އަނބި މީހާއަށް އަނިޔާ ކުރުމުން 23،700؛ ވެލާ ފެޅުމުން 198،000 ގެ ޖޫރިމަނާއެއް!

އަނބިމީހާއަށް ގެވެށި އަނިޔާ ކުރި މީހަކު ޖުމްލަ 23،700 ރުފިޔާ އިން ޖޫރިމަނާ ކުރުމަށް ކަނޑައަޅާފައިވާއިރު ވެލާ ފެޅުމުގައި ބައިވެރިވި 7 މީހުންގެ ތެރެއިން ކޮންމެ މީހެއްގެ މައްޗަށް 198،000 ރުފިޔާ އިން ވަނީ ޖޫރިމަނާ ކޮށްފައެވެ.

ރ.މަޑުއްވަރި، ސަޢީދާ މަންޒިލްގެ އަޙްމަދު އިސާމް އަށް މިމަހުގެ 2 ވަނަ ދުވަހު ވަނީ އަނިޔާއެއް ދިނުމުގެ ކުށުގެ ދަޢުވާއެއް އުފުލުމުން އެ ދަޢުވާއަށް އިއުތިރާފްވެފައެވެ.

މި މައްސަލާގައި ކްރިމިނަލް ކޯޓްއިން ނިންމާފައިވަނީ 01 މަހާއި 24 ދުވަހުގެ ޖަލު އަދަބުގެ ބަދަލުގައި 10800 ރުފިޔާ އިން ޖޫރިމަނާކުރުމަށެވެ.

މިއަށްފަހު ހަމަ މިމަހުގެ 9 ވަނަ ދުވަހު ވަނީ އިސާމްގެ މައްޗަށް 3 ޝަރީއަތެއް ހިންގައި 3 ދައުވާއެއް އުފުލާފައެވެ.

އެގޮތުން އަނިޔާއެއް ދިނުމުގެ ދައުވާއަށް އިސާމް އިޢުތިރާފްވުމުން ކްރިމިނަލް ކޯޓްއިން ވަނީ 27 ދުވަހުގެ ޖަލު އަދަބުގެ ބަދަލުގައި 5400 ރުފިޔާ އިން އިސާމް ޖޫރިމަނާކޮށްފައެވެ.

އަދި ގެވެށި އަނިޔާ ހުއްޓުވުމުގެ ގާނޫނާއި ޚިލާފުވުމުގެ ދެ ދައުވާ އެއް އުޝާމްގެ މައްޗަށް އުފުލުމުން އިސާމް ވަނީ ދެ ދައުވާއަށް ވެސް އިއުތިރާފް ވެފައެވެ.

މީގެ ތެރެއިން އެއް ދައުވާއަށް ކޯޓުން ނިންމީ 5000 ރުފިޔާ އިން ޖޫރިމަނާކުރުމަށެވެ. ދެވަނަ ދައުވާއަށް ކޯޓުން ނިންމީ އިސާމް 2500 ރުފިޔާއިން ޖޫރިމަނާކުރުމަށެވެ.

މި 4 ދައުވާގެ ޖުމްލަ އަދަދަކީ 23،700 ރުފިޔާއެވެ.

މުޖުތަމަޢުގެ އަޚްލާޤީ އުޞޫލުތައް ހިފެހެއްޓުމުގެ ގޮތުން މި ރިޕޯޓް ކޯޓުގެ ވެބްސައިޓަށް އަޕްލޯޑް ކުރެވިފައެއް ނުވެއެވެ.

މިމައްސަލަތަކާއި ބ. އަތޮޅުގައި އޮންނަ ފަޅުރަށެއް ކަމަށްވާ ކެޔޮދޫގައި ވެލާތަކެއް ފަޅައި، ކެއްކުމުގައި ބައިވެރިވި، އެ އަތޮޅުގެ ކެންދޫގެ ހަތް މީހަކު އީޕީއޭއީން 198،000 ރުފިޔާ އިން ޖޫރިމަނާކުރި ހާދިސާއަށް އަޅާބަލައިލާއިރު 174،300 ރުފިޔާގެ ތަފާތެއް އެބަ ހުރެއެވެ.

ވެލާއަކީ ނެތިގެންދާ ބާވަތުގެ މޫދު ޖަނަވާރެއް ކަމުން ރާއްޖޭގެ ތިމާވެށި ރައްކާކޮށް ދެމެހެއްޓުމާ ބެހޭ ގާނޫނުގެ ދަށުން އޭޕްރީލް 4، 2016 އިން ފެށިގެން ވެލަ އާއި ކަހަނބުގެ ހުރިހާ ބާވަތެއް ހިމާޔަތްކޮށް އެ ހިފުމާއި އެއަށް ގޯނާކުރުމަކީ މަނާކަމެކެވެ.

ހަމަ އެފަދައިން ގެވެށި އަނިޔާއާއި އެހެންމީހަކަށް އަނިޔާ ދިނުމާއި ދެކޮޅަށް ގާނޫނުތައް ހަދާފައިއޮވެއެވެ. މުޖްތަމައުގައި ގެވެށި އަނިޔާގެ ޝިކާރައަށް ވެގެންދާ މީހުންގެ އަދަދު އެހާ ގިނައެވެ. މީގައި ކުޑަ ކުދިންވެސް އެކުލެވެއެވެ.

މިއީ ޤާނޫނުތަކުގެ ބަލިކަށިކަން ހާމަވާ ދެ މައްސަލަކަމުން މަޖިލިސް މެދުވެރިކޮށް މިފަދަ ކަންކަމަށް އަވަސް ހައްލެއް ގެންނަންޖެހެއެވެ. ގިނަ ޖަލްސާތައް މަސައްކަތެއް ނެތި ހުއްޓާލާފައިވާއިރު، މިކަންކަމަށް ބާރުއަޅައި ރާއްޖޭގެ މަދަނީ ޖަމިއްޔާތަކުން މިހާތަނަށް އެދެވޭ މަސައްކަތްތަކެއްކޮށްފައިނުވާކަންވެސް ފާހަގަކުރަން ޖެހެއެވެ.

މިފަދަ ކަންކަމަކީ އެފަރާތަތްކަށް ޖިސްމާނީ ގޮތުންނާއި ނަފްސާނީ ގޮތުން އަސަރު ކުރާ ކަންކަމަށް ވާއިރު މިހާ ކުޑަ ނިސްބަތަކުން ކުށުގެ އަދަބު ކަނޑައެޅުމަކީ އެބޭފުޅުންނަށް އިންސާފު ހޯދައި ދެވުންތޯ ސުވާލު އުފެދެއެވެ.