ރައީސް ޔާމިނުގެ އިސްތިއުނާފު މި ހަފްތާއަށް ތާވަލުކޮށްފައި ނުވާތީ އިދިކޮޅުން ހައިކޯޓަށް!

ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ އާރަށު މުއާމަލާތާއި ގުޅިގެން އެމަނިކުފާނުގެ މައްޗަށް ކޮށްފައިވާ ޖަލު ހުކުމުގެ މައްސަލައިގެ އަޑުއެހުމެއް މި ހަފްތާއަށް ވެސް ތާވަލުކޮށްފައި ނުވާތީ އިދިކޮޅު ލީޑަރުން ހައިކޯޓަށް ވަޑައިގެންފި އެވެ.

އެ މައްސަލައިގެ އެންމެ ފަހުން އަޑުއެހުމެއް ބާއްވާފައިވަނީ މި މަހުގެ 5 ގައެވެ.

އެ މައްސަލައިގައި ރައީސް ޔާމިނުގެ ފަރާތްޕުޅުންނާއި، އާރަށު މުއާމަލާތާއި ގުޅިގެން ހުކުމްކޮށްފައިވާ ޔޫސުފު ނައީމުގެ ފަރާތްޕުޅުން ވަނީ ހައިކޯޓަށް އިސްތިއުނާފީ ނުކުތާތައް ހުށައަޅާފަ އެވެ. އަދި ދައުލަތުން ވަނީ އެ ނުކުތާތަކަށް ޖަވާބުވެސް ދީފައެވެ.

އެހެން ނަމަވެސް އަދި އެ މައްސަލައިގައި ދެފަރާތުން ދައްކަން ހުރި ވާހަކަތައް މުޅިން ނިމިފައެއް ނުވެއެވެ.

އެންމެ ފަހުން ބޭއްވި އަޑުއެހުމުގައި ހައިކޯޓުގެ ފަނޑިޔާރު ވިދާޅުވީ، އެ މައްސަލައާއި ގުޅިގެން ދެން އޮންނަ އަޑުއެހުމެއްގައި ދެ ފަރާތުގެ ވާހަކަތައް ފުރިހަމަ ކުރުމަށް ފުރުސަތު ދިނުމަށް ފަހު އަޑުއެހުންތައް ނިންމާލާނެ ކަމަށެވެ. އަދި އެއަށްފަހު ދެން އޮންނާނީ މައްސަލައިގައި ހުކުމް ކުރުމެވެ.

އެހެން ނަމަވެސް 5 ވަނަ ދުވަހުގެ އަޑުއެހުމައްފަހު މިހާތަނަށް އިތުރު އަޑުއެހުމެއް ބާއްވާފައި ނުވާއިރު، މި ހަފްތާއަށް ވެސް އަޑުއެހުމެއް ތާވަލުކޮށްފައެއް ނުވެއެވެ.

ރައީސް ޔާމިނުގެ އިސްތިއުނާފު މައްސަލަ ލަސްވަމުންދާތީއާއި، އެ މައްސަލައިގެ އަޑުއެހުމެއް ތާވަލުކޮށްފައި ނުވާތީ، އިދިކޮޅު ލީޑަރުން ހައިކޯޓަށް ވަޑައިގަތުމަށްފަހު މީޑިއާއަށް މައުލޫމާތު ދެއްވަމުން ވިދާޅުވީ ހައިކޯޓަށް އިތުބާރު ކުރި ނަމަވެސް، ސަރުކާރުން ކޯޓުތަކަށް ނުފޫޒު ފޯރުވާތީ ރައީސް ޔާމިނުގެ މައްސަލަ ގަސްދުގައި ލަސްކުރުވަނީކަމަށް ލަފާކުރެވޭކަމަށެވެ.

އިތުރު ތަފްސީލު ދެއްވަމުން އިދިކޮޅު ޕީއެންސީގެ ލީޑަރު އާދަމް ޝަރީފު އުމަރު ވިދާޅުވީ ރިޔާސީ އިންތިޚާބަށް ނަން ހުށައެޅުމުގެ ފުރުސަތު އިލެކްޝަންސް ކޮމިޝަނުން ހުޅުވާލުމަށް ބާކީ 12 ދުވަސް އޮތްއިރު ހައިކޯޓުން މައްސަލަ ތާވަލުނުކޮށް ލަސްކުރުމަކީ ރައީސް ޔާމިނުގެ އިންތިޚާބީ ހައްޤަށް ހުރަސްއެޅިގެންދާނެ ކަމެއް ކަމަށެވެ.

"ރާއްޖޭގައި މިހާރު މިއޮތް ސަރުކާރަކީ ވަރަށް ޚުދުމުހުތާރުކޮށް ކޮންމެ ކަމެއް ކުރާ، އަދި އިންތިޚާބަށް ނުފޫޒު ފޯރުވުމަށްޓަކައި ދައުލަތުެގ މުދާ އިންތިހާއަށް ބޭނުންކުރަމުންދާ ސަރުކާރެއް، ކުރަމުންދާއިރު އެކި ގޮތްގޮތުން ޖޭއެސްސީ މެދުވެރިކޮށް ވެސް އެކިކަހަލަ ނުފޫޒު ފޯރުވަމުންދާކަން ވެސް އަޅުގަނޑުމެންނަށް އެނގޭ"

އާދަމް ޝަރީފު އުމަރު

އިދިކޮޅުން ހައިކޯޓުގައި އޮތް ރައީސް ޔާމިނުގެ މައްސަލަ ލަސްކުރަމުންދަނީ ކަނޑައެޅިގެން ސަރުކާރުން ނުފޫޒު ފޯރުވައިގެންކަމަށް މީގެ ކުރިންވެސް ތުހުމަތުތައް ކޮށްފަ އެވެ.

ރައީސް ޔާމިނުގެ ފަރާތްޕުޅުން ހައިކޯޓުގައި މައްސަލަ އިސްތިއުނާފު ކުރުމަށްފަހު ވެސް އަޑުއެހުންތައް ނުފަށާ ދިގުލައިގެންދާތީ އިދިކޮޅުން މީގެ ކުރިންވެސް އެތައް ފަހަރެއްގެ މަތިން ހައިކޯޓަށް އައިސް އެ މައްސަލަ ފަށައިދިނުމަށް ދަންނަވާފައި ވެއެވެ.

ރައީސް ޔާމިނު ވެސް ވަނީ އެމަނިކުފާނުގެ އިސްތިއުނާފު އަވަސްކޮށްދެއްވުމަށް އެދިވަޑައިގެންފަ އެވެ. އަދި އިސްތިއުނާފު މައްސަލަތަކީ އާންމު އުސޫލެއްގެ ގޮތުން ވަރަށް އަވަހަށް ނިންމަން ވެސް ޖެހޭ މައްސަލަތަކެއްގެ ގޮތުގައި ރައީސް ޔާމިނުގެ ފަރާތްޕުޅުން ވަނީ ފާހަގަކުރައްވާފަ އެވެ.