ހަމައަގު ހޯދައިދޭން ވައުދުވިޔަސް މަހުގެ އަގު އެންމެ ދަށީ މި ސަރުކާރުގައި: ފިރުޝާން
މަހަށް ހަމަ އަގު ހޯދައިދޭނެކަމަށް ވަޢުދުވި ނަމަވެސް މަހުގެ އަގު އެންމެ ދަށީ އެމްޑީޕީގެ މި ވެރިކަމުގައި ކަމަށް މަޖިލީހުގެ މަޑަވެލި ދާއިރާގެ މެންބަރު ހުސެއިން ފިރުޝާނު ވިދާޅުވެއްޖެ އެވެ.
މެންބަރު ފިރުޝާން މިފަދައިން ވިދާޅުވީ އެމްޑީޕީ ވެރިކަމެއް އޮވެމެ، އެމްޑީޕީގެ މެނިފެސްޓޯގައިވާ މަސްވެރިކަމުގެ ސިޔާސަތު ހިންގުމުގައި ފަހަތުފަޔަށް ބުރަވެ، ސަރުކާރުން މަސްވެރިކަމުގެ ސިޔާސަތާ ދެކޮޅަށް ވާހަކަދެއްކުން ހުއްޓާލައި އެމްޑީޕީގެ މެނިފެސްޓޯގައިވާގޮތަށް އަދި ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި ޝާއިއުކޮށްފައިވާ ސިޔާސަތު ތަންފީޒުކުރުމަށް ގޮވާލައި އޭނާ ހުށަހެޅުއްވި ގަރާރުގައެވެ.
ފިރުޝާނުގެ ވާހަކައިގައި ވަނީ އެކި ސަރުކާރުތަކުން މަސްވެރިންގެ އަތުން މަސް ގަނެފައިވާ އަގުތަކަށް އަލިއަޅުވާލައްވާފަ އެވެ.
2007 ގައި ރައީސް މައުމޫނުގެ ވެރިކަމުގައި މަސްކިލޯއެއް ގަނެފައިވަނީ 5 ރުފިޔާ ލާރިކޮޅަކަށް، 2008 ވަނަ އަހަރު ރައީސް މުޙައްމަދު ނަޝީދުގެ ވެރިކަމުގައި މަސް ކިލޯއެއް ގަނެފައިވަނީ 28 ރުފިޔާއާއި 35 ރުފިޔާއާއި ދެމެދުގެ އަގެއްގައި... 2012 ވަނަ އަހަރު ރައީސް ވަހީދުގެ ވެރިކަމުގައި މަސް ކިލޯއެއް ހުރީ 22 ރުފިޔާގައި... 2013 ގައި ރައީސް ޔާމިނުގެ ވެރިކަމުގައި މަސް ކިލޯއެއް ހުރީ 20 ރުފިޔާއަށް... 2018 ގައި އައި މި ސަރުކާރުގައި މަސްކިލޯއެއް ހުރީ 17 ރުފިޔާއަށް
މެންބަރު ހުސެއިން ފިރުޝާނު
އެކަން ފާހަގަކުރައްވާ އޭނާ ވިދާޅުވީ ރައީސް މައުމޫނުގެ ދައުރަށްފަހު އައި ހުރިހާ ސަރުކާރުތަކަށްވުރެ މި ސަރުކާރުން މަސް ކިލޯއެއް ގަންނަ އަގު ދަށް ކަމަށެވެ.
އެމްޑީޕީ ވެރިކަމަށް އައުމަށް 2018 ވަނަ އަހަރު އެކުލަވާލި މެނިފެސްޓޯގައި މަސްވެރިންނަށް ޚާއްސަ ގިނަ ކަންތައްތަކެއް ކޮށްދިނުމަށް ލިޔެފައިވާކަމަށާއި، އެހެން ނަމަވެސް ދައުރު ނިމެން ބާކީ ހައެއްކަ މަހަށް ވެފައިވާއިރު، މަސްވެރިންނަށް ވީ ވައުދުތައް ފުއްދާދެވިފައި ނުވާކަމަށް ފިރުޝާނު ވިދާޅުވި އެވެ.
ފިރުޝާނު ވިދާޅުވީ މަސްވެރިންނަށް ވީ ވައުދުތަކަކީ ރައީސް އޮފީހުގެ ވެބްސައިޓުގަޔާއި، ސަރުކާރުގެ ސްޓްރެޖީޓިކް އެކްޝަން ޕްލޭންގައިވެސް ހިމަނާފައިވާކަމަށެވެ.
އޭގެ އިތުރުން މަސްވެރިން ބާނާ މަހަށް ހަމަ އަގު ހޯދައިދުނުމާއި، ވައުދުތައް ފުއްދުމަށް 2019 ވަނަ އަހަރު މަޖިލީހުން ފާސްކުރި މަސްވެރިކަމުގެ ގާނޫނުގައިވެސް މުހިންމު ކަންތައްތަކެއް ހިމަނާފައިވާނެކަމަށް ފިރުޝާނު ވިދާޅުވި އެވެ.
ފިރުޝާނު ވިދާޅުވީ މަސްވެރިންނަށް ވީ ވައުދުތައް ފުއްދުމަށް ފުރުސަތުތަކެއް ސަރުކާރަށް ލިބިގެން ދިޔަ ނަމަވެސް އެ ވައުދުތައް ފުއްދުމުގެ ބަދަލުގައި ރައީސް ޞާލިހު މަސްވެރިންގެ މަތިން ހަނދާން ނައްތާލާފައިވާ ކަމަށެވެ.
އޭގެ އިތުރުން މި ވެރިކަމަކީ މަސްވެރިން ނިކަމެތިކޮށް އެ ދާއިރާއަށް ވަރަށް ބޮޑަށް އިހުމާލުވެފައިވާ ވެރިކަމެއްކަމަށް ފިރުޝާނު ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
