އިލެކްޓްރޯނިކް ވޯޓަކުން ބައި-އިލެކްޝަންތައް ބޭއްވުމަށް ގޮވާލައިފި
އިލެކްޓްރޯނިކް ވޯޓިން ނިޒާމެއްގެ ތެރެއިން ބައި-އިލެކްޝަންތައް ބޭއްވުމަށް ރައްޔިތުންގެ މަޖިލީހުގެ ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ގޮވާލައްވައިފިއެވެ.
އޭނާ އެފަދައިން ގޮވާލައްވާފައިވަނީ ލޯކަލް ކައުންސިލްތަކުގެ އިންތިޚާބުތަކުގެ ގާނޫނަށް ސަރުކާރުން ހުށައަޅާފައިވާ އިސްލާހަށް މަޖިލީހުގައި ބަހުސްކުރައްވަމުންނެވެ.
ސަރުކާރުންގެ ފަރާތުން އެ އިސްރާފު ހުށައެޅީ ބައި-އިލެކްޝަންތައް ކައިރި ކައިރީގައި، ވަކި ޚާއްސަކޮށް އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ މެމްބަރުން އަވަސް އަވަހަށް އިސްތިއުފާ ދެއްވަމުންދާ ދިއުމާއި ގުޅިގެން ގިނަ އަދަދެއްގެ ބައި-އިލެކްޝަންތައް ބާއްވަން ޖެހުމުގެ ސަބަބުން، ދައުލަތުގެ ޚަރަދުތައް ބޮޑުވާކަން ފާހަގަކޮށް، އެ ޚަރަދުތައް ކުޑަކުރުމުގެ މަގްސަދުގައެވެ.
މިހާރު ހުށައަޅާފައިވަނީ އަހަރު އެއްފަހަރު ބައި-އިލްކެޝަން ބާއްވަން ލާޒިމުކުރާ ގޮތަށް ގާނޫނު އިސްލާހުކުރުމަށެވެ.
އެ އިސްލާހަށް ވާހަކަދައްކަވަމުން ބޮންޑާ ވިދާޅުވީ ޓެކްނޮލޮޖީގެ ގޮތުން ދިވެހިރާއްޖެ ވަރަށް ބޮޑަށް ކުރިއަރާ އާޓިފިޝަލް އިންޓަލިޖެންސްއަށްވެސް ދިވެހި ޒުވާނުން މިހާރު އަހުލުވެރިވެފައިވާކަމަށެވެ.
ކައުންސިލްތަކުން އިސްތިއުފާ ދޭ ވާހަކައާއި، އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ މެމްބަރުން އިސްތިއުފާދޭކަމަށް ބުނެ ވާހަކަދައްކާއިރު، ރާއްޖޭގެ ބައެއް ރަށްތައް އަދި ލާމަރުކަޒީ ނިޒާމަށް ފައްކާ ނުވާކަމަށް ބޮންޑާ ވިދާޅުވިއެވެ.
އެހެން ނަމަވެސް އެއީ، ލާމަރުކަޒީ ނިޒާމު ރައްޔިތުން ދަސްކުރަމުންދާއިރު، ރައްޔިތުންގެ މަންދޫބުން އިންތިޚާބު ކުރުމުގެ ފުރުސަތު ދޭން ޖެހޭކަމަށް ބޮންޑާ ވިދާޅުވިއެވެ. އަދި އީ-ވޯޓިން ނިޒާމަކީ އެ ގޮތުން މި މައްސަލައަށް ގެނެވޭނެ ހައްލެއްކަމަށް ގަބޫލުކުރައްވާކަމަށް ބޮންޑާގެ ވާހަކައިގއި ވަނީ ފާހަގަކުރައްވާފައެވެ.
"މިހާރު ޓެކްނިލޮޖީވެސް އެބަހުރި، މި ދައްކަނީ އިސްތިއުފާ ދޭ ކައުންސިލް އަދި ޑަބްލިއު.ޑީ.ސީ ބައި-އިލެކްޝަންގެ ޚަރަދު ބޮޑުވެގެން އުޅޭ ވާހަކަ. ޚަރަދު ބޮޑުވީމަ އެ 6 މަސް ދުވަސް 1 އަހަރަށް ދަންމާލާފަ، އިލެކްޓްރޯނިކް ވޯޓިން އެބޮތް، އެއީ މާބޮޑު ޚަރަދެއްވެސް ދާނެކަމެއް ނޫން. އަޅުގަނޑު ހިތަށް އަރަކީ ކީއްވެގެން ބާ އޭ އެކަން ނުކުރަން އުޅެނީ؟
މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ)
އަހަރަކު އެއްފަހަރު ބައި-އިލެކްޝަން ބާއްވަން ހުށައެޅި އިސްލާހަށް ފާޑުވިދާޅުވަމުން، ބޮންޑާ ވިދާޅުވީ، އެފަދަ އިސްލާހެއް ހުށައެޅުމުން އެމްޑީޕީއިންވެސް ލާމަރުކަޒީ އުސޫލު ބޭނުންނުވާހެން ހީވާކަމަށެވެ. އަދި އެ ޕާޓީއިން ސަރުކާރު ހިންގަން ބޭނުންވަނީ ލާމަރުކަޒީ އުސޫލުންތޯ ނުވަތަ ނޫން ތޯ މިހާރު ކަނޑައަޅަން ޖެހޭކަމަށެވެ.
ލާމަރުކަޒީ ނިޒާމަށް ރަށްތައް ފައްކާވަމުން އަންނަ މި ދަނޑިވަޅުގައި އިންތިޚާބީ މަގާމުތަކެއް ހިފެހެއްޓުމަކީ ލާމަރުކަޒީ ނިޒާމަށް ފެތޭ ކަމެއް ނޫންކަން ފާހަގަކުރައްވާ ބޮންޑާ ވަނީ އެ މައްސަލައަށް ޓެކްނޮލޮޖީގެ ތެރެއިން ހައްލެއް ހޯއްދެވުމަށް ގޮވާލައްވާފައެވެ. އަދި އެގޮތުން ވީ-ވޯޓިން ނިޒާމަކީ ޚަރަދު ބޮޑުވާ މައްސަލައަށްވެސް އެކަށީގެންވާ ހައްލެއް ލިބޭނެ ކަމެއްގެ ގޮތުގައި އޭނާ ފާހަގަކުރެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
