ޝީ ގެ ތިންވަނަ ދައުރުގައި ގުޅުން އިތުރަށް ބަދަހި ކުރައްވާނެ ކަމަށް ރައީސް ޞާލިހް ވިދާޅުވެއްޖެ
ޗައިނާގެ ރައީސް ކަމުގެ ތިން ވަނަ ދައުރަކަށް، މިހާރު ވެސް އެ މަގާމުގައި ހުންނެވި ރައީސް ޝީ ޖިންޕިންގް އިންތިޚާބު ކުރުމާއި ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެމަނިކުފާނަށް މަރުހަބާ ދަންނަވައިފިއެވެ.
އުމުރުން 69 އަހަރުގެ ޝީ ޖިންޕިންގް އަށް ތިންވަނަ ދައުރެއް ޔަޤީންވެފައިވަނީ ޗައިނާގެ ޤާނޫނު ހަދާ މަޖިލީހުން ޤާނޫނަަށް ގެނައި އިސްލާހާއެކުގައެވެ. އެގޮތުން އެ ޤައުމުގައި އެކަކަށް ވެރިކަން ކުރެވޭނީ ދެ ދައުރަކަށް ކަަމަށް ބަޔާން ކުރާ މާއްދާ ވަނީ އުވާލާފައެވެ.
ޗައިނާގެ ޤާނޫނު ހަދާ މަޖިލީހުގެ، ހުކުރު ދުވަހު އޮތް ޖަލްސާގައި ބައިވެރިވި 2،952 މެންބަރުން ވަނީ ޝީ އަށް ތިން ވަނަ ދައުރެއް ދެއްވުމަށް ވޯޓު ދީފައެވެ. އެމަނިކުފާނާ ދެކޮޅަށް އެއްވެސް މެންބަރަކު ވޯޓެއް ނުދެއެވެ.
އެކަމާއި ގުޅިގެން ރައީސް ޞާލިހް މެސެޖް ކުރައްވާފައިވާ ކަން ޗައިނާ އެމްބަސީން ވަނީ ބުނެފައެވެ.
އެގޮތުން ޗައިނާގެ އެމްބަސީން ކޮށްފައިވާ ޓުވީޓެއްގައި ބުނީ، ޗައިނާގެ ރައީސް ޝީއަށް މަރުހަބާ ވިދާޅުވެ ރައީސް ޞާލިހް ފޮނުއްވި މެސެޖުގައި، ޗައިނާއަކީ ރާއްޖޭގެ ތަރައްގީގެ މުހިންމު ބައިވެރިއެއްގެ ގޮތުގައި ރައީސް ޞާލިހު ފާހަގަކުރައްވައިފައިވާ ކަމަށެވެ. އަދި ރާއްޖެ އާއި ޗައިނާގެ ގުޅުން އިތުރަށް ހަރުދަނާ ކުރުމަށް އެކުގައި މަސައްކަތް ކުރައްވަން ބޭނުންފުޅުވާކަމަށް ވެސް ވިދާޅުވެފައިވާ ކަމަށް ޗައިނާ އެމްބަސީން ބުނެފައި ވެއެވެ.
"ރައީސް ޝީ ޖިންޕިންގެ ލީޑަޝިޕާއި ތަސައްވުރަށް ޗައިނާގެ ރައްޔިތުން ދެއްވަމުންދާ އިތުބާރު ދެމެހެއްޓުމަށް އެމަނިކުފާނު ކުރައްވާ މަސައްކަތަށް ރައީސް އިބްރާހިމް މުހައްމދު ސޯލިހް ކާމިޔާބީއަށް އެދިވަޑައިގެންނެވި،" ރާއްޖޭގައި ހުންނަ ޗައިނާގެ އެމްބަސީންކުރި ޓްވީޓެއްގައި ބުންޏެވެ.
ރާއްޖެ އާއި ޗައިނާގެ ގުޅުމަށް 50 އަހަރަށް ވުރެ ގިނަ ދުވަސް މިހާރު ވަނީ ވެފަ އެވެ. ރާއްޖޭގެ ތަރައްގީގައި މުހިންމު މަޝްރޫތަކެއް ޗައިނާގެ އެހީގައި ކުރިއަށް ގެންގޮސްފައި ވާއިރު ރާއްޖެ އާއި ޗައިނާގެ ގުޅުމުގައި ދިގު ތާރީހެއް އެބަ އޮތެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
