ރައީސް ޔާމިނުގެ އިސްތިއުނާފު މައްސަލަ ފަސްކޮށް ފުއްގިރި މައްސަލައިގެ އިތުރު އަޑުއެހުމެއް މާދަމާ ބާއްވަނީ!

އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން ކުރި ހުކުމާއި ގުޅިގެން އެމަނިކުފާނުގެ ފަރާތްޕުޅުން ހައި ކޯޓުގައި އިސްތިއުނާފު ކޮށްފައިވާ މައްސަލައިގެ އަޑުއެހުން ފަސްކޮށް އަނެއްކާވެސް ދަށު ކޯޓުގައި އޮތް ފުއްގިރި މައްސަލައިގެ އިތުރު އަޑުއެހުމެއް ތާވަލުކޮށްފި އެވެ.

ފުއްގިރި މައްސަލައާއި ގުޅިގެން ދައުލަތުގެ ފަރާތުން ހުށައަޅާފައިވާ ހެކިންގެ ހެކިބަސް ނެގުމަށް މިއަދު ވަނީ ކްރިމިނަލް ކޯޓުގައި އަޑުއެހުމެއް ބާއްވާފަ އެވެ.

މިއަދުގެ އަޑުއެހުމުގައި ވަނީ އެމްއެމްޕިއާރުސީގެ ކުރީގެ މެނޭޖިން ޑިރެކްޓާ އަބްދުالله ޒިޔަތާއި، ކުރީގެ ނައިބު ރައީސް އަހުމަދު އަދީބާއި ދެމެދު ދެކެވިފައިވާ ވާހަކަތަކެއްގެ ވައިބާ ޗެޓް ލޮގަކާއި ގުޅޭ ރިޕޯޓާއި ގުޅިގެން ހެކިބަސް ނަގާފައެވެ.

އެ މައްސަލައާއި ގުޅޭގޮތުން ނަގާފައިވަނީ ޒިޔަތުގެ ލެޕްޓޮޕް ތަހުލީލުކޮށް، އޭގެން ޑޭޓާ އެކްސްޓްރެކްޓު ކުރުމުގެ މަސައްކަތް ކުރައްވާފައިވާ ފުލުހުންގެ ޚިދުމަތުގެ ޑިޖިޓަލް އެވިޑެންސް ލެބޯޓްރީގައި މަސައްކަތް ކުރައްވާ އޮފިސަރެއްގެ ހެކިބަހެވެ.

ދެން މިއަދުގެ އަޑުއެހުމުގައި ވަނީ އަދީބުގެ ފޯނާއި ފެންޑްރައިވެއް ހިމެނޭހެން ހަތަރު ޑިވައިސެއްގެ ޑޭޓާ ތަހުލީލުކުރި އޮފިސަރު އަބްދުالله ޝިފާޒުގެ ހެކިބަހެވެ.

މިއަދުގެ އަޑުއެހުން ގާތްގަނޑަކަށް 6 ގަޑިއިރަށް ދެމިގެން ދިޔައެވެ. އިއްޔެއާއި މިއަދާއެކު އެކު ޖުމްލަ ރައީސް ޔާމިނު ވަނީ 19 ގަޑިއިރު ޝަރީއަތުގައި ހޭދަކުރައްވާފަ އެވެ.

އިއްޔެގެ އަޑުއެހުމުގައި ރައީސް ޔާމީން ވަނީ އެމަނިކުފާނުގެ ފަރާތްޕުޅުން ހައިކޯޓަށް ހުށައަޅާފައިވާ އިސްތިއުނާފު މައްސަލައަށް ހުރަސް ނޭޅޭގޮތަށް ދަށުކޯޓުގެ އަޑުއެހުންތައް ކުރިއަށް ގެންގޮސްދެއްވުމަށް އެދިވަޑައިގެންފަ އެވެ.

މިވަގުތުވެސް އެމަނިކުފާނު ގެންދަވަނީ އާރަށު މައްސަލައާއި ގުޅިގެން މިދިޔަ ޑިސެމްބަރުގެ 25 ގައި ކްރިމިނަލް ކޯޓުން ކުރި ޖަލު ހުކުމް ތަންފީޒު ކުރައްވަމުން ނެވެ.

އެހެންކަމުން، އެ މައްސަލައިގެ އިސްތިއުނާފު އަޑުއެހުންތައް ފެށިފައިވާއިރު، ފުއްގިރި މައްސަލައަށް ޖާގަ ދިނުމުގެ ގޮތުން ހައިކޯޓުން ވަނީ ދެ ފަހަރުމަތިން އެ ކޯޓުގައި އޮތް އިސްތިއުނާފު މައްސަލައިގެ އަޑުއެހުން ކެންސަލްކޮށްފަ އެވެ.

މާދަމާގެ 1:45 އަށް ހައިކޯޓުގައި އާރަށު މައްސަލައިގެ އިސްތިއުނާފު އަޑުއެހުމެއް ތާވަލުކޮށްފައިވީ ނަމަވެސް، މިއަދުގެ އަޑުއެހުން ނިންމާލަމުން މާދަމާ ހެނދުނު 9:00 އަށް ފުއްގިރި މައްސަލައިގެ އަޑުއެހުމެއް ކްރިމިނަލް ކޯޓުގައި ތާވަލުކުރުމާއި ގުޅިގެން ހައިކޯޓުން ވަނީ އަނެއްކާވެސް އެ ކޯޓުގައި ތާވަލުކުރި އަޑުއެހުން އެހެން ދުވަހަކަށް ފަސްކޮށްފަ އެވެ.

އާރަށުގެ މައްސަލައިގެ އަޑުއެހުން އަނެއްކާ ވެސް ފަސްކޮށްފައިވަނީ، އެ މައްސަލަ ލަސްކުރަމުންދާތީ، އިދިކޮޅު ކޯލިޝަނުން ބޮޑެތި ކަންބޮޑުވުންތަކެއް ފާޅުކުރަމުންދާ ވަގުތެއްގައިކަން ފާހަގަކޮށްލެވެއެވެ.