ޠާރިގު ހަމީދަށް: ގޭންގްތައް ހުއްޓުވުމުގެ ގާނޫނު ތަންފީޒް ނުކުރަނީ ކީއްވެތޯ؟

ދިވެހިރާއްޖޭގެ ދެކުނުގެ އަތޮޅުތަކުގައި އެކަނިވެސް 31 ގޭންގު ތިބިކަން ފުލުހުންނަށް ޔަގީންވާއިރު، އެފަދަ ގޭންގުތައް ހުއްޓުވުމަށް ހަދާފައިވާ ޤާނޫނު ތަންފީޒު ނުކުރަނީ ކީއްވެތޯ ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ޠާރިގު (ޓޮމް)، ކޮމިޝަނަރ އޮފް ޕޮލިސް މުހައްމަދު ހަމީދާއި ސުވާލުކުރައްވައިފިއެވެ.

7 އަތޮޅުގައި 31 ގޭންގު އެބައޮތް ކަމަށާއި އެ ގޭންގުތަކުގައި 700 އަށްވުރެ ގިނަ ގޭންގުސްޓާރުން ހަރަކާތްތެރިވާކަމަށް ދިވެހި ފުލުހުންގެ ޚިދުމަތުން އިއްޔެ އޮތް 'ވިޔަވަތި' ކޮންފަރެންސުގެ ހާމަ ކުރުމާއި ގުޅިގެން ރޭ ޓޮމް ކުރެއްވި ޓްވީޓެއްގައި ވިދާޅުވީ ގޭންގްތައް ހުއްޓުވުމުގެ ޤާނޫނަށް 12 އަހަރުވެއްޖެ ކަމަށެވެ. އަދި ގާނޫނުގައި ސާފުކޮށް އެފަދަ ކުށްތައް ކުރާ މީހުންގެ އަދަބު ބަޔާންވެފައިވާއިރު އެ ގާނޫނު ތަންފީޒް ނުކުރަނީ ކީއްވެތޯ ޓޮމް ވަނީ ސުވާލު ކުރައްވާފައެވެ.

"އެޤާނޫނުގެ ދަށުން ކިތައްމީހުންގެ މައްސަލަ ތަޙްޤީޤްކުރެވުނުތޯ؟ ދައުވާކުރަން ޕީޖީއަށް ފޮނިވިތޯ؟ ޕިޖީ، އެޤާނޫނުން ކިތައް މީހުންނަށް ދައުވާކުރިބާ؟" ގޭންގް ކުށްތައް މަނާކުރާ ގާނޫނުގެ ފުރަތަމަ ސަފުހާގެ ފޮޓޯއަކާއި އެކު ޓޮމް ކުރެއްވި ޓުވީޓެގައި ސުވާލުކުރައްވާފައިވެއެވެ.

މިހާރު ކުރިއަށްދާ "ވިއަވަތި ރާއްޖެ" ކޮންފަރެންސްގައި ފުލުހުން އިއްޔެ ހުށަހެޅި ޕްރެޒެންޓޭޝަންގައި ވާގޮތުން ދެކުނުގެ އަތޮޅުތަކުގައި ހަރަކާތްތެރިވާ 31 ގޭންގެއްގައި 700 ގޭންގް ސްޓާރުންނާއި 100 ކުޑަކުދިން އެބަތިއްބެވެ.

އަދި މީގެ އިތުރުން، ދެކުނުގެ އަތޮޅުތަކުގައި ހަރަކާތްތެރިވާ ގޭންގުތަކުގައި ސީދާ ދެކުނުގެ ރަށްތަކަށް ނިސްބަތްވާ 1506 މީހުން އެބަތިއްބި ކަމަށާ، މީގެ ތެރެއިން 605 މީހުންނަކީ ދެކުނުގެ ރަށްރަށުގައި ދިރިއުޅޭ މީހުންނަށްވާއިރު، 901 މީހުންނަކީ މާލޭގައި ދިރިއުޅޭ މީހުންން ކަމަށްވެސް ފުލުހުން ބުނެފައިވެއެވެ.