ރައްޔިތުން ބޭނުންވާ ކަންކަމަށް ހުރަސް އަޅާ ބަޔަކަށް ޖާގަ ދޭކަށް ދެން ނެތިން: ރައީސް ޞާލިހު

ރާއްޖޭގެ ރައްޔިތުން ބޭނުންވާ ކަންކަމަށް ހުރަސް އަޅާ ބަޔަކަށް، ޖާގައެއް ނުދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިހު މިފަދައިން ވިދާޅުވީ، އެ މަނިކުފާނުގެ ރިޔާސީ ކެންޕެއިނަށް ކ. ގުރައިދޫ އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ.

އެގޮތުން، ރައީސް ޞާލިހު ވިދާޅުވީ، ފާއިތުވި، 2018 ވަނަ އަހަރުގެ ރިޔާސީ ކެންޕެއިންގައި ގުރައިދޫގެ ރައްޔިތުންނަށް އެމަނިކުފާނު ވެވަޑައިގެންނެވި ހުރިހާ ވައުދެއްވެސް ގާތްގަނޑަކަށް ފުރިހަމަވެ ނިމިފައިވާ ކަމަށެވެ. އެގޮތުން އެ ކެންޕެއިންގެ ތެރެއިން އެރަށުގެ ރައްޔިތުން އެމަނިކުފާނުގެ އަރިހުން އެދިލެއްވި އެއް ކަމަކީ ރަށަށް ކުރިމަތިވެފައިވާ ބޯހިޔާވަހިކަމުގެ މައްސަލަ ހައްލު ކުރުމަށް އެ ރަށުގެ ބިން ހިއްކައި، އެ ރަށް ކައިރީގައި ރަށުގެ ރައްޔިތުން ދަތުރު ދާނެ ޕިކްނިކް އައިލެންޑެއް ހެދުން ކަމަށެވެ. އަދި އެކަން އެގޮތަށް ކޮށްދީ ނިންމާފައިވާ ކަންވެސް އެމަނިކުފާނު ފާހަގަކުރެއްވިއެވެ.

އެހެންނަމަވެސް، ގުރައިދޫ ކައުންސިލުން މިހާތަނަށް ވެސް އެ ރަށުގެ ރައްޔިތުންނަށް ބިން ދޫކޮށްފައި ނުވާކަށް އެމަނިކުފާނު ވަނީ ހިތާމަޔާއިއެކު ފާހަގަކުރައްވާފައެވެ.

ބިންހިއްކީ ރަށުގައި ދިރިއުޅޭ ރައްޔިތުންނަށް ބޯހިޔާވަހިކަން ހޯދައިދިނުމަށް. ލޯކަލް ގާނޫނުގައި އޮންނަ ގޮތުން ރަށްރަށުގެ ބިން ކަނޑައި ރައްޔިތުންނަށް ދޫ ކުރުމަކީ ކައުންސިލުގެ ޒިންމާއެއް. މިހާތަނަށް އައި އިރުގައިވެސް ކައުންސިލުން އެކަން ނުކޮށް އޮތުމަކީ އަޅުގަނޑު ހިތާމަ ކުރާ ކަމެއް. ސަރުކާރުން އެ އޮތީ ބޮޑު ބިމެއް ހިއްކާދީފައި. ރައްޔިތުން މި ރަށުން ބޯހިޔާވަހިކަން ބޭނުންވޭ. ގޯތި ބޭނުންވޭ. ގޯތި ނުދެވެންވީ އެއްވެސް ސަބަބެއް މިރަށަކު ނެތް. އަޅުގަނޑު ދަންނަވާނީ އެކަން ކައުންސިލަށް ނުކުރެވޭ ކަމަށް ވަންޏާ، ގެންނަން ޖެހޭ ބަދަލެއް ގެނެސްގެން ނަމަވެސް، ގާނޫނަށް ބަދަލު ގެނެސްގެން ނަމަވެސް ބޯހިޔާވަހިކަން ފޯރުކޮށްދިނުމަށް.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

މިއާއެކު ރައީސް ޞާލިހު ވިދާޅުވީ، ކަންކަން މިހެން ހުރުމުން ކުރިއަށް އޮތް ތަނުގައި، ރައްޔިތުން ބޭނުންވާ ކަންކަމަށް ހުރަސްއަޅާ ބަޔަކަށް ކުރިއަށް އޮތް ތަނުގައި ޖާގަ ނުދެއްވާނެ ކަމަށެވެ.

ރައްޔިތުން ބޭނުންވާ ކަންކަމަށް ހުރަސް އަޅާ ބަޔަކަށް އަޅުގަނޑުމެން ޖާގައެއް ދޭކަށް ދެން ނެތިން. އަޅުގަނޑަށް ހަމަ ޔަގީން، ކުރިއަށް އޮތް އިންތިހާބު ތަކުގައި، މި ރަށުގެ ރައްޔިތުން އެކަން ދަންނާނެ. އެއީ ރައްޔިތުންގެ މަޖިލީހުގެ އިންތިހާބު ކަމަށް ވިޔަސް، ރިޔާސީ އިންތިހާބު ކަމަށް ވިޔަސް، ކައުންސިލް އިންތިހާބު ކަމަށް ވިޔަސް. ރައްޔިތުންނަށް ހެޔޮ އެދޭ، ރައްޔިތުންގެ މުހުތާދުތައް ފުއްދައިދޭ ބަޔަކު ނޫނިއްޔަކާ، ރައްޔިތުން ދެނެއް މިރަށަކަށް ނު ހޮވާނެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހް އިތުރަށް ވިދާޅުވީ، ގުރައިދޫ ރައްޔިތުންނަށް ބޭނުންވާ ބޯހިޔާވަހިކަން ފޯރުކޮށްދިނުމަށްޓަކައި، ފުލެޓް އެޅުމުގެ މަޝްރޫއު އެއް ހިންގުމަށް އެމްޑީޕީގެ މެނިފެސްޓޯގައި ހިމަނުއްވާނެ ކަމަށެވެ.

އަދި މީގެ އިތުރުން، އެ ރަށުގެ ޒުވާނުންނަށްޓަކައި، ފުރިހަމަ ވަސީލަތްތައް ހިމެނޭ ޒުވާނުންގެ މަރުކަޒެއް ގާއިމް ކޮށްދެއްވާނެ ކަމަށާ، ގުރައިދޫގެ ބަނދަރުގައި ނެރެއް ކަނޑައި ބޭރު ތޮށިލައި، ބަނދަރުގެ ބޭނުން ފުރިހަމަ ގޮތުގައި ކުރެވޭނެގޮތް ހަދައިދެއްވާނެ ކަމަށްވެސް އެމަނިކުފާނު ވިދާޅުވިއެވެ.