ރަސޫލާގެ ހަދީސް ބަސްފުޅެއްކަމަށް ވިދާޅުވެ އިމްރާނު ހެއްދެވީ އިތުރުފުޅެއް!

ރިޔާސީ އިންތިޚާބުގެ ވޯޓާއި ޖެހެންދެން ނުނިދާ ހޭލާ ތިބެގެން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ކެމްޕޭނުގައި މަސައްކަތްކުރުމަށް ހިތްވަރުދެއްވާ ހޯމް މިނިސްޓަރު އަދި މި ސަރުކާރުގެ ކޯލިޝަން ޕާޓުނަރު އަދާލަތު ޕާޓީގެ ރައީސް އިމްރާނު އަބްދުالله ކީރިތި ރަސޫލާ ޞައްލަالله ޢަލައިހި ވަސައްލަމަގެ ހަދީސް ބަސްފުޅެއްކަމަށް ވިދާޅުވެ ބޭނުންކުރެއްވީ ރަސޫލާގެ ހަދީސެއް ނޫންކަން ހާމަވެއްޖެ އެވެ.

ރައީސް ޞާލިހުގެ ރިޔާސީ ކެމްޕޭނަށް ށ އަތޮޅަށް ކުރެއްވި ދަތުރުފުޅުގައި އެ އަތޮޅުގެ ފޯކައިދޫގައި ބޭއްވި ޖަލްސާއެއްގައި ވާހަކަދައްކަވަމުން އިމްރާނު ވިދާޅުވީ ރަސޫލާ ޞައްލަالله ޢަލައިހި ވަސައްލަމައަށް ފާޅުގައި އިސްލާމްދީނަށް ދައުވަތު ދެއްވަން މާތްﷲ ސުބްޙާނަހޫ ވަތަޢާލާ އެންގެވުމުން އެކަލޭގެފާނުގެ އަނބިކަނބަލުން މާތްﷲ އެކަމަނާއަށް ރުއްސުންލެއްވި ޚަދީޖަތުގެފާނުގެ އަރިހަށް ވަޑައިގެން، ނިދުމާއި އަރާމުކުރުމުގެ ޒަމާން ފާއިތުވެއްޖެކަމަށް ހަދީސްކުރެއްވި ކަމަށެވެ.

އިމްރާނު އެ މިސާލު ނެންގެވީ ރިޔާސީ އިންތިޚާބަށް ވަގުތު ކުޑަތަންވެފައިވާއިރު، ރައީސް ޞާލިހަށް ދެވަނަ ދައުރެއް ހޯއްދަވާދެއްވުމަށް ކެމްޕޭނު ޓީމުތަކުން ނިދުމާއި އަރާމާއި ދޫކޮށް މަސައްކަތްޕުޅު ކުރެއްވުމަށް ހިތްވެރުދެއްވުމަށެވެ. އަދި އޭނާ ވަނީ އިންތިޚާބާއި ޖެހެންދެން މި އޮތް ދުވަސްތަކުގައި ހުއްޓުމެއްނެތި އެ މަސައްކަތް ކުރުމަށް ގޮވާލައްވާފަ އެވެ.

އެހެން ނަމަވެސް ރަސޫލާގެ ހަދީސްބަސްފުޅެއްކަމަށް އިމްރާނު ވިދާޅުވި އިބާރާތަކީ ރަސޫލާގެ ހަދީސް ބަސްފުޅުތައް ލިޔުއްވާފައިވާ އެއްވެސް ހަދީސް ފޮތެއްގައި އޮތް އިބާރާތެއް ނޫނެވެ.

ސަލާމާއި ޞަލަވާތް ލެއްވި މާތް ނަބިއްޔާއަށް ނިސްބަތްކުރައްވައި މިބަސްފުޅު ގެންނަވާފައިވަނީ "ފީ ޡިލާލިލް ޤުރުއާން"ގެ މުއައްލިފު ސައްޔިދު ޤުޠުބެވެ.

ސައްޔިދު ޤުޠުބުގެ ފޮތުގައި ނަބިއްޔާއަށް ނިސްބަތްކުރައްވައި ގެންނެވި ޢިބާރާތަކީ "مضى عهد النوم ياخديجة" އެވެ. މާނައަކީ "އޭ ޚަދީޖާއެވެ. ނިދިކުރެއްވުމުގެ ދުވަސްތައް މާޒީވެއްޖެއެވެ."

އެހެން ނަމަވެސް މި ބަސްފުޅާއި މެދު ވަރަށް ބޮޑަށް ހޯދައި ބަލައިގެން ވެސް އެއްވެސް ހަދީސް ފޮތަކުން އެ ހަދީސް ފެނިވަޑައިގެންފައި ނުވާތީ އެއީ ހަދީސެއްކަމުގައި ދެކިވަޑައިނުގަންނަވާކަމަށް އިލްމުވެރިން ވަނީ ހާމަކުރައްވާފަ އެވެ.

އެހެންކަމުން ރައީސް ޞާލިހުގެ ކެމްޕޭނު ޓީމުތަކުން ނިދުމާއި އަރާމުކުރުން ދޫކޮށް އެ މަސައްކަތުގައި ޝާމިލުވުމަށް ހިތްވްރުދީ އިމްރާނު ބޭނުންކުރި އިބާރާތަކީ ސައްޙަ ހަދީސެއް ނޫން ކަމަށާއި، އިމާރަނުގެ އެ އިބާރާތަކީ އަރަބި ބަހުގެ ޤަވައިދަށްވެސް ނުފެތޭ އިބާރާތެއްކަން ވަނީ ހާމަވެގެން ގޮސްފަ އެވެ.

ރައީސް ޞާލިހަށް ހުށާމަދުކުރަމުން މީގެކުރިން ވެސް ރަސޫލާއަށް ނިސްބަތްކުރައްވާ އިމްރާނު ދެއްކެވި ވާހަކަތަކަށް ރާއްޖޭގެ ގިނަ އިލްމުވެރިންގެ ބޮޑެތި ފާޑުކިޔުންތަކެއް ވެސް އަމާޒުވެގެން ދިޔައެވެ.

އަދި އިމްރާނު ރައީސަށް ހުޝާމަދުކޮށް ދެއްކި ވާހަކަތަކަށް އޭނާ ރާއްޖޭގައި ދިރިއުޅޭ ސައްތައިން ސައްތަ މުސްލިމު ރައްޔިތުންގެ ކިބައިން މާފަށް އެދުމަށް ވެސް އިމްލުވެރިން ގޮވާލެއްވި އެވެ.