ކަނޑުމަހުގެ ސްޓޮކް އިޔާދަކުރުމަށް އިންޑިއަން އޯޝަން ޓޫނާ ކޮމިޝަން ފެއިލްވެއްޖެ: ފިޝަރީޒް މިނިސްޓަރު

ކަނޑުމަހުގެ ސްޓޮކް އިޔާދަކުރުމަށް އިންޑިއަން އޯޝަން ޓޫނާ ކޮމިޝަން ފެއިލްވެފައިވާކަމަށް ފިޝަރީޒް މިނިސްޓަރު ޑރ ހުސެއިން ރަޝީދު ވިދާޅުވެއްޖެއެވެ.

ޑރ ހުސެއިން ރަޝީދު މިފަދައިން ވިދާޅުވެފައިވަނީ ތައިލެންޑުގެ ބެންކޮކްގައި ކުރިއަށްދާ 17 ވަނަ އިންފޯފިޝް ވޯލްޑް ޓޫނާ ޓްރޭޑް ކޮންފަރެންސްގައި ވާހަކަފުޅުދައްކަވަމުންނެވެ.

އެ ކޮންފަރެންސްގައި ވާހަކަދައްކަވަމުން މިނިސްޓަރު ވިދާޅުވީ ގާތްގަނޑަކަށް 650 ލައިސެންސް އޮތް މަސްވެރި އުޅަނދު ރަޢްޖޭގައި އޮންނައިރު، މިއީ 17000 އަށް ވުރެ ގިނަ މީހުންނަށް މީގެ ސަބަބުން ވަޒީފާ މަގުފަހިވެގެންދާކަމެއްކަން މިނިސްޓަރ ފާހަގަކުރެއްވިއެވެ. އަދި އެއީ މަސައްކަތު އާބާދީގެ %20 ކަމަށްވެސް މިނިސްޓަރ ވިދާޅުވިއެވެ. މީގެއިތުރުން އަހަރަކު 140000 މަސް ބަނާއިރު، ރާއްޖޭގެ އެކްސްޕޯޓްގެ 98 އިންސައްތައަކީ މަސްކަމަށްވެސް މިނިސްޓަރ ވިދާޅުވިއެވެ.

އޭގެ އިތުުރުން ދިވެހިރާއްޖެއަކީ އެހެން ޤައުމުތަކާއި ޙިލާފަށް، ދެމެހެއްޓެނިވި މަސްވެރިކަން ކުރުމުގައި ކުރިއަރާފައިވާ ޤައުމެއްކަމަށާއި އަދި ޤުދުރަތީ ރީތިކަން ދެމެހެއްޓޭ އުސޫލެއްގެ ގޮތުން ރާއްޖޭގައި އެންމެ ގިނައިން ކުރެވޭ ދޮށީގެ މަސްވެރިކަމުގެ ތަފާތުކަމާއި ޚާއްޞަކަމަށް މިނިސްޓަރގެ ވާހަކަފުޅުގައި އަލިއަޅުވާލިއެވެ.

"ރާއްޖެ ބިނާކުރެވުނީ އަޅުގަނޑުމެންގެ ދޮށީގެ މަސްވެރިކަމުގެ މައިބަދައިގެ މައްޗަށް. މަސްވެރިކަމަކީ އަޅުގަނޑުމެންގެ ދިރިއުޅުމާ ނުހަނު ގުޅި ލާމެހިފައި އޮތް ކަމެއް. ކަނޑުމަހާއި މިއަށްވުރެ ވަރުގަދަ ގުޅުމެއް އެހެން ޤައުމުތަކުން އޮވެދާނެކަމަށް ޤަބޫލެއް ނުކުރަން. އެއީ ޙަޤީޤަތުގައި އަޅުގަނޑުމެންގެ ލޭގައި ހުންނަ އެއްޗެއް. ކަނޑުމަހަކީ އަޅުގަނޑުމެންގެ ފުޑް ސެކިއުރިޓީ، އަޅުގަނޑުމެންގެ ވަޒީފާ، އަޅުގަނޑުމެންގެ މައިގަނޑު ފިޒިކަލް އެތައް ސަތޭކަ އަހަރެއް ވަންދެން ބޭރު ފައިސާގެ މައިގަނޑު ވަސީލަތް."

ފިޝަރީޒް މިނިސްޓަރު ޑރ ހުސެއިން ރަޝިދު

އެކަންކަން ފާހަގަކުރައްވާ މިނިސްޓަރ ވިދާޅުވީ މަސްވެރިކަމުގެ މުހިންމުކަން ރާއްޖެއަށް ކިތަންމެ ބޮޑުކަމުގައިވީނަމަވެސް، މަސްވެރިންނަށް ލިބެނީ ވަރަށް ކުޑަ އާމްދަނީއެއްކަމަށެވެ. އަދި މަހުގެ ސޮޓޮކް ރިކަވަރީގެ މައްސަލަތަކީ ވަރަށް ބޮޑު އަހައްމިއްޔަތުކަމެއް ދޭންޖެހޭ ކަމެއްކަމަށްވެސް ވިދާޅުވިއެވެ.

އެއާއެކު މިނިސްޓަރު ވިދާޅުވީ 2011 ވަނަ އަހަރުން ފެށިގެން ދިވެހިރާއްޖެ ފުރިހަމަ މެންބަރެއްގެ ގޮތުގައި އޮންނަ އިންޑިއަން އޯޝަން ޓޫނާ ކޮމިޝަންއިން މަހުގެ އިއާދަކުރުމުގައި ޙަރުދަނާ އުސޫލުތައް ޤާއިމްކޮށްފައި ނެތުމަކީ މަސްވެރިކަމުގެ ދާއިރާއަށް ކުރިމަތިވާ އެންމެ ބޮޑު ގޮންޖެހުންކަމަށެވެ.

ގިނަ ޤައުމުތަކުން ސްޓޮކް އިއާދަކުރުމުގައި ފަސޭހައިން އިހުމާލުވެ، ދެމެހެއްޓެނިވި ގޮތުގައި މަސްވެރިކަން ކުރުމަށް އެއްވެސް އަހައްމިއްޔަތު ކަމެއް ނުދޭކަމަށްވެސް މިނިސްޓަރ ވިދާޅުވިއެވެ.

އެހެންކަމުން މިފަދަ ދެމެހެއްޓެނިވި ގޮތުގައި ކުރުމަށް ޙައްސަ އަޙައްމިޔަތުކަމެއް ދިނުމާއި، ސޮޓޮކް އިއާދަކުރުމުގައި ޙަރުދަނާ އުސުޅޫތައް ޤާއިމްކުރުމަށް މަދަނީ މުޖްތަމަޢާއި، އަމިއްލަ ޖަމްޢިއްޔާ ޖަމާޢަތްތަކާއި، އެމް.އެސް.ސީ އަދި އެހެނިހެން އިކޯ ލޭބަލްތައް ޢަމަލީގޮތުން ޙަރަކާތްތެރިވުމަށް މިނިސްޓަރުގެ ވާހަކައިގައި ވަނީ ގޮވާލައްވާފައެވެ.