އަދީބު ފުރުވާލަނީ ދޮގުހެކި ދިނުމަށް ހަވާލުކުރި ވަޒީފާ އަދާކުރުމުން: ޑރ ޖަމީލު

އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ ކުރީގެ ނައިބު ރައީސް އަހުމަދު އަދީބަށް ރާއްޖެއިން ބޭރަށް ދާން ސަރުކާރުން ހުއްދަދިނީ ސަރުކާރުން ބުނާގޮތަށް ދޮގުހެކި ބަސް ދިނުމަށް ހަވާލުކުރި ވަޒީފާ އަދާކޮށް ނިމުމުން ކަމަށް ރައީސް ޔާމިނުގެ އިސް ގާނޫނީ ވަކީލު ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ.

ޑރ ޖަމީލު މިފަދައިން ވިދާޅުވެފައިވަނީ ބޭސް ފަރުވާއަށް ރާއްޖެއިން ބޭރަށް ފުރައިގެން ދިއުމުގެ ހުއްދަ މޯލްޑިވްސް ކަރެކްޝަނަލް ސާވިސްއިން އަދީބަށް ދިނުމާއި ގުޅިގެން ކުރެއްވި ޓްވީޓެއްގަ އެވެ.

އެގޮތުން ޑރ ޖަމީލު ވިދާޅުވީ އެމްއެމްޕީއާރުސީގެ ޚިޔާނާތުގެ ކުށް އަމިއްލަ އިއުތިރާފުން ސާބިތުވުމުން ވެސް އަދީބުގެ މައްޗަށް ކުރި ޖަލުހުކުމް އޭނާ ތަންފީޒުކޮށްފައި ވަނީ ގޭގައި ކަމަށެވެ. އަދި އެ ޚިޔާނާތުގެ ތެރެއިން ދައުލަތަށް ގެއްލުނު ފައިސާގެ ތެރެއިން މިހާތަނަށް އެންމެ ފައިސާ ފޮއްޗެއް ވެސް ހޯދިފައި ނުވާކަމަށެވެ.

ސަރުކާރުން އަންގާ ގޮތަކަށް، އަންގާ މީހަކާއި ދޮގިހެކި ދިނުމަކީ އަދީބުގެ ވަޒީފާ ކަމަށާއި، އަދީބު ފުރުވާލަން ހުއްދަ ދިނީ އެ ވަޒީފާ އަދާކޮށް އޭނާ ނިންމުމުންކަމަށް ޑރ ޖަމީލު ވިދާޅުވި އެވެ.

ޑރ ޖަމީލު މިފަދައިން ވިދާޅުވެފައިވާއިރު، އަދީބު ރާއްޖެއިން ބޭރަށް ފުރުވާލުމަށް ހުއްދަދީފައިވާ މި ދަނޑިވަޅާއި ރިޔާސީ އިންތިޚާބު ބޯމަތިވެފައިވާ ދަނޑިވަޅެއް ކަމަށްވެފައި، ސަރުކާރުގެ ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމާއި ދެކޮޅަށް ދައުލަތުން ރ ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ އުފުލި ދައުވާ ސާބިތުކޮށްދިނުމަށް އަދީބުގެ ހެކިބަސް ދީފައިވާ ވަގުތާއިވެސް އިއްތިފާގުވާ ވަގުތެކެވެ.

އެ ސަބަބާއި ހުރެ އަދީބު ފުރުވާލުމަކީ ސަރުކާރުން ހަދާފައިވާ ޑީލެއް ކަމަށާއި، އެ ޑީލު ހެދީ ރައީސް ޔާމިނާއި ދެކޮޅަށް ހެކިބަސް ދިނުމުގެ ބަދަލެއްގެ ގޮތުންކަމަށް އިދިކޮޅުން ދަނީ ތުހުމަތު ކުރަމުންނެވެ.

ފުއްގިރި މައްސަލައިގައި ދައުލަތުން ފާހަގަކޮށްފައިވާ ކަންކަމަށް ބަލާއިރު، އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުالله ޒިޔަތުގެ ހެކިބަސް ނޫން އިތުރު ކާފީ ހެއްކެއް ނެތްކަމަށް ދައުލަތުން ވަނީ ކޯޓުގައި ބުނެފަ އެވެ.

އެހެންކަމުން މިހާލަތުގައި އަދީބުގެ ހެކިބަހާއި ނުލާ އެ މައްސަލަ ކުރިއަށް ނުގެންދެވޭނެތީ، އަދީބު ފުރުވާކަން ހުއްދަދިނުމަށް ދައުލަތަށް މަޖުބޫރުވެފައިވާކަމަށް ވެސް އިދިކޮޅުން ވަނީ މީގެ ކުރިން ތުހުމަތުކޮށްފަ އެވެ.