10 އަހަރު ޕީޕީއެމަށް ކުރި ޚިދުމަތުގެ ބަދަލުގައި ތިޔަ ދެއްވި އިނާމަށް ޝުކުރިއްޔާ: ޑރ ޝަހީމު

2013 އިން ފެށިގެން 2023 އަށް މެދުކެނޑުމެއް ނެތި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަށް ކޮށްދެއްވި ޚިދުމަތުގެ ބަދަލުގައި ލިބިލެއްވި އިނާމަށް ޝުކުރުދަންނަވާކަމަށް ޕްރޮގްރެސިވް ކޮންގްރެސް ކޯލިޝަންގެ އެޑްވައިޒަރު އަދި 2018 ވަނަ އަހަރުގެ ރިޔާސީ އިންތިޚާބުގައި ރައީސް ޔާމިނުގެ ރަނިންމޭޓު ޑރ މުޙައްމަދު ޝަހީމު އަލީ ސަޢީދު ވިދާޅުވެއްޖެ އެވެ.

ޑރ ޝަހީމު މިފަދައިން ވިދާޅުވެފައި ވަނީ އެމަނިކުފާނު ސަރުކާރާއި ގުޅިވަޑައިގަންނަވަނީ ތޯ ޕީޕީއެމް-ޕީއެންސީ ކޯލިޝަންގެ ޖޮއިންޓު ސެނެޓު ގުރޫޕުގައި މުއާޒު ކުރައްވާފައިވާ ސުވާލަކަށް ޖަވާބުދެއްވަމުން ނެވެ.

ޑރ ޝަހީމަކީ 2013 ވަނަ އަހަރުގެ ރިޔާސީ އިންތިޚާބުން ފެށިގެން ރައީސް ޔާމިނުގެ އަރިހުގައި އަދި ޕީޕީއެމްގެ އެކި މަސައްކަތްތަކުގައި އިސް ދައުރެއް އަދާކުރައްވާފައިވާ ފަރާތެކެވެ. އަދި މިހާރުވެސް އިދިކޮޅު ކޯލިޝަންގެ އެޑްވައިޒަރެއްގެ ގޮތުގައި ހުންނެވި ބޭފުޅެކެވެ. އަދި ޕީޕީއެމުން މާޒީގައި ކޮށްފައިވާ މުހިންމު ސިޔާސީ މަސައްކަތްތަކުގެ ތެރެއިން ހޯދި ބޮޑެތި ކާމިޔާތަކުގެ ހިއްސާދާރެކެވެ.

އެހެންކަމުން އަނެއްކާވެސް ރިޔާސީ އިންތިޚާބެއް ބޯމަތިވެފައިވާއިރު، ޕީޕީއެމްގެ ރައީސް ޖަލުހުކުމެއް ތަންފީޒުކުރައްވަން ޖެހިވަޑައިގެންފައިވާ މި ދަނޑިވަޅުގައި ޕާޓީ ބައިކުރުމަށް ތަފާތު ވާހަކަތައް ފަތުރާނެކަމަށާއި، އެކަމަށް ސަމާލުވުމަށް އިދިކޮޅު ލީޑަޝިޕުން ދަންނަވާފައިވަނިކޮށް ސެނެޓު ގުރޫޕުގައި ޑރ ޝަހީމުގެ އިޚްލާސްތެރިކަމާއި މެދު ސުވާލު އުފެދޭ މޭރުމުން މެމްބަރުން ސުވާލު ކުރެއްވުމާއި ގުޅިގެން އެމަނިކުފާނު ވެސް ވަނީ އެއީ ޚިދުމަތުގެ އަގުކަމަށް ސިފަކުރައްވާ ޝުކުރު އަދާކުރައްވާފަ އެވެ.

"ސިޔާސީ ހަޔާތުގައި ވޭތިވެދިޔަ 20 އަހަރުގެ ތެރެއިން 2013 އިން 2023، ދިހަ އަހަރު ޕީޕީއެމްއަށް ކުރި ޚިދުމަތަށް ތިޔަ ދެއްވި އިނާމަށް ޝުކުރު ދަންނަވަން"

ޑރ ޝަހީމު

ޑރ ޝަހީމު ސަރުކާރާއި ގުޅިވަޑައިގަންނަވަން ނިންމާފައިވާކަމަށް ދެކެވޭ ވާހަކަތަށް ޕީޕީއެމުން ވަނީ ދޮގުކޮށްފަ އެވެ.

އެގޮތުން ޕީޕީއެމްގެ ސެކެޓްރީ ޖެނެރަލް ތަލާލު ވިދާޅުވީ ޑރ ޝަހީމު ހުންނެވީ ޕީޕީއެމާއެކު ގަދަކޮށް ކަމަށެވެ. އަދި އެމަނިކުފާނަކީ ޕީޕީއެމްގެ ގައުމީ ލަޝްކަރުގެ މުހިންމު ބައިވެރިއެއް ކަމަށެވެ.

މި ދުވަސްވަރަކީ ޕީޕީއެމް ބައިކުރުމަށް ސަރުކާރުގެ ތެރެއިންނާއި ބޭރުން ގިނަ މަސައްކަތްތަކެއް ކުރަމުންދާ ދުވަސްވަރަކަށް ވާތީ އެކަމަށް ސަމާލުވުމަށް ތަލާލު ވެސް ވަނީ އެދިވަޑައިގެންފަ އެވެ. އަދި ޕާޓީ ރޫޅިގެން ދާނެފަދަ ކަންކަން ނުކުރެއްވުމަށް އޭނާ ވަނީ އިލްތިމާސް ކޮށްފަ އެވެ.