ފާއިތުވެދިޔަ ޑިސެމްބަރު މަހު ވެސް އެންމެ ގިނައީ ވަރި!

ފެމެލީ ކޯޓުން މިދިޔަ މަހު ނިންމި މައްސަލަތަކުގެ ތަފާސް ހިސާބުތަކަށް ބަލާއިރު އެންމެ ގިނައިން ކޯޓަށް ހުށަހެޅީ ވެސް އަދި އެންމެ ގިނައިން ކޯޓުން ނިންމީ ވެސް ވަރީގެ މައްސަލަތައް ކަމަށް ދައްކައިފިއެވެ.

ފެމިލީކޯޓުގެ ތަފާސްހިސާބުތައް ދައްކާ ގޮތުން މިދިޔަ ޑިސެމްބަރުމަހު އެކޯޓަށް ހުށައެޅި އާއިލީ މައްސަލަތަކުގެ އަދަދު 192 އަރައެވެ. އަދި އޭގެކުރިން ހުރި މައްސަލަތައްވެސް ހިމެނޭހެން މިދިޔަ މަހު ޖުމްލަ 158 މައްސަލައެއް ކޯޓުން ވަނީ ނިންމާފައެވެ.

ފެމިލީކޯޓުގެ އާއްމުކުރި ހިސާބުތައް ފެންނަގޮތުން މިދިޔަ މަހު 94 މީހަކު ވަނީ ވަރިވެފައެވެ. އަދި އޭގެކުރިން ހުށައެޅިފައި ހުރި މައްސަލަތަކާއެކު މިދިޔަމަހު ވަރީގެ 120 މައްސަލައެއް ކޯޓުން ވަނީ ނިންމާފައެވެ.

ކޯޓުގެ ރެކޯޑްތައް ދައްކާގޮތުން މިދިޔަ މަހު އެކަނިވެސް 61 މީހަކު ވަރިވުމަށް އެދި ކޯޓަށް ހުށައެޅިއެވެ. އަދި އޭގެ ކުރިން ވަރިވާން އެދި ހުށައެޅި 84 މީހެއްގެ މައްސަލަ ދިޔައީ ކޯޓްގައި ހިނގަމުން ދިޔައިރު، އަހަރު ނިންމާލިއިރު ވަރިއާމެދު އަދި ގޮތެއް ނިންމާ ނުދެވި 49 މައްސަލައެއް އެބައޮތެވެ.

މީގެ އިތުރުން، ވަރިއާ މެދު ޝައްކު އުފެދުނު 6 ކައިވެންޏެއްގެ މައްސަލަ ކޯޓުން ބަލަމުން އަންނައިރު ކޯޓުން ބޭރުގައި ވަރިކޮށްގެން އެކަން ސާބިތުކުރުމުގެ މަރުހަލާގައި އޮތް މައްސަލަތަކުގެ އަދަދު 40 އަރައެވެ.

މިދިޔަ ޑިސެމްބަރު މަހު ކޮށްފައިވާ ކައިވެނި ތަކަށް ބަލާއިރު، ޖުމުލަ 309 މީހަކު ވަނީ ކައިވެނީގެ ގޮށް ޖަހާލާފައެވެ.

މިދިޔަ މަސް ފެށުނު އިރު ދަރިންނަށް ހަރަދު ނުދިނުމުގެ ހަތަރު މައްސަލައެއް އޮތް އިރު މިދިޔަ މަހު އިތުރު 5 މައްސަލައެއް ކޯޓަށް ހުށައެޅިއެވެ. އަދި ސާބިތު ދަރަނީގެ އިތުރުން ދަރިންނަށް ދޭންޖެހޭ އެހެނިހެން ޚަރަދުތައް ހޯދުމަށް ހުށައެޅި 6 މައްސަލައެއް ވެސް ކޯޓުގައި އެބައޮތެވެ. އަދި އަނބިމީހާއަށް ދޭންޖެހޭ ޚަރަދު ނުދީގެން ހުށައެޅި މައްސަލައެއްވެސް ވެސް އެބައޮތެވެ.

ޑިސެމްބަރު މަހުގެ ތަފާސްހިސާބުތައް ދައްކާ ގޮތުން ގެވެށި އަނިޔާކޮށްގެން ސަލާމަތަށް އެދުނު މީހުންގެ އަދަދު މިދިޔަމަހު 8 އަކަށް އަރައެވެ. އޭގެތެރެއިން 4 މީހުންނަކީ ރައްކާތެރިކަމުގެ އަމުރު ނުވަތަ ރައްކާތެރިކަމުގެ އަވަސް އަމުރެއް ނެރެދިނުމަށް އެދުނު މީހުންނެވެ.

މީގެ އިތުރުން، ދަރިން މަންމަ ނުވަތަ ބައްޕައަށް ނުދައްކާ ނުވަތަ ބައްދަލުކުރަން ފުރުޞަތު ނުދީގެން އެފަދަ 7 ޝަކުވާއެއް ކޯޓްގައި އެބައޮތެވެ. އަދި ކުޑަކުދިންގެ ޙައްޤުތައް ރައްކާތެރިކުރުމަށް ބެލެނިވެރިކަމުގެ އަމުރެއް ނެރެދިނުމަށް އެދި 6 މައްސަލައެއް ކޯޓަށް ހުށަހަޅާފައި އެބައޮތެވެ. މީގެއިތުރުން ޤާނޫނީ ބެލެނިވެރިކަން ބަދަލުކޮށްދިނުމަށް އެދި ހުށައަޅާފައިވާ 2 މައްސަލައެއްވެސް ކޯޓުގައި އެބައޮތެވެ.