ލީކުވި ކަމަށް ބުނާ، މޮރިޝަސްއަށް ފޮނުވި ސަރުކާރުގެ "ސިއްރު ސިޓީ", ސަރުކާރުން ޕްރޮމޯޓް ކުރަނީ!

ރާއްޖޭގެ ދެކުނުން އޮންނަ ޗާގޮސްގެ މައްސަލައިގައި ދިވެހި ސަރުކާރުން ދަމަހައްޓަމުން އައި ސްޓޭންޑް ބަދަލުކޮށް، މޮރިޝަސްއާ އެއްކޮޅަށް އދ. ގައި ވޯޓު ދޭނެ ކަމަށް ވިދާޅުވެ، ރައީސް އިބްރާހިމް މުހައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީ ކަމަށް ބުނާ "ސިއްރު ސިޓީ" މީސްމީޑިއާގައި ސަރުކާރުން ފަތުރަން ފަށައިފިއެވެ.

ރައީސް ޞާލިހް މޮރިޝަސް ބޮޑުވަޒީރަށް ފޮނުއްވި ކަމަށް ބުނާ ސިޓީއެއް އިއްޔެ ވަނީ މީސްމީޑިއާގައި "ލީކު" ވެފައެވެ. އެ ސިޓީއާއި ގުޅޭގޮތުން ބައެއް ނޫސްތަކަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވަނީ އެއީ އެ ރައީސް ޞާލިހު ފޮނުއްވި ސިޓީފުޅު ކަމަށް ވިދާޅުވެފައެވެ.

އެ ސިޓީގައި ވާގޮތުން، ޗާގޯސްގެ ސިޔާދަތީ ބާރާ ގުޅޭގޮތުން އދ. ގައި ދެން އެންމެ އަވަހަށް ނަގާ ވޯޓެއްގައި ރާއްޖޭން މޮރިޝަސްއާ އެއްކޮޅަށް ވޯޓު ދޭނެ ކަމަށެވެ. އަދި މީގެ ކުރިން މޮރިޝަސްއަށް ތާއީދު ނުކުރީ، ރާއްޖޭގެ ކޮންޓިނެންޓަލް ޝެލްފު ކަނޑައަޅަން އެކަމާ ގުޅޭ ބައިނަލްއަގުވާމީ ކޮމިޝަނަށް ރާއްޖޭން ހުށަހަޅާފައިވާ މައްސަލައާ މޮރިޝަސްގެ ސަރުކާރުން ދެކޮޅު ހަދާފައިވާތީ ކަމަށް އެ ސިޓީފުޅުގައި ރައީސް ވިދާޅުވެފައިވެ އެވެ.

ލީކުވި މި ސިޓީއަކީ ރައީސް ޞާލިހު ފޮނުއްްވި ސިޓީ ކަމަށް ރައީސް އޮފީހުން ބުނެފައިވާއިރު، މިއީ ސަރުކާރުން މަޖިލީހަށްވެސް ދެއްކުމަށް ދެކޮޅު ހަދާފައިވާ ސިޓީއެކެވެ. އަދި މި ސިޓީ ހާމަ ނުކުރުމަށް ހައިކޯޓާއި ހަމައަށް ގޮސް، އެ ކޯޓުގައިވެސް މީގައިވާ ވާހަކަތައް ހާމަ ކުރުމަށް ދެކޮޅު ހަދައި ސަރުކާރުން ވަނީ ވަކާލާތު ކޮށްފައެވެ.

ކަން މިހެން ހުރި ނަމަވެސް، މި ސިޓީ "ލީކު" ވުމާއި އެކު ސަރުކާރުގެ މިނިސްޓަރުންނާއި އެކްޓިވިސްޓުންވެސް އަންނަނީ އޭރު ހާމަ ކުރަން ދެކޮޅު ހެއްދެވި "ސިއްރު ސިޓީ" މީސް މީޑިއާގައި ދައުރުކޮށް އެ ސިޓީ ދިވެހި ހުރިހާ ރައްޔިތުންނަށް ދައްކަން މަސައްކަތް ކުރައްވަމުންނެވެ.

މޮރިޝަސް އަށް ފޮނުވި ކަމަށް ބުނާ މި ސިޓީ ލީކު ވެފައި މިވަނީ، ރިޔާސީ އިންތިހާބުގެ ފުރަތަމަ ބުރުން ބޮޑު ފަރަގަކުން ދެވަނަ އަށް ދިޔުމުން، މޮރިޝަސް މައްސަލާގައި ހާމަ ކުރެވެން ހުރި ހުރިހާ ކަމެއް ހާމަ ކުރައްވާނެ ކަމަށް ރައީސް ޞާލިހު އިއްޔެ ހެނދުނު ވިދާޅުވެފައި ވަނިކޮށްކަންވެސް ފާހަގަކޮށްލަންޖެހެއެވެ.