ގެއްލިގެން ހޯދަމުންދާ އާސިރު އެންމެ ފަހުން ފެނުނީ އެއާޕޯޓަށް ވަންނަ ތަން: ފުލުހުން

ވީނުވީއެއް ނޭނގި ގެއްލިފައިވާ ސ.މަރަދޫ، ގަސްކަރަ، މުހައްމަދު އާސިރު (31 އަހަރު) އެންމެ ފަހުން ފެނިފައިވަނީ ވެލާނާ އިންޓަނޭޝަނަލް އެއާޕޯޓް ގެ ޓާމިނަލްއަށް ވަންނަ ތަން ކަމަށް ފުލުހުން ބުނެފިއެވެ.

ދާދި ދެންމެއަކު ފުލުހުން ބުނީ، ފެބްރުއަރީ 4 ވަނަ ދުވަހު 19:30 ހާއިރުން ފެށިގެން ވީނުވީއެއް ނޭނގި ގެއްލިފައިވާ ކަމަށް ރިޕޯޓް ކޮށްފައިވާ އާސިރު ހޯދުމަށް ފުލުހުން މިހާތަނަށް ކުރި މަސައްކަތުން އޭނާ އަދި ފެނިފައި ނުވާ ކަމަށެވެ.

އަދި އޭނާ ހޯދިމަށް މާލޭގެ ވަރަށް ގިނަ ސަރަހައްދު ތަކުގެ ސީސީޓީވީ ފޫޓޭޖް ތަކާއި އެއާޕޯޓް ސަރަހައްދުގެ ބައެއް ސީސީޓީވީ ފޫޓޭޖް ވެސް ބަލާފައިވާކަމަށް ފުލުހުން ބުނެފައިވެއެވެ.

"އެގޮތުން ބެލި ބެލުމުން، ފެބްރުއަރީ 4 ވަނަ ދުވަހުގެ ރޭ 19:20 އެހާކަންހާއިރު، ބޮޑުތަކުރުފާނު މަގު ހުޅުމާލޭ ފެރީ ޓާމިނަލް ކައިރިން ހުދުކުލައިގެ ޓެކްސީ އަކަަށް އަރާތަން ފެނިފައިވޭ. އަދި އެ ޓެކްސީ އެއާޕޯޓް ޓާމިނަލް އަށް މަޑުކުރުމުން އާސިރު ޓެކްސީ އިން ފައިބައިގެން ގޮސް ޓާމިނަލް އަށް ވަންނަ މަންޒަރު ސީސީޓީވީ ފޫޓޭޖް އަކުން ފެނިފައިވޭ." ފުލުހުން ބުނެފައި ވެއެވެ.

އެހެން ނަމަވެސް އޭނާ އެއްވެސް އެއާލައިނަކުން ރާއްޖެއިން ބޭރަށް އަދި ރާއްޖޭގެ އެއްވެސް ރަށަކަށް ދިޔަ ކަންވެސް މިހާތަނަށް ބެލި ބެލުމުން އެނގިފައި ނުވާ ކަމަށް ފުލުހުން ބުނެފައިވެއެވެ.

މީގެ އިތުރުން ފުލުހުން ބުނީ، އާސިރު ހޯދުމަށް މާލޭ ގެ އިތުރު ސަރަހައްދުތަކުގެ ސީސީޓީވީ ފޫޓޭޖް ތަކާއި އެއާޕޯޓްގެ އިތުރު ސަރަހައްދުތަކުގެ ސީސީޓީވީ ފޫޓޭޖް ތައްވެސް ފުލުހުން އަދިވެސް ބަލަމުން އަންނަ ކަމަށެވެ. އަދި ހަމައެހެންމެ، އަތޮޅު ތަކުގެ ޕޮލިސް ސްޓޭޝަން ތައް މެދުވެރިކޮށް ވެސް އޭނާ ހޯދުމުގެ މަސައްކަތް ހުއްޓުމެއް ނެތި ކުރަމުންދާ ކަމަށް ފުލުހުން ބުނެފައިވެއެވެ.

އާސިރާ ބެހޭ އެއްވެސް މައުލޫމާތެއް ލިބިފައިވާ ނަމަ ފުލުހުންގެ ހޮޓްލައިން 332211 އަށް ނުވަތަ ގަލޮޅޮ ޕޮލިސް ސްޓޭޝަންގެ 9631696 އަށް ގުޅުމަށް ފުލުހުން ވަނީ އެދިފައެވެ.