މާވަށުގެ ސިއްޚީ ދާއިރާގެ ތަރައްގީގެ އަމާޒަކީ ހޮސްޕިޓަލެއްގެ ދަރަޖައަށް ޚިދުމަތް ދިނުން: ރައީސް
ލ. މާވަށުގެ ސިއްޙީ ދާއިރާ ތަރައްޤީކުރައްވާނީ ރައްޔިތުންގެ ބޭނުންތަކަށް އަމާޒުކޮށް، ހޮސްޕިޓަލެއްގެ ދަރަޖައަށް ޚިދުމަތް ދެވޭ ފެންވަރަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ހައްދުންމައްޗަށް ކުރައްވަމުންދާ ދަތުރުފުޅުގެ ފުރަތަމަ މަންޒިލް ކަމުގައިވާ މާވަށުގައި ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ސިއްޙީ މަރުކަޒުގެ ޚިދުމަތްތައް ފުޅާކުރެއްވުމަށްޓަކައި 4 އެނދުގެ ވޯޑަކާއި، ލެބޯޓްރީއަކާއި ޕަބްލިކް ހެލްތު ޔުނިޓެއް ޤާއިމްކުރެއްވުމުގެ މަސައްކަތް މިމަހު ތެރޭގައި ބަޔަކާ ހަވާލުކުރައްވާނެ ކަމަށެވެ.
އަދި ރަށަށް ޚާއްސަ ސީ އެމްބިއުލާންސެއްވެސް ހަމަޖައްސަވައިދެއްވާނެ ކަމުގެ ޔަގީންކަން ރައީސް ދެއްވިއެވެ.
މީގެއިތުރުން، މާވަށުގައި ކުރިއަށްދާ 15 ހެކްޓަރުގެ ބިން ހިއްކުމުގެ މަޝްރޫޢުއަށް އިތުރު 15 ހެކްޓަރުގެ ބިން ހިއްކައި، ޖުމްލަ 30 ހެކްޓަރުގެ ބިން ހިއްކުމުގެ މަސައްކަތް ކުރިއަށް ގެންދަވާނެ ކަމަށް ރައީސް ވިދާޅުވިއެވެ. ހިއްކޭ ބިމުގައި ހައުސިން ޕްރޮޖެކްޓްތަކާއި، ފެނާއި ނަރުދަމާ އަދި ކަރަންޓުގެ ޚިދުމަތް ޤާއިމްކުރެއްވުމަށް ވަނީ ރޭއްވެވިފައެވެ.
ވާހަކަފުޅު ނިންމަވާލައްވަމުން ރައީސް ވިދާޅުވީ، ލ. އަތޮޅަށް އިތުރު އެއާޕޯޓެއް ގާއިމްކުރެއްވުމަށް ވަނީ ނިންމަވާފައި ކަމަށާއި، އެއާޕޯޓް އަޅުއްވާނެ ސަރަހައްދެއް އަވަހަށް ކަނޑައަޅުއްވައި، އެ މަޝްރޫޢު ފެއްޓެވުމަށް ރާއްވަވާފައިވާ ކަން ހާމަކުރައްވާފައެވެ. އެއާޕޯޓް އެޅުއްވުމަށް ސަރަހައްދެއް ކަނޑައަޅުއްވާނީ ދަތުރުފަތުރާއި، ރަށުގެ އިޤްތިޞާދު އަދި ޓޫރިޒަމްގެ ދާއިރާއަށް އެންމެ ފައިދާހުރި ގޮތަށް ކަމަށް ރައީސް ވިދާޅުވިއެވެ.
ރައީސްގެ މި ދަތުރުފުޅުގައި މާވަށުގައި ކުޅިވަރު، ތަޢުލީމު، މަސްވެރިކަން އަދި މަގު ހެދުން ފަދަ 11 މުހިންމު މަޝްރޫޢެއް ވަނީ ފައްޓަވާފައެވެ. މީގެ ތެރެއިން 8 މަޝްރޫޢެއްގެ އަމަލީ މަސައްކަތް ވަނީ ފެށިފައިވާއިރު، 3 މަޝްރޫޢެއްގެ އެއްބަސްވުމުގައި ވަނީ ސޮއިކުރެވިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
