ރަޖިސްޓްރީ ހެދޭނީ ތަފްސީލު ދީގެން، ބިދޭސީންގެ މައުލޫމާތު ހޯދަން އެދުނުތާ 2 އަހަރު!
ތޮއްޖެހިގެން ކުދިކުދި ތަންތަންކޮޅުގައި ދިރިއުޅެމުންދާ ބިދޭސީންގެ ތަފްސީލު ހާމަކުރުމަށް ގޮވާލާ އެމްޑީޕީގެ ކުރީގެ ޗެއަރޕާރސަން އަދި ޕީޖީ ލީޑަރު މޫސަ މަނިކު (ރީކޯ މޫސަ) ދެއްކެވި ވާހަކަތަކަށް މާލޭ ސިޓީކައުންސިލްގެ ހުޅުމާލޭ ދާއިރާގެ މެމްބަރު އިބްރާހިމް ޝުޖާއު ރައްދުދެއްވައިފިއެވެ.
މީގެ ދެ ދުވަސްކުރިން މާލޭގައި ނުރައްކާތެރި އަލިފާނުގެ ހާދިސާއެއް ހިނގާ 11 މީހުން ނިޔާވުމާއި ގުޅިގެން ކުދިކުދި ތަންތަންކޮޅުގައި ދިރިއުޅެމުންދާ ބިދޭސީންގެ ވާހަކަތައް އަނެއްކާވެސް ވަނީ ދައްކަން ފަށައިފައެވެ.
އެގޮތުން ރީކޯ މޫސަ ކުރެއްވި ޓްވީޓެއްގައި ވަނީ މާލޭސިޓީ ގެ ދިރާސާއެއްކުރައްވާފައިވާނަމަ ގަރާޖްހުރިއަދަދާ ގަރާޖްނެތި މަގުތައްމަތީ ވެހިކަލްމަރާމާތުކުރާއަދަދުތަކާއި ކުދި ކޮޓަރިތަކުގަ ތޮއްޖެހިގެން ދިރިއުޅޭ ބިދޭސީންގެ ސައްޙަރިޕޯޓު މާލޭރައްޔަތުންނަށް ހާމަކޮށްދެއްވުމަށް މާލޭ ސިޓީގެ މޭޔަރު ޑރ މުހައްމަދު މުއިއްޒު އަރިހުން އެދިލައްވާފައެވެ.
ރީކޯ މޫސަގެ އެ ޓްވީޓަށް ރައްދުދެއްވަމުން ޝުޖާއު ވިދާޅުވީ މާލޭ ސަރަހައްދުގައި ދުއްވާ އެއްގަމު އުޅަނދުފަހަރާއި، ދިރިއުޅޭ ބިދޭސީންގެ މައުލޫމާތު ހޯދުމަށް ސަރުކާރުގައި މާލޭ ސިޓީ ކައުންސިލުން އެދޭތާ 2 އަހަރު ވެފައިވާކަމަށެވެ.
އެފަދަ ސައްހަ ރަޖިސްޓްރީއެއް ހެދޭނީ ސަރުކާރުން ފޯރުކޮށްދޭން ޖެހޭ މައުލޫމާތުތައް ފޯރުކޮށްދީގެންކަމަށާއި، މައުލޫމާތު ހޯދަނަ އެދުނުތާ 2 އަހަރުވެގެން ދިޔައިރުވެސް ސަރުކާރުން އެ މައުލޫމާތު ފޯރުކޮށްދީފައި ނުވާކަން ޝުޖާއު ފާހަގަކުރެއްވިއެވެ. އަދި ވިދާޅުވީ ޤާނޫނުގައި ކައުންސިލުން ކުރުމަށް ލާޒިމުކޮށްފައިވާ ކަންކަން ނުކުރެވި ލަސްވަނީ އަދި އެކަންކަން ނުކުރެވިގެން ކައުންސިލަށް ދަތިވެގެން އުޅެނީ ސަރުކާރުން އެއްބާރުލުން ނުދޭތީކަމަށެވެ.
ޝުޖާއު ވިދާޅުވީ ކައުންސިލްތައް ބާރުވެރިކުރުމުގެ ނަމުގައި ވިޔަވަތި ކޮންފަރެންސްއެއް އެކަނި ބާއްވާލުމުން ކައުންސިލްތަކަށް ދިމާވެފައިވާ މައްސަލަތައް ހައްލުވެގެން ނުދާނެކަމަށެވެ. ސަރުކާރުގެ މުއައްސަސާތަކުން ކައުންސިލްގެ ކަންކަމުގައި ފަރުވާ ކުޑަކުރާކަމަށާއި، ކައުންސިލްތަކުން ކަންކަމަށް އެދުމުން އެއް މުއައްސަސާ އަނެއް މުއައްސަސާގެ ބޮލަށް ކަންކަން ޖަހަމުންދާކަމަށްވެސް ޝުޖާއު ވަނީ ވިދާޅުވެފައެވެ.
ޕީޕީއެމް މެޖޯރިޓީ މާލޭ ކައުންސިލަށް ލިބުމުން ސަރުކާރުން، އެ ކައުންސިލަށް އެއްބާރުލުން ނުދޭ ޝަކުވާ މާލޭ ސިޓީ ކައުންސިލުން މީގެ ކުރިންވެސް އެތައް ފަހަރަކު ކޮށްފައިވާކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
