"ހުރިހާ ކޮމިޓީއަކުންވެސް އެމްޑީޕީއަށް މެޖޯރިޓީ ދިނިން؛ ނަމަވެސް އެޕާޓީން އެއްބަހެއް ނުވި ދިން މިންވަރަކަށް"

ރައްޔިތުންގެ މަޖިލީހުގެ ކޮމިޓީތަކުގެ ނިސްބަތަށް އައި ބަދަލާއިއެކު، އެ މައްސަލަ ހައްލު ކުރުމަށް ޕާޓީތަކުން މަޝްވަރާ ކުރައްވައި، ވޯޓަށް އެހުމަށް ފޮނުވިއިރު އެމްޑީޕީ އަށް، ހުރިހާ ކޮމިޓީ އަކުންވެސް މެޖޯރިޓީ ދެއްވި ކަމަށާ އެހެން ނަމަވެސް އެ އެކަމަށް އެ ޕާޓީން އެއްބަސް ނުވީ ކަމަށް މަޖިލީހުގެ މެދު ހެންވޭރު ދާއިރާގެ މެންބަރު ޢަލީ އާޒިމް ވިދާޅުވެއްޖެއެވެ.

މަޖިލީހުގެ އިދިކޮޅު ބައެއް ޕާޓީތަކުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާޒިމް ވިދާޅުވީ، މަޖިލީހުގެ ކޮމިޓީތައް އެކުލަވައި ނުލެވޭތީ މަޖިލިސް މިހާރު ހުއްޓުމަކަށް އައިސްފައިވާ ކަމަށެވެ. އަދި މަޖިލީހުގެ ކޮމިޓީތައް އުވިގެން ނުދާ ކަމަށާ، ނަމަވެސް މަޖިލީހުގެ 13 މެންބަރުން އެއްކޮށް އެމްޑީޕީން ކެނޑުމާާއި އެކު، މަޖިލީހުގެ ނިސްބަތަށް ބޮޑު ބަދަލެއް އައިސްފައިވާ ކަމަށެވެ.

އެހެންކަމުން، ކޮމިޓީތަކުގައި ހިމެނޭ މެންބަރުންގެ ތެރެއިން އެއް ކޮމިޓީގައި ހިމެނޭ މެންބަރުން އަނެއް ކޮމިޓީއަށް ބަދަލު ކުރުމުގެ ގޮތުން، ސިޔާސީ ޕާޓީތައް މަޝްވަރާ ކޮށް، އެކަމަށް އެއްބަސްވެ ވޯޓަށް އަހަން ތައްޔާރުވެފައި ވަނިކޮށް، އެމްޑީޕީގެ ޕާލަމެންޓްރީ ގުރޫޕުން ވޯޓަށް އެހުމަށް ބޭނުން ނުވި ކަމަށް އާޒިމް ވިދާޅުވި އެވެ.

ވޯޓަށް އެހުމުގެ ވާހަކަ ދައްކާއިރުގައި، އެމްޑީޕީން ބުނަމުންދަނީ އެ ބޭފުޅުންގެ މެޖޯރިޓީއެއް ނެތީއޭ. އެހެން ނަމަވެސް އެ ދުވަހު ވޯޓަށް އެހުމަށް ތައްޔާރު ކޮށްފައި އޮތް ޓޭބަލް އަށް ބަލާއިރު، ހަމަ ކޮންމެ ކޮމިޓީއެއްގެ %53 ނުވަތަ %58 އެމްޑީޕީއަށް ލިބިފައި އޮތީ. އެހެން ނަމަވެސް އެ ބޭފުޅުން އެގޮތަށް ކުރިއަށް ގެންދަން ބޭނުން ނުވީ. އަޅުގަނޑަކަށް ނޭނގެ ކީއްވެ ކަމެއް.

މެދު ހެންވޭރު ދާއިރާގެ މެންބަރު ޢަލީ އާޒިމް

މަޖިލީހުގައި ސިޔާސީ ޕާޓީތަކަށް މެންބަރުން ބެހިފައިވާ ގޮތަށް އައި ބަދަލާ އެކު، ކޮމިޓީތައް އަލުން އެކުލަވާލުމަށް ވޯޓަށް އެހުން މިިދިޔަ މަހުގެ 23 ވަނަ ދުވަހު ބޭއްވި ޖަލްސާގެ ވޯޓު ގަޑީގައި އޮންނާނެކަން މަޖިލީހުގެ ރައީސް މުހައްމަދު ނަޝީދު އެ ދުވަހު އިއުލާން ކުރެއްވިއެވެ.

ނަމަވެސް އެކަން މަޑުޖައްސާލީ މަޖިލީހުގެ މެޖޯރިޓީ ލީޑަރ މުހައްމަދު އަސްލަމްގެ އެެދިވަޑައިގަތުމަށް ކަމަށް އަމީން އާންމު ފާތިމަތު ނިއުޝާ ވަނީ ވިދާޅުވެފަ އެވެ.

އެކަމާއި ގުޅިގެން އަސްލަމް ވިދާޅުވީ، ރައްޔިތުންގެ މަޖިލީހުގެ ކޮމިޓީތަކަށް މެންބަރުން އައްޔަނުކުރުމުގައި ސިޔާސީ ޕާޓީތަކުގެ މެޖޯރިޓީ ލީޑަރުންނާއި މައިނޯރިޓީ ލީޑަރުންގެ މަޝްވަރާ ހޯދަންވާނެކަމަށް ރައްޔިތުންގެ މަޖިލީހުގެ ގަވާއިދުގައި ބަޔާންކޮށްފައިވާ ކަމަށެވެ. ނަމަވެސް އެފަދައިން މަޖިލީހުން ކަން ކުރައްވާފައި ނުވާ ކަމަށާ، މެޖޯރިޓީ ލީޑަރުގެ ހައިސިއްޔަތުން އެކަމުގައި ބަސްބުނުމުގެ ފުރުޞަތު އޭނާއަށް ނުދެއްވާ ކަމަށެވެ.

އެހެންކަމުން އަސްލަމް އެދިލެއްވީ މަޖިލީހުގައި އެމްޑީޕީގެ %64 މެޖޯރިޓީ މަޖިލީހުގައި އޮވެމެ، މަޖިލީހުގެ ކޮމިޓީތަކުގެ މެޖޯރިޓީ އެޕާޓީއަށް ގެއްލޭގޮތަށް ކޮމިޓީތައް ތަރުތީބުކުރުމުގެ މަސައްކަތް ކުރިއަށް ނުގެންދިއުމަށް ކަމަށްވެސް އަސްލަމް ވިދާޅުވި އެވެ.