އެބޯލާ ޖެހި ޔުގާންޑާގައި 29 މީހަކު މަރުވެއްޖެ

އެބޯލާޖެހި ޔުގާންޑާގައި 29 މީހަކު މަރުވެއްޖެއެވެ.

ދުނިޔޭގެ ސިއްޙަތު ޖަމްއިއްޔާ ޑަބްލިޔު.އެޗް.އޯ އިން ބުނާގޮތުގައި މި ނުރައްކާތެރި ބަލި ޖެހުނު މީހުންގެ އަދަދު މިހާރު 63 އަށް އަރާފައިވާ ކަމަށެވެ.

ޔުގާންޑާގައި މި ބަލި ޖެހިފައިވާ މީހުންގެ ތެރޭގައި، މީގެ ކުރިން ބަލި ޖެހުނު މީހުންނަށް ފަރުވާ ދިނުމުގެ މަސައްކަތުގައި ހަރަކާތްތެރިވި ޞިއްޙީ ޚިދުމަތްތެރިން ވެސް ހިމެނޭ ކަމަށް ރިޕޯޓުތައް ބުނެއެވެ.

މި ބަލި ޖެހިފައިވާ ޞިއްޙީ ޚިދުމަތްތެރިންގެ ތެރެއިން ފަސް މީހަކު މިހާރު ވަނީ ބަލިން ފަސޭހަވެފައެވެ. އެ މީހުންނަށް ފަރުވާ ދީފައި ވަނީ އެންޓެބޭގައި ހުންނަ ޞިއްޙީ ފަރުވާދޭ މަރުކަޒެއްގައެވެ. މި ބަލި ޖެހިފައިވާ މީހުންގެ ތެރެއިން ޖުމުލަ 20 މީހަކު ބަލިން ފަސޭހަވެފައިވާ ކަމުގައި އެ ޤައުމުގެ ޞިއްޙީ ވުޒާރާއިން ހާމަކުރެއެވެ.

ޔުގާންޑާގެ ބައެއް ސަރަޙައްދުތަކުގައި ހަލުވިކަމާ އެކު އެބޯލާ ފެތުރެން ފެށުމާ އެކު ބައެއް ޤައުމުތަކުން ވަނީ ރައްކާތެރިކަމުގެ ފިޔަވަޅުތައް އަޅާފައެވެ. މީގެ ތެރޭގައި އެމެރިކާ ހިމެނެއެވެ. އެ ޤައުމުން ވަނީ، ޔުގާންޑާއަށް ދަތުރު ކޮށްފައި އެނބުރި އެ ޤައުމަށް އަންނަ މީހުން ސްކްރީން ކުރުމުގެ މަސައްކަތް ފަށާފައެވެ.

އެބޯލާ ވައިރަސް ޑިޒީޒް (އީ.ވީ.ޑީ) ނުވަތަ އެބޯލާއަކީ ޖަނަވާރުންގެ ފުށުން އިންސާނުންގެ ހަށިގަނޑަށް އަރާ ނުރައްކާތެރި ބައްޔެކެވެ. މި ބަލި ފަތުރާ ޖަނަވާރުތަކުގެ ތެރޭގައި ވައު، ޕޯކިޔުޕައިން އަދި ރާމާމަކުނު ހިމެނެއެވެ.