"އިގްތިސާދާއި ގުޅިގެން ވޯލްޑް ބޭންކުގެ އަންދާޒާތަށް ސަރުކާރުގެ އަންދާޒާތަކަށްވުރެ މަތި"
ރާއްޖޭގެ އިޤްތިޞާދު ކުރިއަރާނެކަމަށް ވޯލްޑް ބޭންކުން އަންދާޒާކޮށްފައިވާ ޢަދަދުތަކަކީ ސަރުކާރުގެ ކަމާއި ބެހޭ ވުޒާރާ ތަކުން އަންދާޒާކުރިވަރަށް ވުރެވެސް މަތީ އަދަދުތަކެއްކަމަށް ފިނޭންސް މިނިސްޓަރ، އިބްރާހިމް އަމީރު ވިދާޅުވެއްޖެއެވެ.
ޤައުމުތަކުގެ އިޤްތިޞާދުތައް ދިރާސާކުރުމަށްފަހު ވޯލްޑް ބޭންކުން އާންމުކޮށްފައިވާ ރިޕޯޓާއި ހަވާލާދީ ކުރެއްވި ޓްވީޓެއްގައި އަމީރު ވިދާޅުވީ، ވޯލްޑް ބޭންކުން އިއްޔެ ޝާއިއުކުރި ގްލޯބަލް އިކޮނޮމިކް ޕްރޮސްޕެކްޓްސްގައި 2022 ވަނަ އަހަރަށް ލަފާކުރި އިގުތިސާދީ ދުވެލި %7.6 އިން %12.4 އަށް މަތިކޮށްފައިވާ ކަމަށެވެ.
އަދި އެ ބޭންކުން މިހެން އަންދާޒާކޮށްފައި ވަނީ ކުރިން އަންދާޒާކުރި މިންވަރަށްވުރެ ބާރަށް ރާއްޖޭގެ އިޤްތިޞާދު ކޯވިޑް-19 ގެ ހާލަތުން އަރައިގަނެފައިވުމުންކަމަށްވެސް މިނިސްޓަރ އަމީރު ވިދާޅުވިއެވެ.
އަދި މީގެ އިތުރުން އެ ރިޕޯޓްގައިވާގޮތުން، މިއަހަރު ރާއްޖޭގެ އިޤްތިޞާދު ކުރިއަރާނެކަމަށް ލަފާކޮށްފައިވަނީ %8.2 އަށް ކަން ފާހަގަކުރައްވައި އަމީރު ވިދާޅުވީ، އެބޭންކުން ރާއްޖޭގެ އިޤްތިޞާދު ކުރިއަރާނެކަމަށް އަންދާޒާކޮށްފައިވާ އަދަދަކީ މަރުކަޒީ ބޭންކާއި ފިނޭންސް މިނިސްޓްރީ އަންދާޒާކުރިވަރަށް އިތުރު އަދަދެއްކަމަށެވެ.
"އަދި މުޅި މި ސަރަހައްދުގައިވެސް 2023 އެންމެ ބާރަށް ކުރިއަރާނެކަމަށް ބެލެވޭ ގައުމަކީ ދިވެހިރާއްޖެކަމަށް އެރިޕޯޓުގައި ފާހަގަކޮށްފައިވޭ." އަމީރު ވިދާޅުުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
