ރައީސް ޔާމީނަށް ލިބޭ އިސްތިއުނާފު ކުރުމުގެ ހައްގަށް ސަރުކާރުން ވަނީ ހުރަސްއަޅާފަ: ޒޭން ޔާމީން

ކުރީގެ ރައީސް ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން ކުރި 11 އަހަރުގެ ޖަލު ހުކުމް، މަތީ ހޯޓުގައި އިސްތިއުނާފުކުރުމަށް އެމަނިކުފާނަށް ގާނޫނު އަސާސީއިން ލިބިވަޑައިގަންނަވާ ހައްގަށް ސަރުކާރުން ހުރަސްއަޅާފައި ވާ ކަމަށް ރައީސް ޔާމީންގެ ދޮށީ ދަރިކަލުން ޒޭން ޔާމީން ވިދާޅުވެއްޖެ އެވެ.

މިދިޔަ ޑިސެމްބަރު މަހުގެ 25 ގައި ކްރިމިނަލް ކޯޓުން ރައީސް ޔާމީންގެ މައްޗަށް ޖަލު ހުކުމެއް ކޮށްފައިވަނީ ވ. އާރަށް ކުއްޔަށް ދޫކުރުމުގެ މުއާމަލާތާއި ގުޅިގެން އެމަނިކުފާނުގެ މައްޗަށް ދައުލަތުން ކުރި ދެ ދައުވާ (ރިޝްވަތު ގަބޫލުކުރުމާއި މަނީ ލޯންޑަރިންގެ ދައުވާ) ސާބިތުވާކަމަށް ކަނޑައެޅުމަށްފަހުގަ އެވެ.

އެހެން ނަމަވެސް އެ ހުކުމަކީ ސިޔާސީ ހުކުމެއްކަމަށާއި، ހުކުމް ބަލައި ނުގަންނަކަމަށް ރައީސް ޔާމީންގެ ފަރާތްޕުޅުން ވަނީ ވިދާޅުވެފައެވެ.

އެދުވަހުގެ ޝަރީއަތަށްފަހު ރައީސް ޔާމީންގެ ގާނޫނީ ވަކީލުން ނޫސްވެރިންނަށް މައުލޫމާތު ދެއްވަމުން ވިދާޅުވީ، ކްރިމިނަލް ކޯޓުން ރައީސް ޔާމީންގެ މައްޗަށް ކޮށްފައިވާ ހުކުމް ހައިކޯޓުގައި އިސްތިއުނާފު ކުރައްވާނެކަމަށެވެ.

އެހެން ނަމަވެސް، މިހާތަނަށް އެ މައްސަލަ އިސްތިއުނާފުކޮށްފައި ނުވާއިރު، މައްސަލަ އިސްތިއުނާފު ކުރުމަށް ބޭނުންވާ މުހިންމު ލިޔެކިޔުންތައް މިހާތަނަށްވެސް ކްރިމިނަލް ކޯޓުން ފޯރުކޮށްދީފައި ނުވާކަމަށް ގާނޫނީ ޓީމުން ވަނީ ހާމަކުރައްވާފައެވެ.

އެގޮތުން އިސްތިއުނާފުކުރުމަށް ކޮންމެހެން މުހިންމު ލިޔެކިޔުމެއްކަމަށްވާ މައްސަލަ ނިންމި ގޮތުގެ ރިޕޯޓު ގާނޫނީ ވަކީލުންނާއި ހަވާލުކޮށްފައި ނުވާކަމަށް ރައީސް ޔާމީންގެ ގާނޫނީ ވަކީލުން ވަނީ ވިދާޅުވެފަ އެވެ. އަދި އެކަމުގެ ކަންބޮޑުވުންތައްވެސް ގާނޫނީ ޓީމުން ދަނީ ފާޅުކުރައްވަމުން ނެވެ.

އެކަމަށް އިޝާރާތް ކުރައްވާ ކުރެއްވި ޓްވީޓެއްގައި ރައީސް ޔާމީންގެ ދަރިކަލުން ޒޭން ވިދާޅުވީ ދަށު ކޯޓުން ކުރާ ހުކުމް މަތީ ކޯޓެއްގައި އިސްތިއުނާފުކުރުމުގެ ހައްގަކީ ކޮންމެ ރައްޔިތަކަށްވެސް ލިބޭ ހައްގަކަށްވާއިރު، ރައީސް ޔާމީންގެ އެ ހައްގަށް ސަރުކާރުން ހުރަސްއަޅަމުންދާކަމަށެވެ. އަދި ސަރުކާރުގެ ނުފޫޒު ވަރަށް ބޮޑަށް އެ މައްސަލައަށް ފޯރުވަމުންދާކަމަށް ޒޭން ވިދާޅުވިއެވެ.

އޭގެ އިތުރަށް ޒޭން ވިދާޅުވީ އިންސާފު ލިބުން ލަސްވުމަކީ އިންސާފު ނުލިބުމާއި އެއްފަދަ ކަމެއްކަމަށެވެ.

ރައީސް ޔާމީންގެ މައްޗަށް ކްރިމިނަލް ކޯޓުން 11 އަހަރުގެ ޖަލު ހުކުމެއް ކޮށްފައިވާއިރު، އެމަނިކުފާނަކީ ޕީޕީއެމްގެ ރިޔާސީ ކެންޑިޑޭޓެވެ.

އެމަނިކުފާނުގެ މައްޗަށް ކޮށްފައިވާ ހުކުމަކީ "ހަރާން ހުކުމެއް" ކަމަށް ބުނެ އިދިކޮޅުން ގެންދަނީ ސިލްސިލާގޮތެއްގައި މުޒާހަރާކުރަމުން ނެވެ. އަދި ރައީސް ޔާމީން މިނިވަން ކުރުމަށް ގޮވާލާ ރާއްޖޭގެ އެކި ކަންކޮޅުތަކުގައި އެމަނިކުފާނުގެ ސަޕޯޓަރުން ދަނީ އަޑުއުފުލަމުން ނެވެ.