"މުޅި ހަޔާތް މި ދަނީ, ރަނގަޅު މީހަކާ ދިމައެއް ނުވޭ؛ އެހެންވީމާ ހޯދަންވީ ގޯސް ނުހެދޭނެ ނިޒާމެއް"

އެމަނިކުފާނުގެ ހަޔާތުގައިވެސް މިހާތަނަށް ރަނގަޅު އެއްވެސް މީހަކާ ދިމާ ނުވާ ކަމަށާ، އެހެން ކަމުން ރަނގަޅު މީހެއް ހޯދުމުގެ ބަދަލުގައި އޮންނަންވީ، ގޯސް މީހާއަށް ވެސް ނުބައެއް ނުހެދޭނެ ވަރުގެ ނިޒާމެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ގާނޫނު އަސާސީއަށް ގެންނަން ފެންނަ ބައެއް ނިޒާމީ ބަދަލުތަކާ ގުޅޭ ގޮތުން ދަ ޑިމޮކްރެޓްސްގެ މެންބަރުންނާ އެކު ރޭ ބޭއްވި ބައްދަލުވުމެއްގައި ވާހަކަދައްކަވަމުން ވިދާޅުވީ، ބައެއް ޕާޓީ ތަކުން، އެހެން ޕާޓީ ތަކުގައި ކެންޑިޑޭޓެއް ނެތް ވާހަކަ ދައްކަވާ ކަމަށެވެ. އެހެން ނަމަވެސް، އެމަނިކުފާނަށް ފެންނަ ފެނުމުގައި ކެންޑިޑޭޓަށްވުރެ މުހިންމީ ސިޔާސަތު ކަން ފާހަގަކުރައްވައި ވިދާޅުވީ ރަނގަޅު ސިޔާސަތެއް އެކުލަވާލެވިފައިވާ ޕާޓީއެއް ނެތް ކަމަށެވެ.

"އަޅުގަނޑަށް ފެންނަ ފެނުމުގައި ކެންޑިޑޭޓެއް ނޫން މުހިއްމީ. ސިޔާސަތު މުހިއްމީ. އަޅުގަނޑުމެން ކޮންމެ މީހަކު ލީމައި ވެސް ގޯސް މި ވަނީ. އަދި ރަނގަޅު މީހަކު ވަތް ކަމަކަށް ނުވޭ. އެހެންވީމާ އަޅުގަނޑުމެން މިއުޅެނީ ގޯސް މީހާއަށް ވެސް، ރަނގަޅު ކަމެއް ނޫން ކަމެއް ނުކުރެވޭނެ ނިޒާމެއް ތައްޔާރު ކުރަން. އަޅުގަނޑުގެ މުޅި ހަޔާތް މި ދަނީ މި ކަމުގައި. ރަނގަޅު މީހަކާ ދިމައެއް ނުވޭ. ވަރިހަމަ ގާތް ރަހުމަތްތެރިއަކަށް ވިޔަސް"
ރައީސް މުހައްމަދު ނަޝީދު

އެހެންވެ، މިހާރު "ރަނގަޅު މީހެއް" ހޯދަން މަސައްކަތް ނުކުރައްވާ ކަމަށާއި ބޭނުންފުޅު ވަނީ ރަނގަޅު ނިޒާމެއް ކަމަށް އެ މަނިކުފާނު ތަކުރާރުކޮށް ވިދާޅުވިއެވެ.

"އަޅުގަނޑަށް ފެންނަ ފެނުމުގައި އަޅުގަނޑެއް ނޫޅެން މިހާރު ރަނގަޅު މީހެއް ހޯދާކަށް. އަޅުގަނޑެއް ލަފައެއް ނުކުރަން ތިބުނާ ރަނގަޅު މީހާއާ ދިމާވާނެ ކަމަކަށް. އަޅުގަނޑަށް ފެންނަ ފެނުމުގައި ހުރިހާ ގައުމެއްގައިވެސް، ކޮންމެ މުޖުތަމައެއްގައި ވެސް ރަނގަޅު މި ވަނީ މީހާއެއް ނޫން. ރަނގަޅު ވަނީ ނިޒާމު،"
ރައީސް މުހައްމަދު ނަޝީދު

އޭގެ މިސާލެއް ދައްކަވަމުން އެ މަނިކުފާނު ވިދާޅުވީ އިނގިރޭސިވިލާތުގެ ކުރީގެ ބޮޑުވަޒީރު ބޮރިސް ޖޯންސަން އިސްތިއުފާ ދެއްވީ އޭނާގެ ރަނގަޅުކަމުން ނޫން ކަމަށެވެ. އެއީ، އެ ގައުމުގައި އެކަން އެހެން ނުކޮށް ވާން ނެތުމުން ކަމަށް ނަޝީދު ވިދާޅުވިއެވެ.

"ކިރިޔާވެސް ގަނޑެއް ގަނެފިއްޔާ، މި ކޮވިޑް އިރުގައި ގޭގައި ސަައިތައްޓެއް، ޕާޓީއެއް ބޭއްވީމާ އެ ވަކި ކުރީ. އަޅުގަނޑުމެން ކޮވިޑު އިރުގައި ނެތް، އެއްވެސް މީހަކު ގެއަކު ނޫޅޭ، އެނޫން ގޮތަކަށް އެކަންކަން ކުރެވެން ނެތީމާ ރަނގަޅަށް އެ ކަންތައްތައް އެ ހިނގަނީ"
ރައީސް މުހައްމަދު ނަޝީދު

އެހެންވެ، މި އަހަރުގެ ރިޔާސީ އިންތިޚާބަށް ނުކުންނައިރުގައި ކުރަންވީ ކަމަކީ "ކޮންކްރީޓް ތަރައްގީ" ގެނައުން ނޫން ކަމަށާއި އުޅެންވީ، ހެޔޮ ވެރިކަމުގެ ނިޒާމެއް ގާއިމް ކުރެވޭތޯ ކަމަށް އެ މަނިކުފާނު ވިދާޅުވިއެވެ.

ކޮމެންޓް ކުރޭ