ބާރުގެ ބޭނުންކޮށް މުޒާހަރާތައް ހުއްޓުވަނީ ސަރުކާރުގެ އޯޑަކަށް، އިދިކޮޅުގެ އަޑު ކަނޑުވާލަން: އިދިކޮޅު

ޕްރޮގްރެސިވް ކޮންގްރެސް ކޯލިޝަންގެ ލީޑަރު އަދި އެ ކޯލިޝަންގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު މިނިވަންކުރުމަށް ގޮވާލާ މާލޭގައި ކުރިއަށް ގެންދާ ސުލްޙަވެރި މުޒާހަރާތައް ރޫޅާލުމަށް ފުލުހުން ބާރުގެ ބޭނުންކޮށް، ބައިވެރިންގެ މުދަލަށް ގެންލުން ދެމުންދާ ކަން ފާހަގަކޮށް އެކަން އިދިކޮޅު ކޯލިޝަނުން ކުށްވެރިކޮށްފި އެވެ.

އެކަން ކުށްވެރިކޮށް އިދިކޮޅު ކޯލިޝަނުން ނެރުނު ބަޔާނުގައި ބުނެފައިވަނީ ރައީސް ޔާމީން މިނިވަން ކުރުމަށް ގޮވާލާ ކުރިއަށް ގެންދާ ސުލްޙަވެރި އިހްތިޖާޖުގެ ތެރެއަށް ފުލުހުންވަދެ ވަރަށް އަނިޔާވެރި ކަމާއެކު ބާރުގެ ބޭނުންކޮށް އެތައް ބަޔަކު މިހާތަނަށް  ހައްޔަރުކޮށްފައިވާ ކަމަށެވެ. އަދި އިޖްތިޖާޖުގެ ބައިވެރިން އަޑު އުފުލުމަށް ބޭނުންކުރި މުދަލަށް ގެއްލުންދީ އޭގެތެރެއިން ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

ފުލުހުންގެ އެ ޢަމަލު މި ކޯލިޝަނުން ވަރަށް ހަރުކަށި ޢިބާރާތުން ކުށްވެރި ކުރާކަމަށް އިދިކޮޅުން ވަނީ ބުނެފަ އެވެ.

އިދިކޮޅު ކޯލިޝަންގެ ބަޔާނުގައި ބުނެފައި ވަނީ އެ ކޯލިޝަނުން ކުރިއަށް ގެންދާ ސުލްޙަވެރި އިހްތިޖާޖުތަކަކީ ކަމާބެހޭ ފަރާތްތަކުން ނަގަންޖެހޭ ހުއްދަތައް ނަގައިގެން ކުރިއަށް ގެންދާ ހަރަކާތްތަކެއް ކަމަށެވެ.

އެހެން ނަމަވެސް ފުލުހުންގެ ޤާނޫނާ ވެސް ޚިލާފަށް ސިޔާސީ ފަރާތްތަކުގެ އަމުރަށް މި އިހްތިޖާޖުތައް ހުއްޓުވާ ކޮންމެ ރެއަކުވެސް އެތައް ބަޔަކު ހައްޔަރުކޮށް އަނިޔާކުރަމުންދާކަމަށާއި، އެއީ އެ ކޯލިޝަނުން ނުހަނު ކަންބޮޑުވާ ކަމެއްކަމަށް އިދިކޮޅުގެ ބަޔާނުގައި ވަނީ ބުނެފައެވެ.

އިދިކޮޅުގެ މުޒާހަރާތައް ބާރުގެ ބޭނުންކޮށްގެން ހުއްޓުމަކީ ވާދަވެރިންގެ އަޑު ކަނޑުވާލާ ސިޔާސީ ހަރަކާތްތަކަށް ހުރަސްއެޅުމަށް ސަރުކާރުން އަންގައިގެން ކުރަމުންދާ ކަންކަމުގެ ގޮތުގައި އެ ކޯލިޝަނުން ވަނީ ސިފަކޮށްފަ އެވެ.

އަދި އެއީ ފުލުހުން ކުރަމުންދާ ޣައިރު ޤާނޫނީ އަމުރުގެ ތެރެއިން ހިންގާ ވަރަށް ދަށު ދަރަޖައިގެ ފިނޑި ޢަމަލުތަކެއްކަމަށް އިދިކޮޅު ކޯލިޝަނުން ވަނީ ބުނެފައެވެ.

އެކަން ކަން ފާހަގަކޮށް އިދިކޮޅުން ބުނީ މިކަންކަން ސީރިއަސް މައްސަލައެއްގެ ގޮތުގައި ބަލާ ތަޙްޤީޤުކުރުމަށް ކަމާބެހޭ މުއައްސަސާތަކަށް ގޮވާލާ ކަމަށެވެ. އަދި އިހްތިޖާޖުތައް ކުރިއަށްދާއިރު ހިއުމަންރައިޓްސް ކޮމިޝަނާއި ޓްރާންސްޕެރެންސީ މޯލްޑިވްސް ފަދަ މުއައްސަސާތަކުން ފުލުހުންގެ ޢަމަލުތައް މޮނިޓަރ ކުރުމަށްވެސް ގޮވާލާ ކަމަށެވެ.

އޭގެ އިތުރުން ސުލްހަވެރި ކަމާއެކު ކުރިއަށްދާ އިހްތިޖާޖުގެ ތެރެއިން ޤާނޫނާއި ޤަވައިދާ ޚިލާފަށް އެއްވެސް އިންޒާރެއް ދިނުމެއްނެތި މީހުން ހިފާ ހައްޔަރުކޮށް ހައްޔަރީންނަށް އަނިޔާ ނުކުރުމަށްވެސް އިދިކޮޅުން ވަނީ ފުލުހުންނަށް ގޮވާލާފަ އެވެ.