އަމްރު ސަރުކާރުގެ ކޮރަޕްޝަނުގެ ވާހަކަ ދައްކާތީ ނިމާލު ފާޑުވިދާޅުވެއްޖެ!

އެސްޓީއޯގެ މެނޭޖިން ޑިރެކްޓަރުގެ މަޤާމުން ހުސެއިން އަމްރު ވަކިކުރިފަހުން ސަރުކާރުގެ ކޮރަޕްޝަނުގެ ވާހަކަތައް އޭނާ ދައްކަމުންދާތީ މާލެ އަތޮޅު ކައުންސިލްގެ ރައީސް މުޙައްމަދު ނިމާލު ފާޑުވިދާޅުވެއްޖެ އެވެ.

ހުސެއިން އަމުުރު މަޤާމުން ވަކިކުރުމާއި ހަމަޔަށް ސަރުކާރުގެ ކުންފުނިތަކުގައި ކޮރަޕްޝަން އޮތް މިންވަރާއި ގުޅޭގޮތުން އެއްޗެއް ވިދާޅުވެފައެއް ނުވެއެވެ. އެހެން ނަމަވެސް، އެފަހުން އޭނާ ގެންދަވަނީ ކުންފުނިތަކުގައި ކޮޕަރްޝަން އޮތް މިންވަރާ ގުޅޭ ބޮޑެތި ތުހުމަތުތަކެއް ކުރައްވަމުންނެވެ.

އެގޮތުން ފެނަކަ އަށް ފާޑުކިޔުންތައް އަމާޒުކުރައްވާ އަމުރުު ވިދާޅުވީ ފެނަކައިގެ ހުރިހާ އެސެޓެއް ވިއްކައިގެންވެސް ދަރަނި ދެއްކޭވަރަށްވުރެ ބޮޑަށް ކުންފުނި އޮތީ ދަރާފައި ކަމަށެވެ.

ދައުރުނިމެން ކުޑަތަން ވަންދެން ކޮރަޕްޝަންގެ ވާހަކަ ނުދައްކަވާ ހަނު ހުންނެވުމަށްފަހު މަޤާމުން ވަކިކުރުމާއި ގުޅިގެން އަމްރު ސަރުކާރުގެ ކޮރަޕްޝަނުގެ ވާހަކަ ދައްކަވަން ފެއްތެވުމާއި ގުޅިގެން ނިމާލު ކުރެއްވި ޓްވީޓެއްގައިވަނީ އަމްރުގެ ވާހަކަތައް ރަނގަޅު ނަމަވެސް އޭނާގެ އިޚްލާސްތެރިކަމެއް ނެތްކަން ސިފަކުރައްވާފަ އެވެ.

އެގޮތުން މަޒާޖީގޮތަކަށް ނިމާލު ވިދާޅުވީ ދައުރު ނިމެންދެން އެވާހަކަ ނުދައްކަވާ ހުންނެވި ނަމަ ރަނގަޅުވީސް ކަމަށެވެ.

މިއަދު ކޮރަޕްޝަނުގެ ވާހަކަ އަޑަށް ބާރުލާފައި އަމްރު ދައްކަމުންދާއިރު، ޚުދު އަމްރުވެސް ޖަވާބުދާރީވާން ޖެހޭ ކަންކަން ހުރިކަން ނިމާލު ހަނދާން ކޮށްދެއްވި އެވެ.

އެގޮތުން މީގެ ކުރިން ހުސެއިން އަމްރު ހަވާލުވެވަޑައިގެން ހުންނެވި އެސްޓީއޯގެ ސަބްސިޑަރީ ކުންފުންޏެއްކަމަށްވާ ފިއުލް ސަޕްލައި މޯލްޑިވްސް(އެފްއެސްއެމް) އިން ފެނަކައިން ފައިސާ ނުދެނީސް ޑީސަލް ދޫކުރި ޑީސަލް ކޮބައިތޯ އޭނާ ވަނީ ސުވާލުކޮށްފަ އެވެ. އަދި އެވާހަކަ ނުދައްކަވާ ސަބަބުވެސް ވަނީ އައްސަވާފައެވެ.

އޭގެއިތުރުން އީ-ބިލުތައް އަތްނުފޯރާ ފަށަށް ދިރައިރު ހަނު ހުންނެވުމުގެ ބަދަލުގައި އަމްރު އެވާހަކަތައް ދެއްކެވިނަމަ، މިހާރު އަމްރު ދައްކަވަމުންދާ ވާހަކަތައް އަޑުއައްސަވަން ވަރަށް ފަސޭހަފުޅުވާނެ ކަމަށް ނިމާލު ވަނީ ވިދާޅުވެފަ އެވެ.

ނިމާލުގެ ފާޑުކިޔުން އަމްރުއަށް އަމާޒުކުރައްވާފައިވަނީ މިހާ ދުވަސް ވަންދެން އަމްރު މަޤާމުގއި ހުންނަވާ ކުންފުނިތަކުން ހިންގަމުންދާ ކޮރަޕްޝަންގެ ކަންކަން އެނގިވަޑައިގެން ހުންނަވާ އެއްޗެއް ވިދާޅުވެފައި ނުވާތީއެވެ. އަދި މަޤާމު ގެއްލުމުން އަނގަ ހުޅުވުމަކީ އިޚްލާސްތެރިންގެ ގޮތެއް ނޫންކަމަށް ނިމާލު ވަނީ ސިފަކުރައްވާފަ އެވެ.