މިއަދުގެ ސަރުކާރުގެ މިސްރާބު މިހުރީ ހުރިހާ ބާރުވެރިކަމެއް ލިބުމުން ވަޢުދުވި ގޮތަށްތޯ؟: ޤާސިމް

މިއަދުގެ ސަރުކާރުގެ މިސްރާބު މިހުރީ، އިންސާފުގެ މަޤު ހޯދުމަށް ކުރި ދަތުރުގަައި، ހުރިހާ ބާރުވެރިކަމެއް ލިބުމުން އެ ވަޢުދުވި ގޮތަށްތޯ ރައްޔިތުން މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީ (ޖޭޕޭ) ގެ ލީޑަރު ޤާސިމް އިބްރާހިމް ސުވާލުކުރައްވާފިއެވެ.

ޤާސިމް މިފަދައިން ސުވާލުކޮށްފައިވަނީ މިއަދު ޕީޕީއެމް ޕީއެންސީ ކޯލިޝަންގެ މެމްބަރުންތަކަކާއި ބައްދަލުކުރެއްވުމަށްފަހު މިރޭ ކުރެއްވި ޓްވީޓެއްގައެވެ.

އެގޮތުން ޤާސިމް ވިދާޅުވީ ޤާނޫނު އަސާސީ ވުޖޫދަށް އައުމުގެ އެއް މަޤްސަދަކީ މިނިވަންކަމާއި، އިންސާފުވެރިކަމާއެކު، ޢަދުލު އިންޞާފު ޤާއިމުކޮށް ރައްޔިތުންގެ އަސާސީ ހައްްޤުތަކާއި މިނިވަންކަން ކަށަވަރު ކުރުން ކަމަށެވެ.

އެހެން ކަމުން ކޮންމެ ދިވެހި ރައްޔިތަކަށްވެސް އިސްވެ މިދެންނެވި ހައްޤުތަައް ފުރިހަމައަށް ލިބެން ޖެހޭނެ ކަމަށް ޤާސިމް ފާހަގަކުރެއްވިއެވެ.

އެގޮތުން އިދިކޮޅު ކޯލިޝަންގެ ލީޑަރު އަބްދުﷲ ޔާމީން އަބްދުލްގައްޔޫމް ކަމުގައި ވިޔަސް ނުވަތަ އެހެން ދިވެހި ރައްޔިތެއްކަމުގައި ވިއަސް އިންސާފުވެރި ޝަރީއަތެއް ލިބުމަކީ މިއަދު ޤާނޫން އަސާސީއިން ލިބިދޭ އަސާސީ ހައްޤެއް ކަމަށް ޤާސިމް ވިދާޅުވިއެވެ.

އަދި މިއީ އިންސާނީ ހައްްޤެއް ކަމަށް ވެސް ޤާސިމް ވަނީ ފާހަގަކުރައްވާފައެވެ.

މިއާއިއެކު ލަސްވުމެއް ފަސްވުމެއް ނެތި ޢަދުލު ވެރިކަމާ، ހަމަ ހަމަކަމާއެކު، އިންސާފު މި ޤައުމުގައި ޤާއިމް ކުރެވެން ވާނެ ކަމަށް ޤާސިމް ވިދާޅުވިއެވެ.

އެހެންކަމުން މިއަދު އުފެދޭ ސުވާލަކީ، މިއަދުގެ ސަރުކާރުގެ މިސްރާބު މިހުރީ، އިންސާފުގެ މަގު ހޯދުމަށް ކުރި ދަތުރުގަައި، ހުރިހާ ބާރުވެރިކަމެއް ލިބުމުން އެ ވަޢުދުވި ގޮތަށްތޯ ކަމަށް ޤާސިމް ވިދާޅުވިއެވެ.

ޖޭޕީއަކީ ސަރުކާރުގެ ކޯލިޝަންގެ ބައިވެރިއެއް ނަމަވެސް މިހާރު އަންނަނީ ސަރުކާރާއި ދެކޮޅަށް ހަރަކާތް ތެރިވަމުންނެވެ. އެގޮތުން އެ ޕާޓީއިން ވަނީ އެޕާޓީގެ ލީޑަރު ރިޔާސީ ކެނޑިޑޭޓްގެ ގޮތުގައި އިންތިޚާބުކޮށް ކެމްޕެއިންގެ ހަރަކާތްތައްވެސް ފަށާފައެވެ.

މިއާއިއެކު ސަރުކާރާއި ދެކޮޅަށް ކޮންމެ ރެއަކުންހެން އަޑުއުފުލާ ހަދާ އިދިކޮޅު ކޯލިޝަންއާއިއެކު މިއަދު އޮތް ބައްދަލުވުމުގައި ޖޭޕީގެ ފަރާތުން ޤާސިމްގެ އިތުރުން އޭނާގެ ސްޕެޝަލް އެޑްވައިޒަރ އަހްމަދު ނިހާން ހަސަން މަނިކުވެސް ބައިވެރިވެ ވަޑައިގަތެވެ.

އިދކޮޅު ކޯލިޝަންގެ ފަރާތުން މި ބައްދަލުވުމުގައި ބައިވެރިވެފައިވަނީ އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله، ރައްޔިތުން މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް، މަހިބަދޫ ދާއިރާގެ މެންބަރު އަހުމަދު ޠާރިގު، އަދި ފަރެސްމާތޮޑާ ދާއިރާގެ މެމްބަރު ޙުސައިން މުހައްމަދު ލަޠީފްއެވެ.

މިކަމާއި ގުޅިގެން އަބްދުއްރަހީމް ކުރައްވާފައިވާ ޓްވީޓުގައި ބުނެފައިވަނީ މި ބައްދަލުވުމަކީ ގައުމުގައި ހުރި ބޮޑެތި މައްސަލަތަކާ ގުޅޭގޮތުން ރައީސް ޔާމީންގެ ލަފާފުޅާ އިރުޝާދުގެ މަތިން ކުރިއަށް ގެންދެވުނު މުހިންމު ބައްދަލުވުމެއް ކަމަށެވެ.