މިއަދުގެ އައިކޮމްގެ އަޑުއެހުމުގައި ޓޫރިޒަމް މިނިސްޓްރީން ބައިވެރިނުވި
އިންފޮރމޭޝަން ކޮމިޝަނަރގެ އޮފީހުން މިއަދު ބޭއްވި މައްސަލައެއްގެ އަޑުއެހުމަށް ޓޫރިޒަމް މިނިސްޓްރީން ބައިވެރިނުވާ މައްސަލައެއް ފެންމަތިވެއްޖެއެވެ.
މޯލްޑިވްސް ޓްރޭޑް ޔޫނިއަނުން ހުށައެޅި މި މައްސަލައަކީ އެމްއެމްޕީއާރްސީގެ ޚިޔާާނާތުގެ މައްސަލައިގައި ހިމެނޭ ރަށްތަކުގެ އެގްރީމެންޓް ހިއްސާކުރުމަށް ޓޫރިޒަމް މިނިސްޓްރީން ދެކޮޅު ހެދުމުން ހުށައަޅާފައިވާ މައްސަލައެކެވެ.
މި މައްސަލައިގައި މިއަދު ބޭއްވި އަޑުއެހުމަށް ޓޫރިޒަމް މިނިސްޓްރީގެ އިންފޮރމޭޝަން އޮފިސަރ ހާޒިރުވިކަމަށްވެއެވެ. ނަމަވެސް އަޑުއެހުން ފެއްޓެން ކައިރިވެފައިވަނިކޮށް އޭނާ އެތަނުން ދިޔަކަމަށް ޓްރާާންސްޕޭރެންސީ މޯލްޑިވްސްއިން މައުލޫމާތުދެއެވެ. މި މައްސަލަ ބަަލައި، އެ މިނިސްޓްރީގެ އިންފޮރމޭޝަން އޮފިސަރާއި މެދު ފިޔަވަޅު އެޅުމަށް އިންފޮރމޭޝަން ކޮމިޝަނަރ ވަނީ ނިންމަވާފައެވެ.
އަދި ހުރިހާ އެއްބަސްވުމެއް ހާމަކުރަން ޖެހޭނެ ކަމަށާއި އެއްބަސްވުންތައް ފޮރުވަންވީ ސަބަބެއް ނެތްކަމަށްވެސް އިންފޮރމޭޝަަން ކޮމިޝަނަރ ފިޔާޒު މޫސާ ވަނީ ވިދާޅުވެފައެވެ.
މިކަމާއި ގުޅިގެން ޓްރާންސްޕޭރެންސީ މޯލްޑިވްސްއިން ވަނީ ދާއިރާތަކުގެ މަޖިލިސް މެންބަރުންގެ ކިބައިން ޓޫރިޒަމް މިނިސްޓަރ އަލީ ވަހީދު މަޖިލީހަށް ހާޒިރުކޮށް، ގާނޫނު އަސާސީން ކަށަވަރުކޮށްދޭ ހައްގަކުން މަހުރޫމްކުރި މައްސަލަ ބަލައިދިނުމަށް އެދުމަށް ގޮވާލާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
