‪އެޗްއާރްސީއެމް ނިދިން ހޭލަން ވެއްޖެ ނޫންތޯ؟: ޑރ.ޖަމީލް

ދިވެހިރާއްޖޭގެ އިންސާނީ ހައްގުތަކަށް ވަކާލާތުކުރާ، ހިޔުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) ނިދިން ހޭލަން ވެއްޖެ ކަމަށް ކުރީގެ ނާއިބު ރައީސް އަދި ގާނޫނީ ވަކީލު ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.

ޖަމީލް މިފަދައިން ވިދާޅުވީ، މި ސަރުކާރުން މަސްވެރިންނަށް ވެފައިވާ ވައުދުތައް ފުއްދަމުން ނުދާ ކަމަށްބުނެ، މަސްވެރިންގެ ހައްގުގައި އަޑު އުފުލުމަށް އިދިކޮޅު ޕީޕީއެމް/ޕީއެންސީން މަސްމާރުކޭޓު ސަރަހައްދަށް އެއްވެ އިއްޔެ ކުރި އިހްތިޖާޖުގެ ތެރެއިން މީހުން ހައްޔަރު ކުރި ފޮޓޯ އަކާއި، ހިޔުމަން ރައިޓްސް ކޮމިޝަން އޮފް މޯލްޑިވްސް ގެ މަސްއޫލިއްޔަތުތައް ގާނޫނުން އަންގައިދޭ ލިޔުމެއްގެ ފޮޓޯއެއްގެ އިތުރުން ފުލުހުންގެ މަސައްކަތް ކަމަށް ގާނޫނުގައި އަންގާފައިވާ ކަންކަން ހާމަވާ ލިޔުމެއްގެ ފޮޓޯއަކާއި އެކު ކުރެެއްވި ޓްވީޓެއްގައެވެ. 
ޖަމީލު ވިދާޅުވީ، ދިވެހި ރައްޔިތުންނަށް ޤާނޫނު އަސާސީން ލިބިދޭ އެއްވެއުޅުމުގެ ޙައްޤަކީ މިހާރު ޖިނާއީ ކުށެއް ކަމަށް ‎ފުލުހުން ދެކެންފަށައިފި ކަމަށާ ފާޅުކަންބޮޑުކޮށް ފުލުހުން ޤާނޫނާ ޚިލާފް ވާން ފަށައިފިކަމަށެވެ.

"އެޗްއާރުސީއެމް އިން ނިދިން ހޭލައި އަސާސީ ޙައްޤު ޗިސްޗިސް ކުރާއިރު ފިޔަވަޅެއް އަޅަން ވެއްޖެ ނޫންތޯ؟" ޖަމީލު ވިދާޅުވިއެވެ.

"ލޭނާރު" ނަމުގައި އިދިކޮޅުން އިއްޔެ ކުރިއަށް ގެންދިޔަ މުޒާހަރާ ފެށިތާ މާގިނައިރެއް ނުވެ ފުލުހުން ވަނީ މުޒާހަރާގެ ބައިވެރިންނަށް ކުރިއަށް ނުދެވޭނެ ގޮތަށް ބެރިކޭޑް ޖަހާ އެ ސަރަހައްދު ބަންދުކޮށްފައެވެ. އަދި ބެރިކޭޑް ހިފައިގެން ކަރުނަ ގޭސް ބޭނުންކޮށްގެން ފުލުހުން އެ މުޒާހަރާ ރޫޅައިލައިފައިވާއިރު އެ މުޒާހަރާގެ ބައިވެރިންގެ ތެރެއިން 10 މީހަކު ހައްޔަރު ކޮށްފައިވާ ކަމަށްވެސް ޕީޕީއެމްގެ އިސް ތަރުޖަމާނު ހީނާ ވަލީދު ވިދާޅުވިއެވެ. އަދި އެމީހުން އަދިވެސް ތިބީ ފުލުހުންގެ ބެލުމުގެ ދަށުގައެވެ.

އެކަމާއި ކަންބޮޑުވުން ފާޅުކޮށް، އެމީހުން ދޫކޮށް ލުމަށް ގޮވާލައި، އަދި ފުލުހުން ނަހަމަ ގޮތުގައި ބާރުގެ ބޭނުން ކުރަމުންދާ ކަމަށް ބުނެ، ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) ވަނީ ކުއްލި މައްސަލަ އެއްވެސް މިއަދު މަޖިލީހަށް ހުށަހަޅުއްވާފައެވެ. އެހެން ނަމަވެސް އެ މައްސަލަ ވަނީ މަޖިލީހުން ބޭރުކޮށްލާފައެވެ.