބަދަލު ކުރައްވައިގެން ތިން ވަނަ ދައުރަކަށް ވެސް އިންތިޚާބުވާން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބޭނުންފުޅުވެލައްވާނެ ކަމަށް އެމްޑީޕީގެ ރިޔާސީ ޕްރައިމަރީގައި ރައީސް ސޯލިހާއި ވާދަކުރައްވާ މަޖިލީހުގެ ރައީސް މުހައްމަދު ނަޝީދު ވިދާޅުވުމުން، މަޖިލީހުގެ އައްޑޫ މީދޫ ދާއިރާގެ މެންބަރު ރޮޒޭނާ އާދަމް ރައްދުދެއްވައިފި އެވެ.

އެމްޑީޕީގެ ރިޔާސީ ޕްރައިމަރީގެ ފޯރިގަދަވެ، ދެ ރައީސުންގެ މެދުގައިވެސް ބަހުގެ ހަމަލތަކެއް ބަދަލުކުރެވެމުންދާ މި ދަނޑިވަޅުގައި ބ. ހިތާދޫގައި ބޭއްވި ކެމްޕެއިން ޖަލްސާއެއްގައި ނަޝީދު ވިދާޅުވީ، 2018 ގެ ރިޔާސީ އިންތިހާބުގެ ދުވަސްވަރު އޭރުގެ ހުރިހާ ސިޔާސީ ލީޑަރުން ބަންދުކޮށްފައި ތިބުމުން އެންމެން އެކުގައި ރައީސް އިބްރާހިމް މުހައްމަދު ސޯލިހު ނެރުމަށް ނިންމެވި ކަމަށާއި އެ މަނިކުފާނު ވެރިކަމުގައި ހުންނަވާނީ 18 މަސް ދުވަހަށް ކަމަށް އެމްޑީޕީގެ މެނިފެސްޓޯގައި ވެސް ލިޔުނު ކަމަށެވެ.

އެހެން ނަމަވެސް މިހާރު އެމަނިކުފާނު އިތުރު ދައުރެއްވެސް ބޭނުންފުޅުވާކަމަށް ނަޝީދު ވިދާޅުވިއެވެ.

ނަޝީދުގެ އެ ވާހަކަތަކަށް ރައްދުދެއްވަމުން ރޮޒޭނާ ވިދާޅުވީ ރައީސް ނަޝީދަކީ ވިދިވިދިގެން 4 އަހަރު ވެރިކަމަށް ކުރިމަތިލެއްވި ބޭފުޅެއްކަމަށެވެ. އެގޮތުން 2008 ވަނަ އަހަރަށްފަހު އޮންނަ ކޮންމެ ރިޔާސީ އިންތިޚާބެއްގައި ވެރިކަން ހޯއްދެވުމަށް ނަޝީދު ނިކުމެވަޑައިގަންނަވާކަމަށް ރޮޒޭނާ ވިދާޅުވިއެވެ.

އެހެންކަމުން އެހެންމީހުން ވެރިކަން ބޭނުންވާ ވާހަކަ ނަޝީދަށް ދެއްކެން ނެތްކަމަށް ރޮޒޭނާ ވަނީ ވިދާޅުވެފަ އެވެ.

ރޮޒޭނާ އަކީ މީގެ ކުރިން ނަޝީދަށް ތާއީދު ކުރެއްވި ބޭފުޅެކެވެ. އެހެން ނަމަވެސް މިހާރު ނަޝީދަށް އެއްވެސް ވަރަކަށް ތާއީދު ނުކުރައްވާކަމަށް ރޮޒޭނާ ވަނީ ވިދާޅުވެފައެވެ.

އަދި ވިދާޅުވީ ނަޝީދަށް ތާއީދުކުރުން ހުއްޓަވާލެއްވީ ޕާޓީއާއި ގައުމަށްވުރެ އަމިއްލަ މަސްލަހަތު އިސްކުރައްވާތީކަމަށެވެ. އަދި ވެރިކަމަށް ވަޑައިގަތުމުގެ ދަހިވެތިކަމުގައި ނަޝީދު އުޅުއްވާތީކަމަށެވެ.