ދައުރެއް ނިންމާލި އިރު ދިވެހި ކުންފުންޏެއް ލައްވާ ތާރު އަޅަން ނޭންގުނު: މޫކޭ
މި ސަރުކާރުން ތާރު އަޅަނީ ދިވެހި ކުންފުނި ތަކުން ކަމަށް ރޯޑު ޑިވެލޮޕްމަންޓް ކޯޕަރޭޝަން (އާރުޑީސީ) މެނޭޖިންގ ޑިރެކްޓާ މޫސާ އަލި މަނިކު (މޫކޭ) ވިދާޅުވެއްޖެއެވެ.
އޭނާ މިހެން ވިދާޅުވެފައިވަނީ އަމީނީމަގުގައި ތާރު އެޅުމުގެ މަސައްކަތް އާރްޑީސީއިން އެމްޓީސީސީ އާއި ހަވާލުކުރުމުން, އާރްޑީސީއާއި މޫކޭ އަށް އިދިކޮޅު ކޯލިޝަނުން އަމާޒުކުރެވިފައިވާ ފާޑުކިޔުންތަކަށް ރައްދު ދެއްވާ މިއަދު ކުރި ޓްވީޓެއްގައެވެ.
އެގޮތުން މޫކޭ ވިދާޅުވެފައިވަނީ ދައުރެއް ނިންމާލި އިރު ދިވެހި ކުންފުންޏެއް ލައްވާ ތާރު އަޅަން ނޭންގުނު ބަޔަކަށް މިއީ އާ ކަމަކަށް ވެދާނެކަމަށެވެ.
އެގޮތުން ކުރީގެ ސަރުކާރުން ތާރަ އެޅީ ބޭރު ކުންފުނިތައް ކަމަށް ފާހަގަ ކުރަމުން މޫކޭ ވިދާޅުވެފައިވަނީ މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަން (އެމްއާރްޑީސީ) އިން ތާރު އެޅީ ސިއެރާ ކުންފުންޔާއި ސަބް ކޮންޓްރެކްޓް ކޮށްގެންކަމަށެވެ. އަދި ޕީޑަބްލިއުއެސް އިން ސިއެރާ މެޝިނަރީޒްގަ ޗައިނާ ކުންފުނީގެ އެހީގައި ކަމަށެވެ.
މީގެ އިތުރުން މޫކޭ ވަނީ މިއަދު ދިވެހި ކުންފުނި ތަކުގައި މިކަން ކުރުމުގެ ޤާބިލްކަން ހުރި ކަމަށް ފާހަގަ ކޮށްފައެވެ.
އަމީނީ މަގުގައި ތާރު އެޅުން އެމްޓީސީސީ އާއި ހަވާލު ކުރުމާއިއެކު މި ކުންފުނިން އިއްޔެ ބުނެެފައިވަނީ މި ހަފްތާގެ ބުދަ ދުވަހުގެ ނިޔަލަށް އަމީނީ މަގު އިރުން ސްޓެލްކޯ އިމަރާތާއި ހަމަޔަށް ތާރު އަޅާ ނިންމޭނެކަމަށެވެ.
މިއާއިއެކު ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ އަމީނީ މަގުގައި ތާރު އެޅުމުގެ މަސައްކަތް އެމްޓީސީސީއާއި ހަވާލުކުރީ އަމީނީމަގުގައި ތާރުއެޅުން ލަސްވެ، އާންމުންނަށް ތަކުލީފުތަކެއް އުފުލަން ޖެހިފައިވާތީ، އެ މައްސަލައަށް އަވަސް ހައްލެއް ކަމަށެވެ.
ތާރުއެޅުން އެމްޓީސީސީއާ ހަވާލުކުރީ އެ ކަމަށްޓަކައި އާރުޑީސީން ރާއްޖެ ގެނެސްފައިވާ މެޝިން ބަހައްޓާނެ ޖާގަ ހަމަނުޖެހި ދުވަސްތަކެއް ވާތީކަންވެސް އަކްރަމް ފާހަގަކުރެއްވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
