ރާއްޖޭގައި ތިބި އިންޑިޔާ ސިފައިންގެ އަދަދު ހާމަކޮށްފިނަމަ ކާޑު ލިބުމަށް ދަތިވެދާނެ: އައިކޮމް

ރާއްޖޭގައި ތިބި އިންޑިޔާ ސިފައިންގެ އަދަދު ހާމަކޮށްފިނަމަ، ދެ ގައުމުގެ ދެމެދުގައިވާ ގުޅުމަށް ބުރުއަރައި، ކާޑުގެ ބާވަތްތައް ލިބުމަށް ދަތިވެދާނެ ކަމަށް އިންފޮމޭޝަން ކޮމިޝަނަރުގެ އޮފީސް (އައިކޮމް) ހައި ކޯޓުން ބުނެފިއެވެ.

މައުލޫމާތު ހޯދާ ލިބިގަތުމުގެ ބާރުގެ ދަށުން "ދިޔަރެސް" ނޫހުގެ ފަރާތުން އަހުމަދު އަޒާން ވަނީ، ރާއްޖޭގައި ތިބި އިންޑިޔާ ސިފައިންގެ އަދަދު ހޯދުމަށް އެދިފައެވެ.

ނަމަވެސް އެފަދަ މައުލޫމާތެއް ހާމަކޮށްގެން ގައުމީ ސަލާމަތަށް ނުރައްކާވެދާނެތީ، އެ މައުލޫމާތު ހާމަ ނުކުރެވޭނެ ކަމަށް ޑިފެންސް މިނިސްޓްރީން ވަނީ ބުނެފައެވެ. އެހެންކަމުން އެ މައުލޫމާތު ހާމަ ނުކުރަން އައިކޮމްއިން ނިންމީއެވެ.

އައިކޮމްގެ ނިންމުން އިސްތިއުނާފު ކުރުމަށް އަޒާން ވަނީ ހައި ކޯޓުގައި އެދިފައެވެ. އަދި އެ މައްސަލައަށް ޑިފެންސް މިނިސްޓްރީގެ ފަރާތުން އޭޖީ އޮފީހުން ވަނީ ތަދައްހުލުވެފައެވެ.

އެ މައްސަލައިގެ މިއަދުގެ އަޑުއެހުމުގައި އައިކޮމްއިން ބުނީ، ހޯދަން އެދިފައިވާ މައުލޫމާތަކީ ކޮންޓްރެކްޓްގެ ތެރޭގައި ހިމެނޭ މައުލޫމާތު ކަމަށެވެ. އަދި ސިފައިންގެ ލަފާދޭ މަޖިލީހުގެ ފަރާތުން އެދިފައި ވަނީ އޭގެ ސިއްރު ހިފަހައްޓަން ކަމަށް އައިކޮމްއިން ބުންޏެވެ.

އަޒާން ހުށަހެޅި އިސްތިއުނާފީ ނުކުތާއެއްގައި ބުނެފައިި ވަނީ، އެ މައުލޫމާތު ގައުމީ ސަލާމަތާ ގުޅޭ ގޮތަކާއި އެ މައުލޫމާތު ހާމަކޮށްފިނަމަ ގައުމީ ސަލާމަތަށް ނުރައްކާވާނެ ގޮތެއް ބަޔާންކޮށް ނުދެވޭ ކަމަށެވެ.

އަދި އޭގެ ރައްދަކަށް އައިކޮމްއިން ބުނީ، އެ މައުލޫމާތު ހާމަކޮށްފިނަމަ ދެ ގައުމުގެ ދެމެދުގައިވާ އެއްވުމަކާ ހިލާފަށް އަމަލު ކުރުމުގެ ސަބަބުން ރާއްޖޭގެ އިޔާދަތަށް ގެއްލުމެއް ލިބުމުގެ ފުރުސަތު އޮންނާނެ ކަމަށެވެ. އަދި ގައުމީ ސަލާމަތަށް ނުރައްކާވެދާނެ ފަދަ ކަމެއް ގާނޫނުއަސާސީގައި މާނަކޮށްފައިވާ ދާރިއާގެ ތެރޭގައި ހިމެނޭ މައުލޫމާތެއް ދޫކުރުމުން ފޫ ނުބެއްދޭ ފަދަ ގެއްލުމެއް ފޯރުމުގެ ބިރު އޮތްނަމަ އެފަދަ މައުލޫމާތެއް ދޫ ނުކުރުމުގެ ބާރު ދައުލަތުގެ އިދާރާތަކަށް ލިބިގެންވާކަން މައުލޫމާތު ހޯދާ ލިބިގަތުމުގެ ގާނޫނުގައި އޮންނަ ކަމަށް އައިކޮމްއިން ބުންޏެވެ.

މި މައްސަލަ ހައި ކޯޓުގައި ބައްލަވާ ބެންޗުގައި ތިއްބަވަނީ އިސްފަނޑިޔާރު ހުސެއިން ޝަހީދު، ފަނޑިޔާރު ހަސަން ޝަފީއު އަދި ފަނޑިޔާރު ހުޒެއިފާ މުހައްމަދެވެ.