މިއަހަރުގެ އަމީރުލް ޙައްޖަކަށް ނައިބު ރައީސް ފައިޞަލް

މިއަހަރުގެ އަމީރުލް ޙައްޖަކަށް ނައިބު ރައީސް ފައިޞަލް ނަސީމް ހަމަޖައްސަވައިފިއެވެ.

1444 ވަނަ އަހަރު ޙައްޖުގެ މަތިވެރި އަޅުކަން އަދާކުރުމަށްދާ ދިވެހި ޙައްޖާޖީންގެ ކަންކަން ބެލެހެއްޓުމަށް އަމީރުލް ޙައްޖެއްގެ ގޮތުގައި ނައިބު ރައީސް ފައިޞަލް ނަސީމް ހަމަޖެެއްސެވީ ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިޙުއެވެ.

މިއަހަރު ޙައްޖުގެ އަޅުކަން އަދާކުރުމަށް 1140 ދިވެހިން ސަޢޫދީޢަރަބިއްޔާއަށް ދިއުމަށް ވަނީ ހަމަޖެހިފައެވެ. އެއިގެ ތެރެއިން 290 ޙައްޖާޖީއަކު މާދަމާ ފުރާނެއެވެ.

މިހިނގާ ޖޫން މަހުގެ 19 ވަނަ ދުވަހު ޙައްޖާޖީން ފުރުމަށް ހަމަޖެހިފައިވާ އެންމެ ފަހުގެ ފްލައިޓް ފުރާނެ ކަމަށް އިސްލާމިކް މިނިސްޓްރީއިން ވަނީ ބުނެފައެވެ.

އިސްލާމިކް މިނިސްޓްރީ އިން ބުނެފައިވަނީ އެހެން އަހަރުތަކެކޭ އެއްގޮތަށް މި އަހަރުވެސް ޙައްޖުވެރިންނަށް ފަސޭހައިން ފުރުމުގެ އިންތިޒާމްތައް ހަމަޖެއްސުމުގެ މަސައްކަތް ކުރެވިފައިވާ ކަމަށެވެ.

އެގޮތުން ޙައްޖުވެރިން އެއާޕޯޓަށް ގެންދިއުމާއި، ފޮށްޓާއި ދަބަސް ބަލައިގަތުމުގެ މަސައްކަތް ސަރުކާރުގެ މުއައްސަސާތަކާ ގުޅިގެން ކުރިއަށް ގެންގޮސްފައި ވެއެވެ. އުމުރުން ދުވަސްވީ އަދި ބަލި މީހުންކުދި ވެހިކަލްތަކުގައި، ބަހާހަމައަށް ގެންގޮސްދިނުމާއި، ޙައްޖުވެރިއާއާއި ޢާއިލާގެ ބޭފުޅުންނަށް ބަހުގައި ނުވަތަ އޭސީ ފެރީގައި އެއާޕޯޓަށް ދެވޭގޮތް ހަމަޖެއްސުމާއި، ފުރުމުގެ އެއްދުވަސް ކުރިން ފޮށިތައް އެއަރޕޯޓަށް ގެންގޮސްދިނުމުގެ އިންތިޒާމްތައް އިސްލާމިކް މިނިސްޓްރީ އާއި ސަރުކާރުގެ މުއައްސަސާތައް ގުޅިގެން ހަމަޖައްސައި ފައިވާކަން އިސްލާމިކް މިނިސްޓްރީއިން ވަނީ ހާމަކޮށްފައެވެ.

ޙައްޖަށް ވަޑައިގަންނަވާ ފަރާތްތަކަށް ޚާއްސަކޮށް ދަތުރުތައް ހަމަޖެހިފައިވާއިރު، މާލެއާއި ހުޅުމާލެ އަދި ވިލިމާލެއިން ފަސޭހަކަމާއެކު ދަތުރުކުރެވޭނެ އިންތިޒާމްވެސް ވަނީ ހަމަޖައްސާފައި ކަމަށް އެމިނިސްޓްރީ އިން ބުނެފައިވެއެވެ.

ޙައްޖާޖީންގެ ފުރުމުގެ ކަންކަން ފަސޭހަ ކޮށް ދިނުމަށް ކޮންމެ އަހަރަކުވެސް ސަރުކާރުން މަސައްކަތް ތަކެއް ކުރެއެވެ.