ބިލުތައް ބޭރުކުރިޔަށް ގާސިމް ކުރައްވާ އިޚުލާސްތެރި މަސައްކަތް ފަނޑެއް ނުކުރެވޭނެ: ޖޭޕީ

ރައްޔިތުންގެ މަޖިލީހަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބުރާހިމް ހުށައެޅުއްވި ބިލުތައް ރައްޔިތުންގެ މަޖިލީހުން ބޭރުކޮށްލެއްވި ނަމަވެސް ގާސިމް ކުރައްވަމުން ގެންދަވާ އިޚުލާސްތެރި މަސައްކަތް ފަނޑުކޮށް ނުލެވޭނެކަމަށް ޖުމްހޫރީ ޕާޓީއިން ބުނެފިއެވެ.

އެމްޑީޕީ ސުޕަރ މެޖޯރިޓީ އޮންނަ ރައްޔިތުންގެ މަޖިލީހުން އިއްޔަ ވަނީ ގާސިމް އިބުރާހިމް ހުށައެޅުއްވި 3 ބިލެއް ބަލައިގަންނަން ނުފެންނަކަމަށް ވޯޓުދެއްވާ މަޖިލީހުން ބޭރުކޮށްފައެވެ.

ގާސިމް ހުށައެޅުއްވި ބިލުތަކުގެ ތެރޭގައި ހިމެނެނީ އިސްލާމްދީނަށް ފުރައްސާރަކުރާ މީހުންނަަށް ދޭ އަބަދު ބޮޑުކުރުމަށް ހުށައެޅުއްވި ބިލަކާއި، އެއް ޖިންސުން ގުޅުން ހިންގުމަކީ ޖިނާއީ ބޮޑު ކުށެއްކަމުގައި ކަނޑައެޅުއްވުމަށް ހުށައެޅުއްވި ބިލުގެ އިތުރުން ރައްޔިތުންގެ މަޖިލީހުގެ މެމްބަރުންގެ އަދަދު 87 އަށް ވުރެ އިތުރު ނުވާގޮތަށް ހުށައެޅުއްވި ބިލެކެވެ.

އެ ތިން ބިލުވެސް އިއްޔެ މަޖިލީހުން ވަނީ ބޭރުކޮށްލާފައެވެ.

އެ ކަމާއި ގުޅޭގޮތުން ޖުމްހޫރީ ޕާޓީގެ ތަރުޖަމާނު އަލީ ސޯލިހު "ވޮއިސް" އިން ކުރި ސުވާލަކަށް ޖަވާބުދެއްވަމުން ވިދާޅުވީ، ގާސިމް މަޖިލީހަށް ހުށައެޅުއްވި ބިލުތަކަކީ އޮއްޓަރުހުރި ބިލުތަކެއްކަން ރައްޔިތުން ގަބޫލުކުރާނެކަމަށެވެ. އަދި އެއީ ރާއްޖޭގެ މަސްލަހަތާއި ގުޅުންހުރި މުހިންމު ބިލުތަކެއްކަމަށެވެ.

އެހެން ނަމަވެސް އެ ބިލުތަކަކީ މުހިންމު ބިލިތަކެއްކަމަށް މަޖިލީހުގެ މެމްބަރުންނަށް ފެނިނުލެއްވިކަމީ ދެތަކަމެއްގެ ގޮތުގއި ސޯލިހު ފާހަގަކުރެއްވިއެވެ. އަދި ވިދާޅުވީ، މަޖިލީހުގައި މިހާރު ކަންކަން ހިނގަމުންދާ ގޮތުން ގާސިލް ހުށައެޅުއްވި ބިލުތައް ބަލައިނުގެންކަމުގައި ވީނަމަވެސް، އެމަނިކުފާނު ކުރައްވާ އިޚްލާސްތެރި މަސައްކަތަށް ފަނޑުވުމެއް ނާންނާނެކަމަށެވެ. އަދި އެ މަސައްކަތުގައި އެމަނިކުފާނު ދެމި ހުންނަވާނެކަމުގެ ޔަގީންކަން ދެއްވާކަމަށް ސޯލިހު ވަނީ ވިދާޅުވެފައެވެ.

ރައްޔިތުންގެ މަޖިލީހަކީ އެމްޑީޕީގެ ސުޕް މެޖޯރިޓީ އޮންނަ ތަނެއްކަމަށް ވުމުން، މުހިންމު ބިލުތައް ބަލައިގަތުމުގައި، އަދި ބިލުތައް ބޭރުކުރުމުގައި އެ އަގުލަބިއްޔަތު ބޮޑު ދައުރެއް އަދާކުރާކަން ގިނަ ޕާޓީތަކުން ފާހަގަކުރެއެވެ. އަދި އެއްވެސް ސިޔާސީ ޕާޓީއަކަށް މަޖިލީހުގެ އެވަރުގެ އަގުލަބިއްޔަތެއް ދިނުމަކީ މަޖިލީހުގެ މަސައްކަތްތައް ކުރިއަށް ގެންދިއުމަށް ހުރަސްއެޅޭ ކަމެއްކަންވެސް ސިޔާސީ ޕާޓީތަކުން ގެންދަނީ ތަކުރާރުކޮށް ފާހަގަކުރަމުންނެވެ.