ޑްރަގް އެތެރެކުރާ ބޭރު މީހުން ފޮނުވާލެވޭ ގަވައިދަކީ ރައީސް އޮފީހުން ހިންގި ޖަރީމާއެއް: ސައީދު

ދިވެހިރާއްޖެއަށް ޑްރަގް އެތެރެކުރާ ބޭރު މީހުން އަނބުރާ ފޮނުވާލުމަށް ގަވައިދު އެކުލަވާލުމަކީ ރައީސް އޮފީސް އަޑީގައި އޮވެގެން ހިންގި ޖަރީމާއެއްކަމަށް މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ތުހުމަތުކުރައްވައިފި އެވެ.

ސައީދު މިފަދައިން ތުހުމަތުކުރައްވާފައި ވަނީ ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ 4 ވަނަ ޖަލްސާއަށް ހަސަން ލަތީފު ހުށައެޅުއްވި ކުއްލި މައްސަލައަށް މަޖިލީހުގައި ބަހުސް ކުރައްވަމުންނެވެ.

ސައީދު ވިދާޅުވީ އިމިގްރޭޝަނަށް އެ މުއައްސަސާގެ އަމިއްލަ އިސް ނެންގެވުމުގެ ތެރެއިން މިފަދަ ގަވައިދެއް އެކުލަވާ ނުލެވޭނެކަމަށެވެ. އެފަދަ ގަވައިދެއް ހަދާކަމަށް ވާނަމަ ރައީސް އޮފީހުގައި އެކުލަވާލާފައިވާ ސޯޝަލް ކައުންސިލަށް ހުށައަޅަން ޖެހޭ ކަމަށާއި، އެތަނުން ވަކި ގޮތެއް ފާސްވެގެން ނޫނީ އެފަދަ ގަވައިދެއް އެކުލަވާ ނުލެވޭނެކަމަށް ސައީދު ވިދާޅުވިއެވެ.

"ހަމަ ކަނޑައެޅިގެން އެނގިގެންދޭ 2011 ގައި ހެދި މަސްތުވާތަކެތި އެތެރެކުރުމާއި ބެހޭ ގާނޫނާއި ތައާރަޒުވާކަން.. ފުށުއަރާކަން. ސޯޝަލް ކައުންސިލެއް އެބަ އޮވޭ. ސޯޝަލް ކައުންސިލުން ބަލާފަ ނޫނީ މިފަދަ ހައްސާސް ގަވައިދުތަކެއް ނުހަދާނެ އިއްޒަތްތެރި ރައީސް. ސޯޝަލް ކައުންސިލަކީ ކެބިނެޓުގެ އެއް ފަންކްޝަން. މަސްތުވާތަކެއްޗާއި ބެހޭ ގަވައިދެއް އިސްލާހުކުރާ އިރުގައި ހަމަޔަގީން ކަށަވަރު އިމިގްރޭޝަން އަމިއްލައަކަށް މި ކަމެއް ނުނިންމާނެ"

މާވަށު ދާއިރާގެ މެމްބަރު ސައީދު

ސައީދު ވިދާޅުވީ ކަންކަން ހިނގާފައިވާ ގޮތަށް ބަލާއިރު، މި ގަވައިދު އެކުލަވާލުމަކީ ރައީސް އޮފީހުން ހިންގި ޖަރީމާއެއްކަމަށް ގަބޫލު ކުރައްވާކަމަށެވެ.

"މިކަމަކީ އިމިގްރޭޝަން އެކަނި ކޮށްގެން އުޅޭ ކަމެއް ނޫނޭ. ސަރުކާރުގެ ފުރިހަމަ އިހުމާލު އޮވެގެން ކޮށްފަ އޮތް، ހިންގާފައި އޮތް ވަރަށް ބޮޑު ޖަރީމާއެއް. އެކަން މި މަޖިލީހުން އެ އެނގިގެން ދިޔައީ. ވިޕް ލައިނެއް އަޅާފަ އެމްޑީޕީގެ ގިނަ މެމްބަރުން ރަތް ޖަހަން ވެގެން ނިންމި ނިންމުން. އެހެންވެގެން މި ދެންނެވީ އެ އެއްޗަކުން ނިކުންނާނީ އެ އެއްޗެއްގެ ހުރި ދިޔައެކޭ.. ރައީސް އޮފީސް ތެރެއިން ހިންގައިގެން އުޅޭ ޖަރީމާއެއް މިއީ"

މާވަށު ދާއިރާގެ މެމްބަރު މުހައްމަދު ސައީދު

މި ގަވައިދާއެކު ރާއްޖެއަށް މަސްތުވާތަކެތި އެތެރެކުރުމަށް އޮތީ ހުއްދަ ދެވިފައި ކަމަށާއި، މި ގަވައިދު މިގޮތަށް އޮތުމުން މަސްތުވާ ތަކެތި އެތެރެކުރާ މީހުންނަށް ދިވެހި ސަރުކާރުން ރައްކާތެރިކަން ދޭނެކަން އެމީހުންނަށްވެސް ގަބޫލު ކުރެވޭ ހިސާބަށް ޔަގީންކަން ލިބިގެން ގޮސްފައިވާކަން ސައީދުގެ ވާހަކައިގައި ފާހަގަކުރެއްވި އެވެ.

އެއާއެކު ސައީދު ވިދާޅުވީ މި ގަވައިދު ހެދުމުގައި ޝާމިލުވާ ފަރާތްތަކާއި، އަދި މިފަދަ ގަވއިދެއް ހެދުމަށް ފުރުސަތު ފަހިކޮށްދިން ހުރިހާ ފަރާތްތައް މިކަމުގެ ޒިންމާ ފުރިހަމަޔަށް ނަންގަވަން ޖެހޭނެކަމަށެވެ.