އެއްވެސް މީހެއްގެ ނަން ދެ ވޯޓު ފޮށީގައި ނޯންނާނެ ކަމުގެ ޔަގީންކަން އީސީން ދީފި!
ވޯޓުލުމަށް ރީ-ރެޖިސްޓަރ ކުރުމުން ކުރިން އެމީހަކު ރެޖިސްޓަރ ކުރި ތަނުން ނަން އުނި ކުރެވޭނެ ކަމަށާ، އެހެންކަމުން އެކެއްގެ ނަން ދެ ވޯޓު ފޮށީގައި ނޯންނާނެ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮމިޝަންގެ ރައީސް ފުއާދު ތައުފީގު ވިދާޅުވީ، މާލޭގައި ދިރިއުޅޭ މީހުންނަށް ވިލިމާލޭގައި ނުވަތަ ހުޅުމާލޭގައި، އަދި އެ ތަންތަނުގައި އުޅޭ މީހުންނަށް މާލޭގައި ވޯޓު ލުމުގެ ފުރުސަތު އޮންނާނެ ކަމަށެވެ.
ހަމަ މާލޭގައި އުޅޭ ބޭފުޅުންނަށްވެސް ވިލިމާލޭގައި ވޯޓުލެއްވިދާނެ، މާލޭގައި އުޅޭ ބޭފުޅުންނަށް ހުޅުމާލޭގައި ވެސް ވޯޓު ލެއްވި ދާނެ، ހަމައެގޮތަށް ހުޅުމާލޭގައި ނުވަތަ ވިލިމާލޭގައި އުޅޭ ބޭފުޅުންނަށް މާލޭގައިވެސް ވޯޓު ލެއްވި ދާނެ. އަދި ވިލިމާލޭގައި ތިއްބަވާ ބޭފުޅުންނަށް ހުޅުމާލޭގައި އަދި ހުޅުމާލޭގައި ތިއްބަވާ ބޭފުޅުންނަށް ވިލިމާލޭގައި ވޯޓުލެވޭނެ.
ފުއާދު ތައުފީގު
ފުއާދު ވިދާޅުވީ އެ ހުރިހާ ގޮތަކަށްވެސް ވޯޓު ލުމުގެ ފުރުސަތު ފަހި ކޮށްދީފައި ވަނީ، ވޯޓުލާ މީހުނަށް ފަސޭހަ ގޮތްތަކެއް ހޯދައި ދިނުމަށް ކަމަށެވެ. އަދި އެމީހަކު ރެޖިސްޓަރ ވެފައިވާ ވޯޓު ފޮށްޓާއި އެނޫންވެސް ވޯޓުލުމާއި ގުޅޭ މައުލޫމާތު 1414 އިން ލިބޭނެ ކަމަށް ފުއާދު ވިދާޅުވި އެވެ.
މީގެ އިތުރުން ފުއާދު ވިދާޅުވީ ރީ-ރެޖިސްޓަރ ކުރުމުގެ ފުރުސަތު ހުޅުވާލެވިފައި ވަނީ 16 ޖުލައި އިން ފެށިގެން އޮގަސްޓު 5 ގެ ނިޔަލަށް ކަމަށެވެ. އަދި އެ 21 ދުވަހުގެ މުއްދަތުގެ ތެރޭގައި ރީ ރެޖިސްޓަ ނުކޮށްފި ނަމަ، ދެން އެމީހަކު ވޯޓުލާން ޖެހޭނީ ކުރިން ރެޖިސްޓާރ ކޮށްފައި އޮތް ރަށަކަށް ކަމަށްވެސް އޭނާ ވިދާޅުވި އެވެ.
އެއްވެސް ބޭފުޅެއްގެ ނަން ދެ ތަނުގައެއް ނޯންނާނެ. އެހެންވީމާ އެއް ތަނުން އަނެއް ތަނަށް ބަދަލު ކުރާއިރު، ކުރިން އޮތް ތަނުން އުނިވެގެން ދާނެ.
ފުއާދު ތައުފީގު
މީގެ އިތުރުން ފުއާދު ވަނީ ވޯޓު ލާން ކަނޑައެޅިފައިވާ ވަގުތުގައި ވޯޓު ލުމުގެ ހައްގު ލިބިފައިވާ އެންމެންވެސް ކުރިއާލާ ގޮސް ވޯޓު ލުމަށް އެދިލައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
