ޖޯޒީ އެމްވީ ފުޓްސަލް ޗެލެންޖް 2023 ގެ މީޑިއާ ޕާޓްނަރަކަށް ވޮއިސް!

ޖޯޒީ އެމްވީގެ ފަރާތުން އިންތިޒާމްކޮށްގެން ލ.މާވަށުގައި އަންނަ މަހު 23 ގައި ފެށުމަށް ހަޖެހިފައިވާ ޖޯޒީ އެމްވީ ފުޓްސަލް ޗެލެންޖް 2023 ގެ މީޑިއާ ޕާޓްނަރަކަށް ވޮއިސް ހަމަޖައްސައިފިއެވެ.

މީޑިއާ ޕާޓްނަރާއެކު ބޭއްވި ސޮއި ކުރުމުގެ ރަސްމިއްޔާތުގައި ޖޯޒީ އެމްވީގެ ފަރާތުން ސޮއިކުރެއްވީ ޖޯޒީ އެމްވީގެ ވެރިޔާ އިދުރީސް މަހްފޫޒު އެވެ. އަދި ވޮއިސްގެ ފަރާތުން ސޮއިކުރެއްވީ ސީއީއޯ މުހައްމަދު ސައުޒަމް އެވެ.

ވޮއިސް އަށް މައުލޫމާތު ދެއްވަމުން ޖޯޒީ އެމްވީގެ ވެރިޔާ އިދުރީސް މަހްފޫޒު ވިދާޅުވި މި މުބާރާތަކީ ޖޯޒީ އެމްވީގެ ފަރާތުން އިންތިޒާމްކޮށްގެން ބާއްވާ ފުރަތަަމަ ފުޓްސަލް މުބާރާތެވެ. އަދި މިއީ ލ.އަތޮޅުގެ ޒުވާނުންނަށް ޚާއްސަކޮށްގެން ބާއްވާ މުބާރާތެކެވެ. މިއަތޮޅުގެ ކޮންމެ ރަށަކުން ވެސް ޓީމުތައް ބައިވެރިކުރެވިދާނެއެވެ. އަދި ކޮންމެ ޓީމެއްގައި އަތޮޅުން ބޭރުގެ ދެކުޅުންތެރިން ބައިވެރިކުރުމުގެ ފުރުސަތު އޮނާނެއެވެ.

އިތުރަށް ވާހަކަ ދައްކަމުން އިދުރީސް ވިދާޅުވީ މިފަދަ މުބާރާތެއް ލ.އަތޮޅުގެ ޒުވާނުންނަށް ޚާއްސަކޮށްގެން ބޭއްވުމުގެ އެންމެ ބޮޑު މަގުސަދަކީ މިއަތޮޅުގެ ޒުވާނުންގެ މެދުގައި ކުޅިވަރުގެ ރޫހް ދިރުވައި އެކުވެރިކަމާއި އެއްބައިވަންތަކަން އާލާކޮށް ކުޅިވަރުގެ ތެރެއިން ކުށް މަދު މުޖުތަމައެއް ބިނާކުރުމަށް ބާރުއެޅުމާއެކު، ދުޅަހެޔޮ ސިއްހަތަކަށް މަގުފަހިކުރުމުގެ ފުރުސަތު ތަނަވަސް ކޮށްދިނުމެވެ.