ލޮލުގެ ފެނުމުން މަޙްރޫމްވެފައިވާ މީހުންގެ ކިބައިން ޝާހިދު މަޢާފަށް އެދިއްޖެ

މި ސަރުކާރަކީ ”ކަނަކު އިޝާ ނަމާދަށް ދާހެން މަގުމައްޗަށް ނުކުމެ ލާހޫރެމުންދާ“ ސަރުކާރެއް ކަމަށް ވިދާޅުވެ، ލޮލުގެ ފެނުމުން މަހްރޫމްވެފައިވާ މީހުންނަަށް ފުރައްސާރަ ވެވޭ ގޮތަށް ދެކެވުނު ވާހަކަތަކަށް އެމްޑީޕީގެ ރައީސް އަބްދުالله ޝާހިދު މަޢާފަށްއެދިވަޑައިގެންފިއެވެ.

އެމްޑީޕީން ތިނަދޫ ސިޓީގައި ބޭއްވި ޖަލްސާގައި ޝާހިދު ވިދާޅުވީ މެނިފެސްޓޯއެއް ލިޔެގެން އޭގައި ކަންކަން ކުރާ ގޮތް ތަރުތީބުކޮށް، ހިސާބުކިތާބު ޖަހައިގެން ކަންކަން ކުރުން އެއީ ގައުމެއް ހިންގުން ކަމަށް މި ސަރުކާރަށް ނޭނގޭ ކަމަށާއި މި ސަރުކާރު ދަނީ ލާހޫރެމުން ކަމަށެވެ.

"ކަނަކު އިޝާ ނަމާދަށްދާހެން މަގުމައްޗަށް ނުކުމެ ލާހޫރެމުންދާ ސަރުކާރެއް އަޅުގަނޑުމެންގެ މިއޮތީ. އެ ސަރުކާރަކަށް ނޭނގޭ މެނިފެސްޓޯއެއް ލިޔެގެން މެނިފެސްޓޯގައި ކަންކަން ކުރަންވާ ގޮތްތަކެއް ތަރުތީބުކޮށްގެން ހިސާބުކިތާބު ޖަހައިގެން ކަންކުރުން އެއީކަން ގައުމެއް ހިންގުމަކީ. ލާހޫރެނީ،" އޭނާ ވިދާޅުވި އެވެ.

އެކަމާއި ގުޅިގެން ގިނަ ބައެއްގެ ފާޑުކިޔުންތައް ޝާހިދަށް އަމާޒުވެފައިވާއިރު، ލޯފަންމީހުންނާއި އެފަދަ މީހުންގެ ހައްގުގައި މަސައްކަތްކުރާ ޖަމިއްޔާގެ ރައީސްވެސް ވަނީ ޝާހިދަށް ރައްދު ދެއްވާފައެވެ. އަދި ޑިސްއެބިލިޓީ ކައުންސިލުންވެސް އެވާހަކަތައް ވަނީ ކުށްވެރިކޮށްފައެވެ.

ދެކެވުނު ވާހަކަތަކަށް މަޢާފަށްއެދެމުން ޝާހިދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ‏މިއަދުގެ ސަރުކާރުން ކަންކުރާގޮތް ސިފަކޮށްދިނުމުގެ ގޮތުން ބޭނުންކުރެއްވި ދިވެހި ބަހުގެ މަޖާޒީ މިސާލު ބަހަކީ ލޮލުގެ ފެނުމުން މަހުރޫމުވެފައިވާ މީހުންގެ ކަރާމާތަށް އުނިކަމެއް ރައްދުކުރުމުގެ ނިޔަތުގައި ބޭނުންކުރެއްވި ބަހެއް ނޫން ކަމަށެވެ.

”އެހެން ނަމަވެސް ދިވެހިބަހުގެ ޒަމާންވީ މިބަސް އަޅުގަނޑަށް ބޭނުންކުރެވިފައިވާތީ ލޮލުގެ ފެނުމުން މަހްރޫމްވެފައިވާ އެންމެ ބޭފުޅުންގެ އަރިހުން މައާފަށް އެދެމެވެ.“

‏މިއާއެކު ޝާހިދު ވަނީ ދިވެހި ބަސްފޮތުގައި ހުރެދާނެ މިފަދަ ހުރިހާ ބަސްބަހެއް އުނިކުރުމަށް ސަރުކާރުގެ ކަމާބެހޭ އިދާރާތަކަށް ގޮވާލައި، އެކަމުގައި އެންމެހާ ފަރާތްތަކުން އޭނާއާ ބައިވެރިވުމަށް އެދިލައްވާފައެވެ.

‏ޕޯސްޓް ނިންމަވާ ލައްވަމުންވެސް ޝާހިދުވަނީ ލޮލުގެ ފެނުމުން މަހްރޫމްވެފައިވާ ފަރާތްތަކާއި އެ ފަރާތްތަކުގެ ޢާއިލާތަކުގެ އަރިހުން  މައާފަކަށް އެދިލައްވާފައެވެ.