ޞަމަދު ހުރީ އިމްގްރޭޝަން ބަންދުގައި، މިއަދު ރާއްޖެ ގެންނާނެ: ފޮރިންގ މިނިސްޓްރީ

އާއިލާއާއި އެކު ބޭސްފަރުވާ އަށް އިންޑިޔާއަށް ގޮސް ހުއްޓައި ހިފެހެއްޓި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ހުޅުމާލެ ދާއިރާގެ ރައީސް ޢަބްދުއް ޞަމަދު (ސަމަދުބެ) ހުރީ އިމިގްރޭޝަން ބަންދުގައި ކަމަށާއި، މިއަދު އޭނާ މާލެ ގެންނާނެ ކަމަށް ފޮރިންގ މިނިސްޓްރީ އިން ބުނެފިއެވެ.

މިމަހުގެ 11 ވަނަ ދުވަހު ޞަމަދުބެ ހައްޔަރުކޮށްފައިވަނީ ބެންގަލޫރުގެ މަނިޕާލް ހޮސްޕިޓަލުގެ ތެރެއިންކަމަށް "ވޮއިސް" އަށް ވަނީ މައުލޫމާތު ލިބިފައެވެ. އޭނާ ހައްޔަރުކުރުމުގައި ހަރަކާތްތެރި ވެފައިވަނީ އިންޑިއާގެ އިމިގްރޭޝަން އޮފިސަރުންތަކެކެވެ.

ޞަމަދު މިއަދު މާލެ ގެނައުމަށް ހަމަޖެހިފައިވަނީ މާދަމާ 12:10 ގައި އަންނަ AI265 ބޯޓުގައެވެ.

ފޮރިންގ މިނިސްޓްރީ އިން އާއިލާ އަށް މައުލޫމާތު ދީފައިވަ ގޮތުން ޞަމަދުގެ ހާލުރަނގަޅެވެ. އަދި މެންދުރުގެ ކެއުންވެސް އިންޑިޔާގެ އިމިގްރޭޝަން އިން ޞަމަދަށް ފޯރުކޮށްދިން ކަމަށްވެސް އެމިނިސްޓްރީއިން ވިދާޅުވެފައިވާކަމަށް ޞަމަދުގެ އާއިލާއިން "ވޮއިސް" އަށް މައުލޫމާތު ދީފައިވެއެވެ.

ޞަމަދުގެ އިންޑިއާއަށް ދިޔައީ އާއިލާގެ އިތުރު 3 މީހަކާއި އެކު ޑޮކްޓަރަށް ދެއްކުމަށް، މިމަހު 10 ވަނަ ދުވަހުއެވެ. އަދި އޭނާ އިންޑިއާއަށް ދިޔައިރު، އެއާޕޯޓުން އެއްވެސް މައްސަލައެއް ޖެހިފައެއް ނުވެއެވެ.

އެހެން ނަމަވެސް ހޮސްޕިޓަލުގައި ހުއްޓާ އޭނާ ހައްޔަރުކޮށް ޑީޕޯޓު ކުރުމުގެ މަސައްކަތް މިހާރު ކުރަމުންދާކަމަށް އާއިލާއިން ވަނީ މައުލޫމާތު ދީފަ އެވެ.

އެކަމާއި ގުޅިގެން ފޮރިން މިނިސްޓްރީން ބުނީ، ބެންގަލޫރުގައި ހުރި ދިވެއްސަކު 11 ފެބްރުއަރީ 2023ގައި އިންޑިއާގެ އިމިގްރޭޝަން އޮފިސަރުންގެ ބެލުމުގެ ދަށަށް ގެންގޮސްފައިވާ ކަމުގެ މަޢުލޫމާތު ލިބުމާ ގުޅިގެން، މިމައްސަލައާ ގުޅޭ ގޮތުން އިތުރަށް ސާފުކުރަންޖެހޭ ކަންކަން އިންޑިއާގެ ކަމާބެހޭ ފަރާތްތައް މެދުވެރިކޮށް ސާފުކުރަމުންދާ ކަމަށެވެ.