ދެކުނުގެ އަތޮޅުތަކުގައި 17 ގޭންގެއް ހަރަކާތްތެރިވާ ކަަމަށް ފުލުހުން ބުނެފި

ދެކުނުގެ އަތޮޅުތަކަށް ނިސްބަތްވާ 31 ގޭންގު ގުރޫޕެއް އެބައޮތް ކަމަށާއި އޭގެ ތެރެއިން 17 ގޭންގު ގުރޫޕެއް މިވަގުތު ހަރަކާތްތެރިވަމުންދާ ކަމަށް ފުލުހުން ބުނެފިއެވެ.

ފުލުހުން މިހެން ބުނެފައިވަނީ ދެކުނުގެ އަތޮޅު ތަކާއި ރަށްތަކުގެ ވެރިންނާއި ސަރުކާރުގެ ވެރިންނާއި އިދާރާތަކުން ބައިވެރިވެގެން މިހާރު ލ. ގަމުގައި ކުރިއަށް ގެންދާ  "ވިއަވަތި ރާއްޖެ" ކޮންފަރެންސްގައި ފުލުހުން ހުށަހެޅި ޕްރެޒެންޓޭޝަނެއްގައެވެ.

"އަމާން މުޖުތަމައު" ގެ ނަމުގައި ފުލުހުން ހުށަހަޅައިދިން މި ޕްރެޒެންޓޭޝަނުގައި ބުނެފައިވާގޮތުން ރާއްޖޭގެ ގޭންގުތަކުގައި ހަރަކާތްތެރިވާ ފަރާތްތަކުގެ ތެރެއިން ދެކުނުގެ އަތޮޅުތަކަށް ނިސްބަތްވާ 1506 މީހުން ތިބި ކަމަށެވެ. އޭގެ ތެރެއިން 901 މީހުން މާލޭގައި ހަރަކާތްތެރިވާއިރު ސީދާ ދެކުނުގެ ރަށްރަށުގައި 605 މީހުން ދަނީ ގޭންގު މެންބަރުންގެ ގޮތުގައި ހަރަކާތްތެރިވަމުންނެވެ.

އަދި ގޭންގު ތަކުގައި އިސްކޮށް 700 އެއްހާ މީހުން ހަރަކާތްތެރިވާއިރު، 100 ކުޑަކުދިންވެސް ގޭންގުތަކުގެ ހަރަކާތްތަކުގައި ބައިވެރިވާ ކަމަށް ފުލުހުން ވަނީ ބުނެފައެވެ.

ފުލުހުންގެ ޕްރެޒެންޓޭޝަނުން އިނގިފައިވާ ގޮތުގައި 2007ވަނަ އަހަރުން ފެށިގެން ގޭންގު މާރާމާރިއާ ގުޅިގެން 32 މީހަކު މަރާލާފައިވާއިރު އޭގެ ތެރޭގައި ދެކުނަށް ނިސްބަތްވާ 6 މީހުން ހިމެނެއެވެ. އަދި މަރުތަކާއި އެފަދަ މާރާމާރީތަކާއި ގުޅޭ މީހުންގެ ތެރެއިން 185 މީހުންނަކީ ދެކުނުގެ އަތޮޅުތަކަށް ނިސްބަތްވާ މީހުންނެވެ. އަދި މީގެ ތެރޭގައި 21 ކުޑަކުދިންވެސް މިފަދަ މައްސަލަތަކުގައި ހިމެނެއެވެ.

ގޭންގުތަކުން ރާވައިގެން ހިންގާފައިވާ ކަންކަމާއި ގުޅިގެން ފާއިތުވި ދެ އަހަރުދުވަހުގެ 1180 މީހަކު ވަނީ ހައްޔަރުކޮށްފައެވެ. މީގެ ތެރެއިން 5 ފަހަރަށްވުރެ ގިނަ ފަހަރު ހައްޔަރުކުރި މީހުންވެސް ހިމެނެއެވެ. މިގޮތުން 792 މީހަކު މިފަދަ މައްސަލަތަކާ ގުޅިގެން 1 ފަހަރު ހައްޔަރުކޮށްފައިވެއެވެ. އަދި 47 މީހަކު ވަނީ ފާއިތުވި ދެއހަރު ދުވަހުގެ ތެރޭގައި 5 ފަހަރަށްވުރެ ގިނަ ފަހަރު ހައްޔަރުކޮށްފައެވެ. މީގެ އިތުރުން 341 މީހުންނަކީ 2 ފަހަރާއި 4 ފަހަރު ހައްޔަރުކޮށްފައިވެއެވެ.

ފުލުހުން މިއަދު ހާމަކުރި އަދަދުތަކުން ދައްކާ ގޮތުގައި ދެކުނު އަތޮޅު ތަކުގެ ތެރެއިން ގޭންގުތަކާއި، މާރާމާރީތައް އަދި ހައްޔަރުކުރެވުނު މީހުންގެ އަދަދުވެސް އެންމެ ގިނައީ އައްޑޫ ސިޓީގައެވެ.