ތުރުކީން މަނަވަރެއް ހަދިޔާކުރާކަން ސަރުކާރުން ހާމަކޮށްފި، އެއީ ހިލޭ އެހީއެއް

ތުރުކީން ޑޯގަން ކްލާސް މަނަވަރެއް ހަދިޔާކުރަން ނިންމާފައިވާ ކަމަށް ސަރުކާރުން މިރޭ ރަސްމީކޮށް ހާމަކޮށްފި އެވެ.

ޑިފެންސް މިނިސްޓްރީން ބަޔާނެއް ނެރެ އެކަން ހާމަކޮށްފައި މިވަނީ މިސައިލު ފޮނުވޭ ޒަމާނީ މަނަވަރެއް ތުރުކީން ރާއްޖެއަށް ހަދިޔާ ކޮށްފައިވާ ކަމަށް އެ ގައުމުގެ ނޫސްތަކުން ރިޕޯޓްކޮށްފައި ވަނިކޮށެވެ. އޭގެ ކުރީން ދިވެހި ސަރުކާރުން މިސައިލުތަކެއް, ތުރުކީން ގަންނަން އުޅޭ ކަމަށް ވެސް ވާހަކަތައް ފެތުރުނެވެ.

ޑިފެންސް އިން މިރޭ ނެރުނު ބަޔާނެއްގައި ބުނެފައި ވަނީ ތުރުކީން ޑޯގަން ކްލާސް މަނަވަރެއް ހަދިޔާކުރަން ނިންމާފައިވާ ކަމަށެވެ. އެއީ ހިލޭ އެހީގެ ގޮތުގައި ހަދިޔާ ކުރާ އުޅަނދެއް ކަމަށް ވެސް ބުންޏެވެ. އަދި ބުނީ މި އުޅަނދު ރާއްޖެ ގެނެސް ޚިދުމަތަށް ނެރެ މި އުޅަނދު އޮޕަރޭޓްކުރުމަށް ތައްޔާރުވުމުގެ ގޮތުން ތުރުކީގައި ދިވެހި ސިފައިން ތަމްރީނު ވަމުންދާ ކަމަށެވެ.

ރައީސް އެންމެ އިސްކަން ދެއްވަނީ މިނިވަންކަން ހިމާޔަތްކުރުމަށް

ޑިފެންސް މިނިސްޓްރީގެ ބަޔާނުގައި ބުނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެ ބޮޑު އިސްކަމެއް ދެއްވާ ސިޔާސަތަކީ ރާއްޖޭގެ މިނިވަންކަމާއި ސިޔާދަތާއި އިސްތިގުލާލު ހިމާޔަތްކޮށް ރައްކާތެރި ކުރުން ކަމަށެވެ. އަދި ބުނީ އެމަނިކުފާނު މަގާމާއި ހަވާލުވެވަޑައިގެންނެވި ފުރަތަމަ ދުވަހުން ފެށިގެން މި ސިޔާސަތު ތަންފީޒު ކުރެއްވުމަށްޓަކައި މުހިންމު މަސައްކަތްތަކެއް ކުރައްވަން ފައްޓަވާފައިވާ ކަމަށެވެ.

އެގޮތުން ރާއްޖޭގެ ގައުމީ ދިފާއީ ބާރުގެ ކޯސްޓްގާޑު ދެގުނަ ކުރައްވައި ގާބިލުކަން އިތުރުކުރެއްވުމަށް ރައީސުލްޖުމްހޫރިއްޔާ ކަނޑައަޅުއްވާފައިވާ ކަމަށެވެ.

އެ ދަނޑުދަނޑިއަށް ވާސިލުވުމަށްޓަކާ ރަހްމަތްތެރި ގައުމުތަކާއެކު ބަދަހި ކުރައްވަމުން ގެންދަވާ ކަމަށެވެ. ތުރުކީން މަނަވަރެއް ހަދިޔާކުރުމުަކީ އެ ގުޅުންތަކުގެ ނަތީޖާ ކަމަށް ވެސް ބުންޏެވެ.

މި އުޅަނދު ސިފައިންގެ ހިދުމަތަށް ތައާރަފު ކުރެވުމަކީ ރާއްޖޭގެ ކަނޑުގެ ސަރަހައްދުގެ ސަލާމަތްތެރިކަން ކަށަވަރު ކުރުމާއި އިންޑިއާ ކަނޑުގެ ސަލާމަތާއި ރައްކާތެރިކަން ދެމެހެއްޓުމަށް ބައިނަލްއަޤްވާމީ މުޖްތަމަޢުގެ ޒިންމާދާރު މެންބަރެއްގެ ހައިސިއްޔަތުން ރާއްޖެއިން އަދާކުރަން ޖެހޭ ދައުރު ފުރިހަމައަށް އަދާކުރުމުގެ ޤާބިލްކަން ހުރި ބަޔަކަށް ދިވެހި ސިފައިން ހެއްދެވުމަށް ރައީސް ކަނޑައަޅުއްވާފައިވާ ދަނޑުދަނޑިއަށް ވާސިލުވުމަށް ނެގުނު މުހިންމު ފިޔަވަޅެއް ކަމުގައި ވެސް ޑިފެންސްގެ ބަޔާނުގައި ވަނީ ބުނެފަ އެވެ.