ނަފްސާނީ ބަލި އޮތް މިންވަރު ދެނެގަތުމަށްޓަކައި ޤައުމީ ފެންވަރުގެ ދިރާސާއެއް ކުރަނީ
ނަފްސާނީ ބަލި ރާއްޖޭގައި އޮތް މިންވަރު ދެނެގަތުމަށްޓަކައި ޤައުމީ ފެންވަރުގެ ދިރާސާއެއް ހެދުމަށް ނިންމާފައިވާ ކަމަށް މިނިސްޓްރީ އޮފް ހެލްތުން ހާމަކޮށްފިއެވެ.
ރޭ "ޕީއެސްއެމް" އިން ގެނެސްދިން "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން، ޑެޕިއުޓީ މިނިސްޓަރ އޮފް ހެލްތް މިނިސްޓްރީ ސަފިއްޔާ މުޙައްމަދު ސައީދު ވިދާޅުވީ ރާއްޖޭގައި މި ބަލި އޮތް މިންވަރު ދެނެގަތުމަކީ ވަރަށް މުހިއްމުކަމެއްކަމަށެވެ. މިގޮތުން ނަފްސާނީ ބަލި ރާއްޖޭގައި އޮތް މިންވަރު ދެނެގަތުމަށްޓަކައި ޤައުމީ ފެންވަރުގެ ދިރާސާއެއް ހެދުމަށްޓަކައި މިހާރު ތައްޔާރުވަމުން އަންނަކަމަށާއި، އެކަން ކުރުމަށްބޭނުންވާ ފައިސާ ހަމަޖެހުމުން، އަންނަ އަހަރުގެ ތެރޭގައި ދިރާސާ ކުރުމުގެ މަސައްކަތްތައް ފަށައިގަންނާނެކަމަށެވެ.
"އައިޖީއެމްއެޗްގައި ހުރި ސެންޓަރުންވެސް އެތައްބަޔަކު ޚިދުމަތް އެބަހޯދާ. ދިރާސާއެއް އެބަ ހަދަން ޖެހޭ. ދިރާސާ ހަދައިގެން ލިބޭ މަޢުލޫމާތުގެ އަލީގައި ޚިދުމަތްތައް މިއަށްވުރެ ފުޅާކުރުމަށް އެބަ ބޭނުންވޭ." ސަފިއްޔާ މުޙައްމަދު ސައީދު ވިދާޅުވިއެވެ.
މި ދިރާސާގައި ރާއްޖޭގައި ބަލި އޮތް މިންވަރުގެ މަޢުލޫމާތުތަކާއި ނަފްސާނީ ބަލީގެ ގޮތުގައި ފާހަގަކުރެވޭ ކަންތައްތަކުގެ މަޢުލޫމާތުތައް އެއްކޮށް، ނަފްސާނީ ބަލި ތަޙައްމަލު ކުރާ މީހުން އެންމެ ގިނައިން ތިބި ސަރަޙައްދުވެސް ދެނެގަންނާނެ ކަމަށް އޭނާ ވިދާޅުވިއެވެ. އެއާއެކު ބޮޑަށް ޚިދުމަތްތައް ފުޅާ ކުރަންވީ ސަރަޙައްދުތައް އެނގި އިތުރު ކުރަންޖެހޭ ވަޞީލަތްތައް މި ދިރާސާގެ އެހީގައި އެނގިގެންދާނެކަމަށްވެސް އޭނާ ފާހަގަކުރެއްވިއެވެ.
ދިވެހިރާއްޖޭގައި ނަފްސާނީ ބަލިތަކަށް ފަރުވާ ކުރަމުންދާ މީހުން ދުވަހުން ދުވަހަށް އިތުރުވަމުން އަންނައިރު، އެފަދަ ފަރާތްތަކަށް ފަރުވާ ކުރުމަށް ރާއްޖޭގައި ފުރަތަމަ ފަހަރަށް މެންޓަލް ހެލްތު ސެންޓަރ އެއް ވަނީ 2019 ވަނަ އަހަރު އައިޖީއެމްއެޗް ގައި ގާއިމްކޮށްފައެވެ. އަދި 2019 ވަނަ އަހަރުން ފެށިގެން މި އަހަރުގެ ނޮވެމްބަރު ގެ ނިޔަލަށް އެ ސެންޓަރުން ވަނީ 55،608 މީހުންނަށް ހިދުމަތް ދީފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
