އަދީބު ސިންގަޕޫރަށް ފުރައިފި
ބޭސްފަރުވާއަށް ރާއްޖެއިން ބޭރަށް ދިއުމަށް މޯލްޑިވްސް ކަރެކްޝަނަލް ސާވިސްއިން ހުއްދަދިނުމާއެކު އެމްއެމްޕީއާރުސީގެ ޚިޔާނާތުގެ ކުށް ސާބިތުވެ ޖަލު ހުކުމެއްކޮށް، ގޭގައި އެ ހުކުމް ތަންފީޒުކުރަމުންދާ ކުރީގެ ނައިބު ރައީސް އަހުމަދު އަދީބު ސިންގަޕޫރަށް ފުރައިފި އެވެ.
އެކަން އަދީބުގެ ސިޔާސީ ޕާޓީ މޯލްޑިވްސް ތާޑްވޭ ޑިމޮކްރެޓްސް އިން ވަނީ ކަށަވަރުކޮށްދީފަ އެވެ.
އެގޮތުން އަންގާރަ ދުވަހުގެ ރޭ އެ ޕާޓީން ނެރުނު ބަޔާނެއްގައި ބުނެފައިވަނީ އެކި ހޮސްޕިޓަލްތަކުގެ އެތައް ޑޮކްޓަރުންގެ ލަފާގެ މަތިން ފުރާނައަށް ނުރައްކާތެރި ބައްޔަކަށް ފަރުވާ ހޯދުމަށް އެމްޓީޑީގެ ލީޑަރު އަޙްމަދު އަދީބު އިތުރު ބޭސްފަރުވާއަށް ސިންގަޕޫރަށް ފުރާފައިވާ ކަމަށެވެ.
އަޙްމަދު އަދީބު ސިންގަޕޫރަށް ދަތުރު ކުރަމުން ދަނީ މޯލްޑިވްސް ކަރެކްޝަނަލް ސާވިސް އަދި ފުލުހުންގެ ސެކިއުރިޓީންގެ ބެލުމުގެ ދަށުންކަމަށް ވެސް އެ ޕާޓީން ވަނީ ބުނެފަ އެވެ.
އެމްޓީޑީން ބުނީ ކުރީގެ ރައީސް އަބްދުالله ޔާމީން އަބްދުލްގައްޔޫމުގެ ވެރިކަމުގައި އަދީބު ޖަލުގައި ހުރި މުއްދަތުގައި ބޭސްފަރުވާއަށް އެދުމުން އެ ފުރުސަތު ފަހިކޮށްދީފައި ނުވާކަމަށެވެ.
އެހެން ނަމަވެސް މި ސަރުކާރުން އަދީބަށް ބޭނުންވާ ބޭސްފަރުވާގެ ފުރުސަތު ފަހިކޮށްދީފައިވާކަމަށާއި، އެކަމަށްޓަކައި ސަރުކާރަށް ޝުކުރު އަދާކުރާކަމަށް އެމްޓީޑީން ވަނީ ބުނެފައެވެ.
އަދީބު ރާއްޖެއިން ބޭރަށް ފުރަން ހުއްދަދިން ކަމުގައި ވީ ނަމަވެސް އޭނާގެ ކަންކަން ބަލަހައްޓަމުން ގެންދާނެކަމަށް މޯލްޑިވްސް ކަރެކްޝަނަލް ސާވިސްއިން ވަނީ ބުނެފައެވެ. އަދި އޭނާ ފޮނުވީ އަނބުރާ ގެނެވޭ ގޮތަށްކަމަށް އެ އިދާރާއިން ވަނީ ބުނެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
