ހާރިސްގެ މަރުގެ މައްސަލަ ހައިކޯޓުގައި އިސްތިއުނާފުކޮށްފި

ހުޅުމާލޭގައި ވަޅިން ހަމަލާދީ ހާރިސް އަބްދުލްޣަފޫރު މަރާލި މައްސަލަ ހައި ކޯޓުގައި އިސްތިއުނާފުކޮށްފި އެވެ.

ހުޅުމާލޭގެ ފުރަތަމަ ފިޔަވަހީގައި ހިންގާ ހާފްވޭ ހައުސް ކައިރީގައި 2017 ވަނަ އަހަރުގެ ސެޕްޓެމްބަރު މަހު ހާރިސް އަބްދުލް ޣަފުރޫ މަރާލަން ހަށިގަނޑުގެ 15 ތަނަކަށް ފުން ޒަޚަމްތަކެއް ދިނެވެ. އޭނާ މަރުވެފައިވަނީ ދީފައިވާ ޒަހަމްތަކުން ގިނަ އަދަދެއްގެ ލޭ ބޭރުވެ، ހަށިގަނޑުގައި ވިންދު ހިންގަން ބޭނުންވާ މިންވަރަށް އޮކްސިޖަން ހަށިގަނޑުގައި ނެތުމުން ކަމަށް ފުލުހުން ވަނީ ބުނެފައެވެ.

މި މައްސަލާގައި ދައުލަތުން ދައުވާ ކުރީ ޏ. ފުވައްމުލައް ހިލްޓަން، ޔާމީން ރަޝީދުގެ މައްޗަށެވެ. އެއީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ.

ނަމަވެސް ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ ޔާމީންގެ މައްޗަށް ސާބިތު ނުވާ ކަމަށް މިދިޔަ ޑިސެމްބަރު މަހުގެ 29 ވަނަ ދުވަހު ކްރިމިނަލް ކޯޓުން ވަނީ ހުކުމް ކޮށްފަ އެވެ.

އެގޮތުން ކުރި ހުކުމުގައި ހާރިސް އަށް ހަމަލާދީފައިވަނީ މޫނު ނިވާކޮށްގެން ކަމަށް ހެކިވެރިން ވަނީ ބުނެފައެވެ. އަދި އެހަމަލާ ދިނީ ޔާމީން ކަމެއް އެއްވެސް މީހަކަށް އެނގިފައި ނުވާކަމަށް ވެސް ބުނެފައިވެއެވެ.

އެކަމާއި ގުޅިގެން ޕީޖީ އޮފީހުން މިއަދު ބުނީ، 29 ސެޕްޓެންބަރު 2017 ދުވަހުގެ 21:56 އެހައިކަށްހައިއިރު، ހުޅުމާލެ ހާފްވޭ ހައުސް ކައިރީގައި ގއ. ދާންދޫ، ގޯލްޑްލީފް، ހާރިސް ޢަބްދުލްޣަފޫރުއަށް ތޫނުއެއްޗަކުން ޙަމަލާދިނުމުގެ ސަބަބުން މަރުވި މައްސަލައިގައި، ޏ. ފުވައްމުލައް، ހޯދަޑު، ހިލްޓަން ޔާމީން ރަޝީދުގެ މައްޗަށް ކްރިމިނަލް ކޯޓަށް ހުށަހެޅި ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ ސާބިތުނުވާކަމަށް 29 ޑިސެންބަރު 2022 ދުވަހު ކްރިމިނަލް ކޯޓުން ޙުކުމްކުރެއްވުމާ ގުޅިގެން، އެ މައްސަލަ 12 ފެބްރުވަރީ 2023 ދުވަހު ދިވެހިރާއްޖޭގެ ހައިކޯޓުގައި އިސްތިއުނާފުކޮށްފައިވާ ކަމަށެވެ.

މި މައްސާލާގައި މީގެ ކުރިން ކްރިމިނަލް ކޯޓުގައި ކުރިއަށް ދިޔަ އަޑުއެހުމެއްގައި ހެކިބަސްދިން ފުލުހަކު ވަނީ މީގެ ކުރިން އެދެމީހުންގެ މެދުގައި މާރާމާރީއެއް ހިނގިކަން ފާހަގަ ކޮށްފައެއްވެ. އަދި އޭނާ ދިރިއުޅެމުން ދިޔަ ގެ ބަލައި ފާސްކުރިއިރު، އެ ގޭގެ އަލަމާރިއަކުން ބޮނޑިކޮށްފައި އޮތް ޖިންސެއްގެ ތެރެއިން ލޭ ކަމަށް ޝައްކުކުރެވޭ އެއްޗެއް ފެނިފައި ވެއެވެ.

ޖިންސުން ޔާމީންގެ ލޭ ފެނި، ހާދިސާ ހިނގި ސަރަހައްދުން ފެނުނު ފައިވާނުން ވެސް ޔާމީނުގެ ޑީއެންއޭ ލިބިފައިވީނަމަވެސް، ޖިންސުން ފެނުނު ލެއަކީ އޭގެ ކުރިން ހިނގި މާރާމާރީގެ ލެއަށްވުމުގެ ފުރުސަތު އޮތް ކަމަށް ކްރިމިނަލް ކޯޓުގެ ހުކުމުގައި ވަނީ ބުނެފައެވެ.

މިކަންކަމަށް ބަލައި މައްސަލަ ބެއްލެވި ގާޒީ ވަނީ ޔާމީނުގެ މައްޗަށް އެކުށް ސާބިތު ނުވާ ކަމަށް ނިންމާފައެވެ.

ހާރިސް މަރާލީ ކ. ހިންމަފުށީ ޑްރަގް ރިހިބެލިޓޭޝަން ސެންޓަރުން ފަރުވާ ހޯދުމަށް ފަހު ހުޅުމާލެ ހާފްވޭ ހައުސްއަށް ދާން ވެގެން އެ ތަނަން ވަންނަން އުޅެނިކޮށެވެ. ހުޅުމާލެ ހާފްވޭ ހައުސްއަކީ މަސްތުވާތަކެތީގެ ފަރުވާ ހޯދާ މީހުން ބައިތިއްބާ ތަނެކެވެ.

ހާރިސް އޭރު ގެންދިޔައީ މަސްތުވާތަކެތީގެ މައްސަލައެއްގައި ތިން އަހަރުގެ ޖަލު ހުކުމެއް ތަންފީޒު ކުރަމުންނެވެ. އެ ހުކުމް އިއްވުމުގެ ކުރިން ހާރިސް އާއި ޔާމީން ރަޝީދު ދެމެދު 2015 ވަނަ އަހަރު ތެރޭ މާރާމާރީއެއް ހިންގި ކަމުގެ ރެކޯޑް ވެސް ފުލުހުގައި އޮތެވެ.

ހާރިސް މަރާލި ކަމުގެ ތުހުމަތު ކުރެވުނީ ޔާމީންއާއި ސައިކަލުގައި ދެން އިން މީހާއަށެވެ. އެކަމަކު ދެން އިން މީހާއަކީ ކާކުކަން މިހާތަނަށް ހަމާވެފައި ނުވާއިރު އޭނާގެ މައްޗަށް ދައުވާ ކުރަން ނުފޮނުވަން ނިންމީ އެކަށޭނަ ހެކި ނެތުމުން ކަމަށް ފުލުހުން ވިދާޅުވެއެވެ.